கார்த்திகை ஜோதி

 
மனதிற்கு மகிழ்ச்சியூட்டும் மாதம் கார்த்திகை மாதம்..

சிவபெருமானையும் மகா விஷ்ணுவையும் முருகப் பெருமானையும் கார்த்திகையில் வழிபட்டுப் பேறுகள் பல பெறலாம் என்று ஞான நூல்கள் கூறுகின்றன.

கார்த்திகை மாதத்தில் சிவலிங்கத்தை நெய்யினால் அபிஷேகித்து, 
வில்வம் மற்றும் மரிக்கொழுந்தால் அர்ச்சித்து, இனிப்புப் பொருட்களைச் சமர்ப்பித்து வழிபட்டால் குடும்பத்தில் மகிழ்ச்சி பொங்கும்.

மகா விஷ்ணுவை துளசி தளத்தால் அர்ச்சித்து வழிபட்டால் அசுவமேத யாகம் செய்த பலன் கிட்டும். 
முருகப் பெருமானுக்கு சந்தனாபிஷேகம் செய்து, இனிப்பான பழங்களைச் சமர்ப்பித்து வழிபட்டால் சந்தான பாக்கியம் கிட்டும்.

கார்த்திகையில் விளக்கு தானம் செய்வது சிறப்பிக்கப்படுகிறது. 

வெண்கலம் அல்லது வெள்ளி விளக்கில் நெய்யிட்டு, தீபஒளியுடன் 
வேதம் அறிந்த விற்பன்னருக்கு தானம் அளித்தால், இல்லத்தில் தடைப்பட்ட 
சுப காரியங்கள் மகிழ்வுடன் நிறைவேறும்.

கார்த்திகை மாத முதல் நாளில் காவேரியில் நீராடினால், ஐப்பசி மாதத்தில் நீராடும் துலா ஸ்நானப் பலனை இந்த ஒரே நாளில் பெறமுடியும்.

மக்கட்செல்வம் இல்லாத தம்பதியர் பக்தியுடன் இறைவழிபாட்டில் ஈடுபட மக்கட் செல்வம் கிட்டும்.  அழகிய அறிவுள்ள குழந்தை பிறக்க வழி வகுக்கும். 

அதனால்தான் இம்மாதத்தினைத் திருமண மாதம் மக்கட் செல்வத்தை அருளும் மாதம் என்று சொல்வர்.

கார்த்திகை பெளர்ணமி அன்று சந்திரன் பூமிக்கு அருகில் நெருங்கி வருவதால், சந்திரனின் ஒளி மிகப் பிரகாசமாக இருக்கும்.

அன்று சிவபெருமான் தன் தேவியுடன் பூமிக்கு அருகில் வந்து அருள்புரிவதாக ஐதீகம்.

அதனால், கார்த்திகைப் பெளர்ணமி அன்று கிரிவலம் வருவது மிகவும் சிறப்பிக்கப்படுகிறது.

கிரிவலம் வருவதற்குப் பல மலைகள் உள்ளன. இதில் மிகவும் சிறப்புப் பெற்றது திருவண்ணாமலை.

கார்த்திகையில் கிரிவலம் வரும்பொழுது மழை பெய்ய நேரிட்டால், அந்த மழையில் நனைந்தால் தேவர்களின் ஆசி கிட்டும்.

லட்சம் மழைத்துளிகளில் ஒன்று தேவசக்தி பெற்றது
என்று சொல்லப்படுகிறது.

திருவண்ணாமலையை கார்த்திகைப் பெளர்ணமி அன்று
தேவர்களும் ரிஷிகளும் முனிவர்களும் வலம் வந்திருக்கிறார்கள்.

இந்திரன், வருணன், வாயு, குபேரன், யமன் ஆகியோரும் வலம் வந்திருக்கிறார்கள்.

மகா விஷ்ணு மகாலட்சுமியுடன் வலம் வந்திருப்பதாகப் புராணங்கள் கூறுகின்றன.

இன்னும் சொல்லப்போனால் இறைவனே தன் தேவியுடன் இம்மலையை தீபத் திருநாளுக்கு மறு நாளும், தைப்பொங்கல் சமயத்தில் மாட்டுப் பொங்கல் அன்றும் வலம் வருகிறார்.

அப்பொழுது அவர்களுடன் நாமும் வலம் வந்தால்
கிடைக்கும் பலன்கள் ஏராளம்.

 பஞ்ச பூதத்தில் அரச மரம் ஆகாயத்தையும்,

 வாதராயண மரம்.  காற்றையும், 

வன்னி மரம் அக்கினியையும், 

நெல்லி மரம். தண்ணீரையும், 

ஆலமரம் மண்ணையும் குறிப்பதாக கூறப்படுகிறது .

தீபாவளிக்குப் பின்வரும் துவாதசியன்று துளசிச் செடிக்கு, திருமாலாக பாவித்த நெல்லி கிளைக்கும் திருமணம் செய்விப்பார்கள். 

பிரபோதன ஏகாதசி என்பது தீபாவளி அமாவாசைக்குப்பின் வரும் ஏகாதசி. 

அன்றுதான் திருமால் மகாபலிக்கு காவலாக நான்கு மாத யோக நித்திரை செய்து பின் வைகுண்டம் திரும்பிய நாள். அதற்கு மறுநாள் தான் கொடுத்த வாக்கைக் காப்பாற்ற திருமால் துளசியை மணந்து கொண்டார்.

கார்த்திகை மாதத்தில் ஏகாதசிக்கு அடுத்த நாள் துளசி தேவியை மகாவிஷ்ணு மணந்ததாகப் புராணம் சொல்கிறது. 

மகாவிஷ்ணு நெல்லி மரமாகத் தோன்றியவர் என்பதால், கார்த்திகை ஏகாதசி அன்று துளசிச் செடியுடன், நெல்லி மரத்தடியில் பூஜை செய்ய வேண்டும். 

நெல்லி மரம் இல்லாதபட்சத்தில் வீட்டில் உள்ள துளசி மாடத்தில் நெல்லி மரத்தின் ஒரு சிறிய கிளையை வைத்துப் பூஜித்து துளசி கல்யாணம் செய்தால், திருமணமாகாத பெண்களுக்கு விரைவில் திருமணம் நடைபெறும்.

சுமங்கலிப் பெண்கள் கணவருடன் மகிழ்ச்சியாக நீடு வாழ்வர். 

கார்த்திகை ஞாயிறு மிகவும் போற்றப்படுகிறது. 
இதனால் யமவாதனை, யமபயம் நீங்கும்.

சங்கு, துளசி, சாளக்கிராமம் (புண்ணிய நதிகளில் கிடைக்கும் கல் வடிவ சிலை) மூன்றையும் ஒன்றாக பூஜிப்பவர்களுக்கு மஹாஞானியாகும் பாக்கியமும், முக்காலமும் உணரும் சக்தியும் கிடைக்கும் என்பது ஐதீகம். 

சங்கில் தீர்த்தம் நிரப்பி துளசி மேல் வைத்து சங்காபிஷேகம் செய்வது மிகவும் சிறந்தது. 

சிவபெருமானுக்கு பிடித்த அபிஷேகங்களில் உயர்ந்தது சங்காபிஷேகம்.

விருச்சிக மாதமாகிய கார்த்திகை மாதத்தில் பெளர்ணமியுடன் கூடிவரும் கார்த்திகை நட்சத்திரத்தன்று முருகப் பெருமானை வழிபடுவது சிறந்தது. அந்த நாளில் முருகன் சந்நிதியில் தீபங்கள் ஏற்றி வழிபட சகல பாக்கியங்களையும் பெறலாம்.

கார்த்திகை மாத திங்கட்கிழமையில் திருக்குற்றாலத்தில் நீராடி, குற்றாலநாதரையும் அன்னை குழல்வாய்மொழி அம்மையையும் வழிபாடு செய்தால் பாவங்கள் அழியும்.

சிவபெருமான் கார்திகைத் தீபத் திருவிழா அன்று
திருவண்ணாமலையில் ஜோதியாய் காட்சி தருகிறார்

இதனைத் தரிசித்தால் நோயற்ற வாழ்வும் பசித்த வேளையில்
உணவும் வளமான வாழ்வும் கிட்டும் என்று ஆன்றோர் சொல்வர்.

.ஸ்ரீரங்கத்தில் பெருமாள் சக்கரத்தாழ்வார் சந்தியில் எழுந்தருளி, கார்த்திகைக் கோபுர வாசல் பக்கம் கட்டப்பட்டிருக்கும் சொக்கப்பனை ஏற்றப்படும் காட்சியைக் கண்டு மகிழ்வார்..

 பெருமாளையும் சொக்கப்பனையும் தரிசிக்கும் பக்தர்களின்
வாழ்வில்என்றும் மகிழ்ச்சி பொங்கும் என்பது நம்பிக்கை.