மதுக்கரை தர்மலிங்கேஸ்வரர்

• காலை எழுந்தவுடன் படிப்பு என்று பழக்கப்பட்டிருந்த நான் இப்பொழுது
• காலை எழுந்தவுடன் பதிவு என்று வழக்கப்படுத்திக் கொண்டேன்.
• காலையில் நடைப் பயிற்சிக்கு என்னையும் அழைத்துச் செல்வார் என்கணவர்.
• ரேஸ்கோர்ஸ்,வனக்கல்லூரி, வ.உ.சி மைதானம் என்று கூட்டத்துடன் நடப்பது பிடிக்கவில்லை.
• குஜராத்தி சமாஜில் லாபிங் தெரபி என்று வெறுப்புடன் சிரித்துவிட்டு வருவேன்.
• சிரிக்கலாம் வாங்க என்று சில நிகழ்ச்சிகளுக்கும் சென்று அழுது திரும்புவோம்.
• காலையில் பால்காரர் வந்திருப்பாரா, பேப்பர்,வேலைக்காரி,போன் ஏதாவது வருகை தந்திருக்குமா,கல்லூரிக்கும்,பள்ளிக்கும் பிள்ளைகளை அனுப்பும் டென்ஷன்,சிறுவாணிதண்ணீர் பிடித்து வைக்கவேண்டிய அவசரம் என்று மனத்தில் ஆயிரம் நினைவுகளுடன் ,கூட்டத்துடன் நடைப்பயிற்சி எனக்கு பிடித்ததில்லை.
• ஏதாவது கிரிவலத்திற்கு அழைத்துச் செல்லுங்கள் அல்லது கோவிலில் எத்தனை முறை வேண்டுமானாலும் பிரதட்சிணம் வருகிறேன்.
• தம்பிக்குப் பெண் பார்த்த மாதிரியும் ஆயிற்று, கம்புக்குக் களை எடுத்தமாதிரியும் ஆச்சு
• அண்ணனுக்குப் பொண்ணு பார்த்த மாதிரியும்,ஆட்டுக்கு புல்லு பிடுங்கிய மாதிரியும் ஆச்சு  கோவிலுக்கு அழைத்துச் செலுங்கள் என்று வேண்டுகோள் விடுத்தேன்.
• சில முறை திருவண்ணாமலை கிரிவலம் சென்றோம். 
• சிவராத்திரியில் சிவன் கோவிலை வலம் வ்ருவோம்.
• ஒரு தைப்பூசத் திருநாளில் தர்மலிங்கேஸ்வரர் கோவிலுக்கு கிரிவலம் வரலாம் என்று சென்றிருந்தோம்.
• கோவையில் இருந்து 10 கி.மீ. தூரத்தில் பாலக்காடு மெயின் ரோட்டில் மதுக்கரை மரப்பாலம் அருகே மேற்கு பகுதியில் மலையின் மீது தர்மலிங்கேஸ்வரர் கோயில் அமைந்துள்ளது.

இங்கு சிவன் சுயம்பு மூர்த்தியாக அருள்பாலிக்கிறார்.

•  மலையின் மீது ஏறிச்செல்ல படிக்கட்டுகள் அமைந்துள்ளது. கோயிலின் அடிவாரத்தில் விநாயகர் கோயிலும், நவகிரக சன்னதியும் உள்ளது.

• நவகிரக சன்னதி அருகில் மும்மூர்த்தி மரம் என்ற மாமரம் இருக்கிறது. இந்த மரத்தில் மூன்று வகை சுவையுடைய மாங்கனிகள் காய்க்கிறது.

•  தலவிருட்சம் வில்வமரம். விநாயகர் கோயிலுக்கு பின்புறம் ஒருமண்டபமும், அதை அடுத்து மிகப்பழமையான புற்று ஒன்றும் உள்ளது. இந்த புற்றில் வயது முதிர்ந்த சர்ப்பம் இருப்பதாக இப்பகுதி மக்கள் கூறுகின்றனர்.

•  இதனருகே கடுமையான வறட்சி காலத்திலும்,வற்றாமல் நீர் சுரந்து கொண்டிருக்கும் கிணறு உள்ளது. இந்த கிணற்றிலிருந்து தான் மலைக்கு குழாய் மூலம் தண்ணீர் கொண்டு செல்லப்படுகிறது. மலைப்படிக்கட்டு வழியே நடந்து சென்றால் அரை மணி நேரத்தில் மலையின் உச்சியை அடைந்து விடலாம். 

• அங்கு அமைந்துள்ள கோயிலில் தான் தர்மலிங்கேஸ்வரர் சுயம்புலிங்கமாக அருள்பாலிக்கிறார். சுவாமியின் எதிர்புறத்தில் நந்தியும், வலப்புறத்தில் விநாயகரும், இடப்புறத்தில் முருகனும் அருள்பாலிக்கிறார்கள்.

•  இப்பகுதியில் வாழும் மலை வாழ் மக்கள் இவரை குலதெய்வமாக வழிபடுகிறார்கள். கார்த்திகை மாதத்தில் பக்கத்து கிராமங்களை சேர்ந்த பொதுமக்கள் முறை வைத்து 3 நாட்களுக்கு மலை மீது தீபம் ஏற்றுகின்றனர். 4 கி.மீ. தூரம் சுற்றுப்பாதை உள்ள இந்த மலையை பவுர்ணமி நாட்களில் திருவண்ணமாலைக்கு அடுத்தபடியாக பல்லாயிரக்கணக்கான பக்தர்கள் கிரிவலம் வருகிறார்கள்.

• மகாபாரதத்தில் பஞ்சபாண்டவர்கள் வனவாசம் செய்த போது இந்த மலையில் எழுந்தருளியுள்ள சுயம்புலிங்கத்தை தர்மர் வழிபட்டதாகவும், தர்மன் சிவ வழிபாடு செய்த போது, பீமன் மலையின் அடிவாரத்தில் இருந்து காத்ததாகவும் இக்கோயில் தல புராணம் கூறுகிறது. பீமன் காவல் காத்ததற்கு சான்றாக பீமனுக்கு தனி சிலை எழுப்பப்பட்டுள்ளது. இதை காவல் தெய்வமாக கருதி பக்தர்கள் வழிபாடு செய்கிறார்கள்.

தர்மர் வழிபட்டதால் நியாயம், தர்மம், வழக்குகளில் வெற்றி, மற்றும் நீதி வேண்டுபவர்கள் இங்கு வழிபாடுசெய்கிறார்கள்.

• நாங்கள் கிரிவலம் செல்ல முற்பட்ட போது அங்கிருந்தவர்கள் சிறுத்தை ஒன்று உலா வருவதாகவும், மலையைச் சுற்றி சில இடங்களில் பாதை சரியாக இருக்காது, பழக்கப்பட்டவர்கள் துணையில்லாமல் செல்வது சரியில்லை என்றும் தெரிவித்தார்கள். 
• மாலை ஆறுமணிக்குள் கிரிவலம் முடியுமாறு மதியமே வலம்வர ஆரம்பித்துவிட வேண்டுமாம்.
• நாங்கள் நேரம் கடந்துவிட்டதால் மலை ஏறி சுயம்பு தர்மலிங்கேஸ்வரரைத் தரிசிக்க சிவனே நீயே துணை என்று, விநாயகரைத் தியானித்தவாறே மலை ஏற ஆரம்பித்தோம். 

சில இடங்களில் படிகள் சரி இல்லாமல் பள்ளமும் மேடுமாக, பாறைகள் இடையில் இருந்தன. 

• சிரமப்பட்டு மலை ஏற தர்மலிங்கேஸ்வரர் தரிசனம் கிடைத்தது. தைப்பூச நிலவொளியில் அற்புதக் காட்சி. வைரமாலையாய் ஜொலிக்கும் நகரின் காட்சியும்,முழுநிலவின்  பாலாய் பொழியும் அமுத கிரணங்களும், கொட்டிக் கிடக்கும் வைரங்களாய் கண்சிமிட்டி மின்னும் நட்சத்திரங்களும், தவழும் மூலிகைக் காற்றும் ஏறிவந்த சிரமத்தை இல்லை என்று ஆக்கி, மகிழ்ச்சியளித்தன.
• நிலவொளியில் அபிஷேகிக்கப்பட்ட தர்மலிங்கேஸ்வரரை கற்பூர தீப ஆராதனையிலும் வில்வ அர்ச்சனையிலும் மனம் குளிர வணங்கினோம்.
• அமர்ந்து கண்மூடி தியானிக்க மனம் வரவில்லை. மேய்ச்சல் நிலத்தில் அசை போடுவதாவது -என்று கண் திறந்து அமர்ந்து தியானித்தோம்.
• இறங்கும் போது படிக்கட்டுகள் இல்லாத சில் இடங்களில் அமர்ந்து ,தவழ்ந்து என்று ஏறும் பொழுதைவிட  கடினப்பட்டு இறங்கினோம்.
• உள்ளூர் பிரமுகரின் தலைமையில் வேள்வி பூஜை நடைபெற்றுக் கொண்டிருந்தது. 
• அந்தப் பக்கம் எப்போது சென்றாலும் என் கணவர் காரை நிறுத்தி மகன்களிடம் சொல்வார் அதோ தெரிகிறதே அந்த மலையின் உச்சியில் நாங்கள் இருவரும் ஏறி தரிசனம் செய்தோம் என்று மேகங்களின் இடையில் தெரியும் கோவிலைக் காட்டுவார்.
• மகாலிங்கத்தின் மகத்தான தரிசனம் என்றும் மனதில் முகிழ்த்திருக்கும்.