பொன் ஓணம் கொண்டாட்டம்.

சிங்க (ஆவ்ணி)மாசத்தில் ஹஸ்த்தம் நட்சத்திரம் தொடங்கி திருவோணம் நட்சத்திரம் வரைஇருக்கும் 10 நாட்கள்தான் விழா நாட்கள். ஓணம் பண்டிகை - கேரளப் பொங்கல்னு கூட சொல்லலாம் :) .



 அறுவடைக் காலத்தின் ஆரம்பத்தினை முன்னிட்டு மலையாள ஆண்டின் முதல் மாதத்தில் (ஆகஸ்ட் - செப்டம்பர்) கேரளாவில் கொண்டாடப்படுகிறது. 

பத்து நாட்களுக்கும் தனித்தனியாக பெயரெல்லாம் 
கொடுத்து கொண்டாடுகிறார்கள்!..

அத்தம் நாளுடன் ஆரம்பிக்கிற ஓணம், சித்திர், சோதி(சுவாதி), விசாகம், அனிஷம், த்ரிகேட்டா, மூலம், பூராடம், உத்தராடம் என்று வந்து, இறுதியில முக்கிய நாளான திருஓணம் அன்று முடிகிற்து.

மஹாபலிச் சக்கரவர்த்தி வேள்விகள் செய்து, வேள்வியில் வரும் அத்தனை பேருக்கும் தான, தருமங்கள் கொடுத்து வந்தார்.

ஏற்கெனவே தேவர்களால் வெல்ல முடியாமல் இருக்கின்றார். தேவலோகத்தையும் ஆண்டு வருகின்றார் இவர் மேலும் மேலும் வேள்விகள் செய்து வந்தால் அவர் சக்தி இன்னும் அதிகம் ஆகிவிடுமே என நினைத்த தேவர்கள், இறைவனை வேண்ட, அவரும் ஏற்கெனவே தாம் காச்யபரின் என்பவரின் மனைவி வயிற்றில் பிறந்திருப்பதாய்த் தேவர்களிடம் தெரிவிக்கிறார். 

அந்தப் பிள்ளைக்குத் தக்க சமயம் வந்ததும் உபநயனம் செய்விக்கின்றார் காச்யபர்.  மஹாபலியின் வேள்வியில் செய்யப் படும் தானங்கள் பற்றிக் கேள்விப்பட்டு பிரம்மச்சாரியாக அங்கே வந்தார் மகா விஷ்ணு.

கையிலே தாழங்குடை, காலிலே பாதரட்சைகள். திருவோட்டை ஏந்திக் கொண்டு, உலகுக்கே அன்னம் அளிப்பவனும், உலகுக்கே பிட்சை போடுபவனுமான மஹாபலியிடம் வந்து பிச்சை கேட்டான்.

 "பவதி பிட்சாம் தேஹி!" என!  மஹாபலியிடம்!

மாயக் கள்வன், சிரித்துக் கொண்டே, "மஹாபலிச் சக்கரவர்த்தியே, நான் காச்யபரின் மகன். எனக்கு வேறு ஒன்றும் வேண்டாம். என் காலால் அளந்த மூவடி மண்ணே போதும். அதைக் கொடுங்கள்." என்று சொல்ல, மஹாபலியும் அவ்வண்ணமே தந்தேன் எனத் தன் கையில் உள்ள கமண்டலத்தில் நீர் வார்த்துத் தானம் செய்ய எத்தனிக்கின்றான்.

அசுர குருவான சுக்ராசாரியாருக்குப் புரிகின்றது உலகாள்பவனே, வாமன வடிவத்தில் வந்திருக்கின்றான், என்றும், இதில் ஏதோ சூழ்ச்சி இருக்கின்றது என்றும். 

உடனேயே குலகுருவான அவர் மஹாபலியிடம்  தானத்துக்கு ஒத்துக் கொள்ளாதே! இது அந்த மஹாவிஷ்ணுவின் தந்திரம், வந்திருப்பது கூட அவன் தான் என்று சந்தேகிக்கின்றேன். என்று எடுத்துரைத்தார்..!

மஹாபலியோ ஆஹா, அந்த சாட்சாத் மஹாவிஷ்ணுவே வந்தான் என்றால் நான் அதை மறுப்பதும் முறையாமோ?? தானம் கொடுத்தே தீருவேன் என்று சொல்லிவிட்டு, தன் கைக் கமண்டலத்தின் நீரால் அர்க்கியம் அளித்துத் தானம் கொடுக்க முயல, சுக்ராசாரியார் ஒரு வண்டு உருவில் கமண்டலத்தின் வாயை அடைக்க, அவர் தந்திரம் புரிந்த மஹாவிஷ்ணு, வண்டை ஒரு சிறு தர்ப்பைப் புல்லால் குத்தித் தள்ள, தானம் வழங்கப் படுகின்றது.

சிறுவன் அளக்க ஆரம்பிக்கின்றான். ஆனால்??? இது என்ன??? இவன் வாமனனா??? திரி விக்கிரமனா??? வளர்ந்து கொண்டே போகின்றானே??? 

ஓங்கி உலகளக்க ஆரம்பிக்கின்றார் சிறுவன் வடிவில் வந்த மஹாவிஷ்ணு.

ஒரு அடியால் இந்த பூமியையும், மறு அடியால் விண்ணையும் அளந்தாயிற்று. மூன்றடிக்கு இன்னொரு அடி குறையுதே?? மஹாபலி, இது என்ன?? மூன்றாவது அடியை எங்கே வைப்பேன்? என்று கேட்க, மஹாபலியோ, "தந்தேன் ஸ்வாமி!" என இரு கையையும் கூப்பிக் கொண்டு பணிவோடு, அவன் தாள் பணிய, அவன் தலையில் மூன்றாவது அடியை வைத்து ஒரு அழுத்து அழுத்திப் பாதாளத்துக்கு மஹாபலியை அனுப்புவதோடு அல்லாமல், அவன் பக்தியை மெச்சி அவனுக்கு முக்தியையும் கொடுக்கின்றார், உலகாள வந்த பரந்தாமன்.

அப்போது பரந்தாமனிடம் தான் நாட்டு மக்களிடம் பெரும் அன்பு வைத்திருப்பதால் வருடம் ஓர் முறை பாதாளத்தில் இருந்து நாட்டுக்கு வந்து மக்களைக் கண்டு, மகிழ சந்தர்ப்பம் கொடுக்குமாறு மகாபலி வேண்ட பரந்தாமனும் அப்படியே அருளினார்..!

மகாபலியை வரவேற்க வாசலில் போடும் பூக்களம் அலங்காரம் பண்டைய நாட்களில் ஹஸ்த்தம் ( அத்தம்) நட்சத்திரம் வரும் முதல்நாளே ஆரம்பிக்குமாம்.

குடும்பத்திலே இருக்கும் ஆண்பிள்ளைகள் அத்தப்பூ என்னும் பூவை சேகரித்து வந்து  பூக்களத்துலே முதல்லே வைத்து பிறகு தினமும் வெவ்வேறு பூக்களைச் சேகரித்து  அலங்கரித்துக்கொண்டே இருப்பார்கள்.

இப்படியே 10 நாள் ஆனதும் அந்தக் கோலம் பிரமாண்டமாய் உருவாகிவிடும் ..

ஓணத்தினத்தில் காலையிலே புது அரிசியை இடித்து  மாவாக்கி இலையில் எழுதிய அடை, ஆவியில் புழுங்கி அதைப் பாயாசம் வைத்து கடவுளுக்குப் படையல் வைப்பது வழக்கம் ..!