சந்தனக்கூடு திருவிழா

Alangaravasal
கீழக்கரை அருகேயுள்ள ஏர்வாடியில் மஹான் குத்புல் அக்தாப் சுல்தான் செய்யது இப்ராஹிம் ஷஹீது ஒலியுல்லாஹ் நினைவிடம் உள்ளது.

 

பெருமை வாய்ந்த ஏர்வாடி தர்காவில், வருடத்திற்கு ஒரு முறை நடைபெறும் உரூஸ் எனப்படும் சந்தனக்கூடு திருவிழா மிகவும் பிரசித்தம்.. 

பல லட்சம் பக்தர்கள் கூடும் விழா, இரவு துவங்கி, மறுநாள் காலை மகானின் சமாதியில் சந்தனம் பூசுவது வரை தொடரும்.  பல்வேறு சமுதாயத்தினர் உருவாக்கித் தந்த சந்தனக்கூடு, அலங்கரிக்கப்பட்ட யானைகள், குதிரைகளின் பின்னணியில் பவனி வருவதை காணவும், பங்கேற்கவும், பலன் பெறவும் வேண்டி, நாட்டின் பல பகுதி களில் இருந்தும் பக்தர்கள் வருகை தருவர். 

மேளங்கள் முழங்க வாண வேடிக்கைகளுடன் வெள்ளிப்பேழையில் யானை மீது எடுத்து வரப்படும் சந்தனம், மகானின் சமாதியில் அதிகாலை பூசப்படும்.

கூடியிருக்கும் அனைத்து சமூகத்தினரும் பூக்களை தூவி வரவேற்று தர்காவை மூன்று முறை வலம் வந்து, தர்கா வாசலில் பக்தர்களின் பார்வைக்கு நிறுத்தப்பட்டபின், சந்தனம் பூசும் நிகழ்ச்சி நடைபெறும். 
உலக நன்மைக்காக சிறப்புத் தொழுகை நடைபெறும். 
பக்தர்களுக்கு சந்தனம் வழங்கப்படும். 
Sandhanakkoodu

சந்தனக்கூட்டின் முன் தாரை, தப்பட்டை, மேள தாளத்தை ஆதிதிராவிடர் சமுதாயத்தினர் முழங்கி வர, 

இருள் விலக்கி வழிகாட்டும் தீப்பந்தங்களை, தேவேந்திரர் சமுதாயத்தினர் ஏந்தி வர, 

சந்தனக்கூட்டிற்கு தேவையான இணைப்பு கயிறை, சமுதாயத்தை பிணைக்கும் கயிறாக நினைத்து, நாடார் சமுதாயத்தினர் உருவாக்கித்தர, 

விளக்கு ஏற்ற தேவைப்படும் எண்ணெய், திரியை சலவையாளர் சமுதாயத்தினர் கொண்டு தர, 

தங்களது தோள் கொடுத்து சந்தனக்கூட்டை, யாதவ சமுதாயத்தினர் சுமந்து வர, 

மக்கள் வெள்ளத்தில் மல்லிகை மலர்களை மாலைகளாக சூடி, மணக்க, மணக்க ஆடி அசைந்து வர கோலாகலமாக ஏர்வாடி 

சந்தனக்கூடு திருவிழா அனைத்து மதத்தினரும் கொண்டாடும் மத நல்லிணக்க விழாவாக நடைபெறும்.

மத நல்லிணக்கத்தை வலியுறுத்தும் வகையில், இந்து மதத்தினரே கடந்த 265 ஆண்டுகளாக சந்தனக்கூட்டைதோளில் சுமந்தபடி தர்கா கொண்டு வருகின்றனர்.   

அவர்களின் வேண்டுகோள்படி, சாரட் வண்டியில் ஊர்வலமாக கொண்டு வர தர்கா கமிட்டியினரின் ஏற்பாடு உண்டு
Erwadi flaghoisting.

மிகவும் பழமையும், பெருமையும் வாய்ந்த இந்த புனித ஸ்தலத்திற்கு, அனைத்து மதத்தினரும் வந்து செல்கின்றனர் என்பதும், குறிப்பாக, மனநலம் பாதிக்கப்பட்டவர் களுக்கு ஆரோக்கியமான மாற்றத்தை ஏற்படுத்தும் இடமாகவும் விளங்குகிறது.

இங்கு ராமநாதபுரத்தை ஆண்ட ரகுநாத சேதுபதி உள்ளிட்ட பலர் வந்து, தங்களது நீண்ட நாள் பிரார்த்தனையை நிறைவேற்றி சென்ற வரலாறும் உள்ளது.

ERWADIshariff ultimate