முந்தி முந்தி விநாயகரே !!

முந்தி முந்தி விநாயகரே! வந்து வந்தெம்மைக் கண் பாருமே!

முப்பத்து முக்கோடித் தேவர்களே! முப்பத்து முக்கோடித் தேவர்களே!

எப்போதும் உம் துணை வேண்டுமைய்யா!

முந்தி முந்தி விநாயகரே முக்கணனார் தன்மகனே

கந்தருக்கு முன்பிறந்த கற்பகமே முன்னடவாய்

விநாயகரை வணங்குபவர்கள் எதையும் முந்திச்செய்யும் ஆற்றல் பெறுவர். 

"முந்தி முந்தி விநாயகனே' என்று பாடுவது கூட இதனால் தான்! 

ஒரு செயலை செய்ய முடிவெடுத்தால், அது அதிவிரைவில் முடிய வேண்டும் என ஆசைப்படுகிறோம். 

கோவை, புலியகுளத்தில் வீற்றிருந்து அருள்பாலிக்கும் முந்தி விநாயகர் ஆசியாவிலேயே மிகப் பெரியவர் ..

ஒரே கல்லால் 19' 10'' அடி உயரமும் 11' 10'' அடி அகலமும் 190 டன் எடையும் கொண்ட வலம்புரி விநாயகர் 
வலப்புறம் ஆண் தோற்றமும், இடப்புறம் பெண் தோற்றமும் கொண்ட அதிசயம் ...

ஏழு நிலை ராஜகோபுரமும், கற்கோவிலுமாக எழிலுற வீற்றிருக்கும் மூலவர் முந்தி விநாயகர்  19 அடி உயரத்தில் 190 டன் எடை கொண்டவர்.  

மாதம் தோறும் சங்கடஹர சதுர்த்தி விழா சிறப்பு. சித்திரை முதல் நாள் 10 டன் பழங்களைக் கொண்டு விநாயகருக்கு மாலை அணிவித்து அலங்கார பூஜை  நடைபெறுகிறது.


ஆசிய அளவில் பெரிதான புலியகுளம் விநாயகருக்கு,  68 கிலோ எடை கொண்ட பிரமாண்ட லட்டு படைக்கப்பட்டு லட்டு பக்தர்களுக்கு பிரசாதமாக வழங்கப்படுகிறது.

கோவை ரேஸ் கோர்ஸில் 108 விநாயகர் சிலைகள் .  5 அடுக்குகளாக பிரதிஷ்டை செய்யப்பட்டுள்ளதால் பிரதட்சணம் செய்வதற்கு வசதியாக இருக்கிறது.

செல்வ விநாயகர் சந்நிதியை ஒட்டி ஸ்ரீ சக்கர வடிவத்தில் 108 விநாயகர் சிலைகள் அமைந்துள்ளன. இவை அனைத்தும் 108 நாம வழிப்படி பிரதிஷ்டை செய்யப்பட்டுள்ளன. 108 விநாயகர்களும் உருவத்தில் வேறுபாடு உடையவர்களாக இருப்பது சிறப்பு.

விநாயக சதுர்த்தியன்று சிறப்பு வழிபாடாக ரேஸ்கோர்ஸ், தாமஸ் பார்க் அருகில் உள்ள 108 பிள்ளையார் கோவிலில் உள்ள 108 பிள்ளையாருக்கு, கணபதி ஹோமமும், சிறப்பு அபிஷேகமும் ,. ஒவ்வொரு பிள்ளையாருக்கும் செவ்வந்தி பூ மாலை, வெள்ளெருக்குமாலை அணிவிக்கப்பட்டு 108 தேங்காய் உடைக்கப்பட்டு, 216 வாழைப்பழங்கள்  சுவாமிக்கு படைக்கப்படுவது கண்கொள்ளாக்காட்சி...