மகத்தான வரமருளும் மும்பை மஹாலக்ஷ்மி

மும்பையில் உள்ள மிகவும் பழங்கால கோயில்களில் ஒன்றான பிரசித்தி பெற்ற மஹாலக்ஷ்மி கோயில் சென்றிருந்தோம். 

ப்ரீச் கேன்டியின் பி. தேசாய் சாலையில்  கோயில் அமைந்துள்ளது. 

அரபிக் கடற்கரையில் அமைந்துள்ள இந்த அழகான கோயிலுக்கு லட்சக்கணக்கான பக்தர்கள் வருகை தந்துள்ளனர்.

செல்வத்திற்கான கடவுளாக லக்ஷ்மியை இந்து மக்கள் வணங்குகிறார்கள். 

அதன்படிதான் இந்த கோயிலும் அமைந்துள்ளது. 

கோயிலின் உள் பிரகாரம் மிகவும் அழகாக அலங்கரிக்கப்பட்டிருக்கும். கோயிலுக்கு செல்லும் நுழைவு வாயிலில் ஏராளமான கடைகள் அமைந்துள்ளன. அங்கு பூஜைக்கான அனைத்துப் பொருட்களும் கிடைக்கும்.

மஹாலக்ஷ்மி கோயிலில் ஏராளமான கடவுள் சிலைகள் மிகவும் கலை நயத்துடன் அலங்கரிக்கப்பட்டு உள்ளன. 

மஹாலக்ஷ்மி கோயிலின் வரலாறு மிகவும் ஆச்சரியமாக இருந்தது. 

பிரிட்டிஷ் ஆட்சியின் போது, மஹாலட்சுமி பகுதியை வோர்லியுடன் இணைக்க ப்ரீச் கேன்டி சாலையை அமைக்கும் பணி நடைபெற்ற போது பணிகளை முடிக்க முடியாத வகையில் அரபிக் கடலில் அலைகள் எழும்பின. 

 பணியை முடிக்க முடியாமல் போன சமயத்தில்  வேலையை எடுத்திருந்த ஒப்பந்ததாரர் ராம்ஜி சிவாஜியின் கனவில் தோன்றிய மஹாலக்ஷ்மி, அரபிக் கடலில் மூழ்கியிருக்கும் கடவுள் சிலைகளை எடுத்து கோயில் கட்டி வழிபடுமாறு கூறினார்.

 மஹாலக்ஷ்மி கோயிலை கட்டி  சிலைகளை வைத்து வழிபாடு செய்த. பிறகு கடல் அலைகளின் சீற்றம் குறைந்து ப்ரீச் கான்டி சாலை அமைக்கப்பட்டது என்கிறது வரலாறு.

ஆர்ப்பாட்டமான அரபிக்கடலின் பிண்ணனி மனதை மயக்கியது. 

மஹாலக்ஷ்மியின் அருள் பொங்கும் செல்வப்பார்வையில் மும்பை நகரம் செல்வச்செழிப்பில் திகழ்கிறது. 

கோயி‌லி‌ல் மஹாலக்ஷ்மி, மஹாகா‌ளி, மஹாசரஸ்வதியின்அருளும் நிறைந்துள்ளன. 

மூ‌ன்று திருவுருவங்களும் ஒ‌ன்று போல மூக்குத்தி, தங்க வளையல்கள், முத்து கழுத்தணிகள் அணிந்து  கோயிலின் ஆன்மீகத் தன்மையைக் கூட்டும் வகையில் உள்ளன. 

உண்மையான பக்தியுடன் வரும் பக்தர்களின் அனைத்து கோரிக்கைகளும் நிறைவேறுகிறது என்று நம்பப்படுகிறது.

கோயிலில் எப்போதும் கடவுளை தரிசிக்க நூற்றுக்கணக்கான பக்தர்கள் 
 வரிசையில் காத்திருந்து மஹாலக்ஷ்மியிடம் தங்களது கோரிக்கைகளைச் சொல்லி கடவுளின் ஆசி பெற்று திரும்புகின்றனர்.

கோவிலைச்சுற்றிப் பறந்தும் நடந்தும் கொள்ளை அழகாய் புறாகள் கருத்தைக்கவர்கின்றன.

இந்தியாவின் வணிக நகரமான மும்பை அனைத்து நகரங்களில் இருந்தும் சாலை, ரயில், விமான மார்கமாக இணைக்கப்பட்டுள்ளது. 

நாங்கள் சுற்றுப்பயணங்களின் சென்று திரும்பிய சில காலங்களில் மும்பை, டெல்லி நேபாளப்பகுதிகளில் அசம்பாவிதங்கள் நிகழ்ந்தது. அங்கே நினைவுச்சின்னங்களாக வாங்கிய பொருட்களைப் பார்க்கும் போதெல்லாம்மனதில் திகில் பரவுவதைத் தவிர்க்க முடிவதில்லை.