பயணங்கள் முடிவதில்லை..தொடர்கின்றன..

ஆண்டின் இறுதி நாளான டிசம்பர்  மாதம் 31 ஆம் தேதி ரயிலில் ஏறி அமர்ந்ததும் - தன் பயணத்தை நிறைவு செய்து அடுத்த பிளாட்பாரத்திலிருந்து உறவினர் குடும்பம் வந்து இறங்கி எங்களுக்கு புத்தாண்டு வாழ்த்துகள் கூறினார்கள்..
மற்றொரு உறவினர் குடும்பமும் வந்து பயணத்தில் என்னுடன் கலந்துகொள்ள - ஒட்டுமொத்த குடும்பத்தினரும் அன்று ரயில்வே ஸ்டேஷனில் எதிர்பாராமல் சந்தித்துக்கொண்டு வாழ்த்துகள் கூறிக்கொண்டோம் ..!

 திரு ..வேளுக்குடி கிருஷ்ணன் அவர்கள் வேக வேகமாக 
கடந்து சென்று கொண்டிருந்தார் ..
ஆன்மீக பயணமாக இருக்கும்  என்று நினைத்துக்கொண்டோம் ..

இந்த மாதிரி ஆன்மீக குழுக்களுடன் இணைந்து பயணம் செய்தால் பயணநேரம் இனிமையாக இருக்கும் ..நாங்கள் எங்கள் குழுவினருடன் செல்லும் போது கம்பார்ட்மெண்ட் முழுவதும்  நம் குழுவினரே இருப்பதால் விஷ்ணு சகஸ்ரநாமம் , பாடல்கள் என்று உற்சாகமாக பயணம் செய்வது மகிழ்ச்சியாக இருக்கும் ..!

ரயில் ஈரோடு அடைந்த போது சரியாக இரவு 12 மணி ..சுற்றிலும்
விண்ணில் பட்டாசுகள்  வெடித்து வர்ணஜாலம் காட்டி புத்தாண்டு
பிறந்ததை கட்டியம் கூறியது

கோவை திரும்பும் போது அழகான பெண்குழந்தை ஒன்று தாத்தா மடியில் தலையும் பாட்டி மடியில் காலும் வைத்து படுத்துக்கொண்டு ஒரு நோட்டில் படங்களை வரைந்து , வண்ணங்கள் தீட்டி தன் தாயிடம் காட்டி மகிழ்ந்துகொண்டிருந்தது ..
வெளிச்சக்கீற்றுகள் - ரோஷ்ணி நினைவுக்கு வந்தது ..!

தாத்தாவும் பாட்டியும் அடிக்கடி பேத்தியை  கொஞ்சிக்கொண்டார்கள்..

ரயிலில் விற்பனைக்கு வந்த குழந்தைகளுக்கான வர்ணம் தீட்டும் புத்தகங்கள் , பேனாக்கள் , கலர்பென்சில்கள் , எழுது பலகை , பர்ஸ் , பொம்மை , சாப்பிட சிப்ஸ் , பானங்கள் என்று இடைவிடாமல் வருவதை எல்லாம் வாங்கித்த்ந்தார்கள்..

தாங்கள் ஷோரனூர் செல்லவேண்டுமென்றும் கோவையில் இறங்கி எந்த ரயிலில் ஏறவேண்டுமென்றும் டிக்கெட் பரிசோதிப்பவரிடம் விசாரித்தார்கள்..

ஷோரனூருக்கு சென்னையிலிருந்தே நேரடியாக ரயில் இந்த ரயில் கிளம்புவதற்கு சற்று முன் இருந்திருக்குமே அதில் சென்றிருக்கலாமே என்றார் டிடிஆர்..
அந்த ரயிலில் டிக்கெட் இல்லாததால் இதில் வந்ததாக சொன்னார்கள்..

டிடிஆர் நீங்கள் கோவையில் இறங்க வேண்டாம் - இந்த ரயில் மங்களூர் வரை செல்கிறது .நீங்கள் மங்களூர் சென்று இறங்கினால் உடனே ஷோரனூருக்கு அடுத்த பிளாட்பாரத்திலேயே ரயில் புறப்படும் அதில் பயணம் செய்யுங்கள்..என்று தகவல் தந்ததோடு கோவையில் தன் டியூட்டி முடிவதால் கோவையிலிருந்து மங்களூருக்கு தனியாக டிக்கெட் எடுக்கும்படியும் தகவல் தந்தார் ..

பக்கத்து பெட்டியில்  பயணம் செய்தவர்கள் பதிவர்கள் போல தெரிந்தது ..
பதிவுகள் பற்றி காரசாரமாக விவாதித்துக்கொண்டும் ,
ஜெயமோகன் அவர்கள் எழுதும் மகாபாரதக் கதையான வெண்முரசு பற்றியும் , நீவா நதி பற்றியும் சுவாரஸ்யமாக உரையாடிக்கொண்டு வந்தார்கள்..

புத்தக கண்காட்சி பற்றியும் , பதிவர் சந்திப்பு பற்றியும் 
மகிழ்ச்சியாக பேசிக்கொண்டு வந்தார்கள்..

பதிவுலகில் நான் மட்டும்தான் எந்த சக பதிவரையும்  
நேரில் பார்த்ததில்லை என்கிற மனக்குறை அகன்றது..!   

இந்த முறை ரயில் பயணத்தின் போது ரயில் வடகோவை வருவதற்கு கொஞ்சநேரம் முன்பிருந்தே கோவையிலிருந்தும் , கான்பரன்ஸ்கால் வந்துவிட்டது..

வடகோவை வந்துவிட்டதா என்று கேட்டார்கள்.. 
ஆம் வந்துவிட்டது என்றேன் .

அங்கே இறங்க்கூடாது என்று பதற்றத்துடன் உத்தரவு வந்தது..

அம்மா அந்த ரயில் மங்களூர் செல்லும் .. மங்களூர் நாம் ஏற்கெனவே தங்கி சில நாட்கள் சுற்றுப்பயணமாக கோவில்களுக்கெல்லாம் சென்ற ஊர்தான். 
ஆகவே சென்றமுறை போத்தனூர் வரை சென்றது போல் 
இந்த முறை மங்களூர் வரை சென்றுவிடாதீர்கள்..

அநேகமாக நாம் செல்லாத கோவிலோ ஊரோ எதுவும் 
இருந்தால் கூகிளில் தேடி கண்டுபிடித்து செல்லலாம் .. 
இப்போது கோவை ஜங்ஷனில் இறங்குங்கள்..செல்போனையும் ஆஃப் செய்யவேண்டாம் கோவையில் அப்பாவின்  செல்போன் எண்ணுடன் -.  
வந்து அழைத்துச்செல்லும் வரை தொடர்பிலேயே இருக்கவும் ..
என்று  முன் எச்சரிக்கையுடன் சொன்னார்கள்..!

சரி என்று சொல்லி  கோவை ஜங்ஷன் வந்ததும் பெட்டிகளை எடுத்துக்கொண்டு இறங்கினால் முதல் பிளாட்பாரத்திற்கு அடுத்த பக்கம் இருளாக இருந்தது..ஆட்களின் நடமாட்டமும் குறைவாக இருந்தது.. கோயமுத்தூரைக் காணோமே என்று  செல்போனில் கூறினேன்..

ஏற்கெனவே ஒருமுறை இந்தப்பக்கம் இறங்கி பிளாட்பாரத்தின் முடிவு வரை நடந்து சென்று பார்த்து வந்தது இப்போதுதான் நினைவுக்கு வந்தது..!

கோயமுத்தூரையே யாராவது தொலைத்துவிட்டு தேடுவார்களா ரொம்ப அழகுதான் .. நின்றுகொண்டிருக்கும் ரயிலில் ஏறி அடுத்தபக்கம் இறங்கவும்  என்று தகவல் தந்தார்கள்..மங்களூர் செல்லும் ரயில் புறப்பட தயாராக உள்ளதாக் ரயில் நிலைய அறிவுப்பு செல்போன் வழியாக கேட்கிறது எனவே எச்சரிக்கையாக ரயிலில் ஏறி இறங்கும்போது கவனமாக இருக்கவும் அறிவுறுத்தினார்கள்..! 

மங்களூர் புறப்படத்தயாராக இருந்த ரயிலில் ஏறி மறு பக்கம் இறங்கவும் ரயில் புறப்படவும் சரியாக இருந்தது..பிளாட்பார போர்ட்டர்கள், கடைகள் , பயணிகள் என்று சுறுசுறுப்பான இயக்கத்தைப் பார்த்ததும் சந்தோஷமாக இருந்தது..