கருணை தந்த கந்த சஷ்டி

நோய்நொடிகள் தீர்த்துவைக்கும் வண்ணமுகம் ஒன்று
நூறுமுகம் காட்டுதம்மா ஆறுமுகம் இங்கு!

பொன்னழகு மின்னிவரும் வண்ணமயில் கந்தா
கண்மலரில் தன்னருளைக் காட்டிவரும் கந்தா
நம்பியவர் வந்தால் நெஞ்சுருகி நின்றால்
கந்தா முருகா வருவாய் அருள்வாய்............முருகா

 அருள் மழையைப் பிரவாகமாய் வர்ஷித்து  கருணை வெள்ளத்தில் ஆழ்த்தி அருள் பொழியும் அழகுதெய்வம் ஜெயந்தி நாதனாம் முருகப் பெருமான் திருச்செந்தூரின் கடலோரத்தில் செந்தில் நாதனாய் அருளாட்சி நடத்துகிறான் ..
ஐப்பசி மாத சஷ்டியே கந்த சஷ்டி என்று சிறப்பாகச் சொல்லப்படுகிறது. வளர்பிறை பிரதமை தொடங்கி ஆறு நாட்கள் நடைபெறும் கந்த சஷ்டி விழாவில்,முறைப்படி விரதம் அனுஷ்டிக்கப்படுகிறது... 

ஏழாம் நாள் காலை சிறப்பு வழிபாடுகள் செய்து விரதம் முடிக்கின்றனர். 

தேவர்கள் முதலானோரும் கந்தசஷ்டி  விரதம் இருந்தே இழந்த பதவியை அடைந்துள்ளனர். 

கந்தசஷ்டி விரதத்தை முறைப்படி கடைப்பிடித்து பலரும் நலம் பெற்றுள்ளார்கள் ...


திருச்செந்தூரின் கடலோரத்தில் செந்தில்நாதன் அரசாங்கம்
தேடித்தேடி வருவோர்க்கெல்லாம் தினமும் கூடும் தெய்வாம்சம்!


"பகைவர்க்கும் அருள் வாய் நெஞ்சே' என்னும் மகத்தான தத்துவத்தை உலகுக்கு எடுத்தியம்பிய வண்ணம் கடலோரம் கம்பீரமாய் நிற்கிறது செந்திலாண்டவனின் ஆலயம்.

நாளெல்லாம் திருநாளே என எல்லா நாட்களிலுமே விழாக்கோலம் 
கொண்டு திகழும் திருத்தலம் திருச்செந்தூர்.  

விழாக்கள் என்பவை மக்களுக்கு இம்மை- மறுமை ஆகிய இரு நிலைகளிலும் இன்பத்தைத் தருபவை; புண்ணியம் தருபவை; பகையை அழித்து வெற்றியைத் தருவதனால்தான் மக்களுக்கு நலம் தந்து அருளும் விழாக்களுக்கு "உத்ஸவம்' என்று பெயர் வழங்கப்படுகிறது. 

"உத்' என்பது படைத்தலையும்; "ஸ' என்பது காத்தலையும்; "வம்' என்பது அழித்தலையும் குறிக்கிறது. எனவே, இறைவனின் முத்தொழில் களையும் குறிப்பது உத்ஸவம் ஆகும்.