மங்களம் பொங்கும் சித்திரை புத்தாண்டு

புதிய எதிர்பார்ப்புகளையும் நம்பிக்கைகளையும் வழங்கும் மங்களகரமான திருநாளாக சித்திரைப் புதுவருடம் வரவேற்கப்படுகிறது.

புதிய ஆண்டின் தொடக்கமாக முக்கனிகளும் ஒருங்கேகிடைக்கும் சித்திரை மாதம் முதல் நாளை  தமிழ் வருடப் பிறப்பாக சித்திரைகனி எனும் தமிழ்புத்தாண்டாக சிறப்பாக கொண்டாடுகிறோம் ..

முக்கனிகள் , காய்கறிகள் , மலர்கள் , பணம், நகை வைத்து காலை எழுந்தவுடன் அதில் விழித்து அன்றைய வருடம் சீரோடும் சிறப்பாக இருக்க வேண்டும் என்று இறைவனை வேண்டிக்கொண்டு கோவில்களுக்கு செல்வதும்,  கொண்டாடுவதும் மரபு. 

சித்திரை மாதம் பிறந்ததுமே இளவேனில்காலம்' என்னும் 
வசந்த காலம் தொடங்குகிறது.

வசந்த காலத்தில் மாமரங்களில் மாந்தளிர்களும், 
மலர்களும் பூத்துக் குலுங்கும். 

வேப்ப மரங்களில் வேப்பம் பூக்கள் பூத்துக் குலுங்கும். 

மனித வாழ்க்கை இனிப்பும், கசப்பும் கலந்தே இருக்கும் 
என்பதை எடுத்துக் காட்டும் அம்சமாகத் திகழ்கிறது ... 

.புத்தாண்டு பஞ்சாங்கம் வாங்கி  சந்தனம், குங்குமம்  இட்டு, .புத்தாண்டுப் பூஜைகளை செய்த பின்பு  புத்தாண்டுப் பஞ்சாங்கத்தைப் படிப்பதன் மூலம் அந்த ஆண்டில், நவக்கிரக சஞ்சாரத்தினால் உலகத்துக்கும், மக்களுக்கும் நிகழவிருக்கும் பலன்களை அறிந்து கொள்ளலாம். சில தோஷங்களையும் நீக்கி கொள்ளலாம்.

 

புதுவருட தினத்தில் தான தருமங்கள் செய்வது வழக்கம்

பூஜை அறையை தூய்மை செய்து கோலமிட்டு பொன், வெள்ளி ஆபரணங்களையும் பணம், நிலைக்கண்ணாடி, வெற்றிலை, பாக்கு, பழங்கள், தேங்காய், மலர்கள் முதலிய மங்கலப் பொருள்களையும் தயாரித்து, ஒரு மனையின் மீது இட்டு அதற்கு அழகியகோலமிட்டு, பூஜைக்குரிய தெய்வத்தின் முன் வைக்க வேண்டும்.

 

அரிசி, பருப்பு, வெல்லம், பலா, மாம்பழம், வாழைப்பழம் ஆகியவற்றையும் வைத்து மறுநாள் காலை , சித்திரை மாதப்பிறப்பன்று அதிகாலையில் முதன் முதலாக  குளித்து புத்தாடை உடுத்தி இறைவன் முன்பு குத்துவிளக்குகளையும், ஊதுவத்திகளையும் ஏற்றி வைத்து .பூஜைக்குரிய தெய்வத்தையும், பூஜைக்கு வைத்துள்ள மங்கலப் பொருட்களையும் முதன் முதலாக தரிசிக்கும்படி செய்தால் வருடம் முழுவதும் மகிழ்ச்சி பொங்கும் எனவும் மங்கலப் பொருள்கள் செழித்து இருக்கும் என்பது நம்பிக்கை.

 பிறக்கும் இவ்வருடம் புனிதமாய் புதுமைகளோடு எம் வாழ்க்கயில் சகல வெற்றிகளும் ஏற்பட்டு நல்ல வளங்கள் வாழ்க்கையில் உருவாகவும் வழி தரட்டும் என பிரார்த்திக்கிறோம் ..!