இஷ்ட வரமருளும் ஈச்சனாரி விநாயகர்.

ஓம் கணபதி  ஓம் கணபதி ஓம் கணபதி...

ஈச்சனாரி ஐங்கரனே ஞானகணபதி

ஞானமுதல் நாயகனே ஈச்சனாரி மாயவனே

நாடிவந்தோம் அருள்புரிவாய் செல்வகணபதி

பாசமுள்ள  கணபதி ..ஈச்சனாரி கணபதி ..ஆவணியில் பூத்தவனே

நாத கணபதி கீத கணபதி ..வழிகாட்டும் மோனகணபதி

சங்கரனார் தேடி வரும் தருணகணபதி

வீர கணபதி ..விஜய கணபதி..பால கணபதி

சங்கடங்கள் தீர்த்து வைக்கும்  வகரதுண்ட நாயகனே 

ஓம் கணபதி.. ஓம கணபதி ஓம்.. கணபதி ஓம்..

ஈச்சனாரி சந்நிதியில் நான் நின்றேன்
எந்தன் இறைவா கணபதியே உன்னைக் கண்டேன்
என்னை ஆடவைத்து ஆடுகின்ற ஐங்கரனே
மேல கற்பகமே கண் மலராய் உன்னை பணிகின்றேன்

தந்தையாக வீற்றிருக்கும் தாயும் நீதானே என்னை
தாயுமாக அரவணைக்கும் தந்தை நீதானே

அனைத்து தெய்வங்களின் சக்திகளும் ஒன்றுசேர்ந்த அம்சமாக விளங்குகின்றவர் விநாயகரைச் சரணடைந்தால் இஷ்ட் வரங்களும் கஷ்டமின்றி அருளுவார்..!

முதலில் பிள்ளையார் சுழி போட்டுதான் எந்த 
காரியத்தையும் தொடங்குவது தொன்றுதொட்ட மரபு... .

ஞானமுதல்வனான வித்தக விநாயகப் பெருமான் சிறப்புடன் விளங்கும்   கோவையில் அமைந்திருக்கும் ஈச்சனாரி விநாயகர் கோவில் தனிச்சிறப்பு மிக்கது..!

மேலைச்சிதம்பரம் எனப் போற்றப்படுகின்ற பேரூர் பட்டீஸ்வரர் ஆலயத்தைக் கட்டிக்கொண்டிருந்த சமயத்தில், அந்தக் கோவிலுக்காக ஒரு விநாயகர் சிலை வடிக்க மதுரையிலுள்ள சிற்பக் கலைக்கூடத்தில் ஒப்பந்தம் செய்யப்பட்டது. அங்கு அழகுற வடிவமைத்த சிலையை மாட்டுவண்டி மூலம் பேரூருக்கு கொண்டுவர ஏற்பாடு செய்யப் பட்டது. அவ்வாறு வரும்போது கோவை எல்லையில் ஈச்சங்காடு என்ற இடத்தில் வண்டியின் அச்சு உடைந்துவிட்டது. எனவே விநாயகர் சிலையை இறக்கி மேடான பகுதியில் வைத்துவிட்டு வண்டியைப் பழுதுபார்த்தனர். பின்னர் விநாயகர் சிலையை எடுத்து வண்டியில் வைக்க எவ்வளவோ முயன்றும் அதை அசைக்கவே முடியவில்லை. 

அச்சமயம் யானை பிளிரும் சப்தத்துடன் ஒரு அசரீரி குரல், "நான் இங்கேயே இருக்கிறேன்' என்று ஒலித்தது. அதைக்கேட்டு அதிசயித்த பக்தர்கள் தங்கள் முயற்சியைக் கைவிட்டு விநாயகர் விருப்பப்படி- ஈசன் உத்தரவுப்படி அந்த இடத்திலேயே ஈச்சங்காட்டு விநாயகர் என்ற திருநாமத்துடன் சிறிய அளவில் கோவில் எழுப்பினர். 

அதன்பின் ராஜகோபுரம், உள்சுற்று மண்டபம், வெளிச்சுற்று மண்டபம், யாகசாலை மண்டபம், மகாமண்டபம் என எழிலுடன் வடிவமைத்து 
1977-ல் சிறப்பாக கும்பா பிஷேகம் செய்தனர். 

ஈச்சங்காட்டு விநாயகர் என்ற பெயர் மருவி ஈச்சனாரி விநாயகர் என்ற சிறப்பு டன் விளங்குகிறது ஆலயம். 

 சங்கடஹர சதுர்த்தியில்  விநாயகரை வழிபட்டால் இழந்ததைத் திரும்பப் பெறலாம் என்னும் நம்பிக்கை  உள்ளது.

அஸ்வினி முதலான ஒவ்வொரு நட்சத்திர நாளிலும், அந்த நட்சத்திரப் பெயரில் இந்த விநாயகருக்கு சிறப்பு அலங்காரம் செய்யப் படுகிறது.

அஸ்வினி- தங்கக் கிரீடம், அறுகம்புல் அலங்காரம்.

பரணி- அறுகம்புல் மாலை.

கார்த்திகை- வெள்ளிக்கவச அலங்காரம்.

ரோகிணி- சந்தன அலங்காரம்.

மிருகசீரிடம்- கஸ்தூரி மஞ்சள் அலங்காரம்.

திருவாதிரை- நிறைமணி (காய்கறி) அலங்காரம்.

புனர்பூசம்- தாமரைப் பூமாலை.

பூசம்- தங்கக் கிரீடம், மாலை அலங்காரம்.

ஆயில்யம்- பச்சிலை அலங்காரம்.

மகம்- திருநீறு அலங்காரம்.

பூரம்-  அன்னம், கஸ்தூரி மஞ்சள் அலங்காரம்.

உத்திரம்- பழ அலங்காரம்.

ஹஸ்தம்- வஸ்திர அலங்காரம்.

சித்திரை- தங்கக் கிரீடம், வெள்ளிக்கவச அலங்காரம்.

சுவாதி- தங்கக் கவசம், அன்ன அலங்காரம்.

விசாகம்- தங்கக் கிரீடம், ரோஜா மாலை.

அனுஷம்- தங்கக் கிரீடம், வெள்ளிக்கவசம், அறுகம்புல் அலங்காரம்.

கேட்டை- வெள்ளிக் கவசம், குங்கும அலங்காரம்.

மூலம்- வெற்றிலை அலங்காரம்.

பூராடம்- சம்பங்கி மாலை அலங்காரம்.

உத்திராடம்- சுவர்ண அலங்காரம்.

திருவோணம்- மலர் அலங்காரம்.

அவிட்டம்- குங்கும அலங்காரம்.

சதயம்- அன்ன அலங்காரம்.

பூரட்டாதி- தங்கக் கவசம், ரோஜா மாலை அலங்காரம்.

உத்திரட்டாதி- தங்கக் கவச அலங்காரம்.

ரேவதி- வெண்ணெய் அலங்காரம்.

அவரவர் நட்சத்திர நாளில் ஈச்சனாரியில் வழிபடுவது 

கூடுதல் சிறப்பாகும்.

அதிகாலை 5.00 மணி முதல் இரவு 10.00 மணி வரை தொடர்ந்து  தரிசிக்கும் வண்ணம் திறந்திருக்கும் ஆலயம்.

அனுதினமும் பிரம்மமுகூர்த்த வேளையில் கணபதி ஹோமம் நடக்கும். 

ஆறுகால பூஜைகளுடன் அபிஷேகம், அர்ச்சனைகள் சிறப்புற நடக்கும்.

அனுதினமும் மதியம் அன்னதானம் நடக்கும்.

வெள்ளிக்கிழமையன்று வாகன பூஜைகள் விமரிசையாக நடக்கும்.

கோவை நகர மக்கள் புதிய வாகனம் வாங்கினால் பதிவெண்ணை வாகனத்தில் எழுதுவதற்குமுன் விநாயகரிடம் சமர்ப்பித்த பின்தான் (அதாவது ஈச்சனாரியில் வருகைப் பதிவு செய்தபின்தான்) மற்ற செயல்களில் ஈடுபடுவதை வழக்கமாய்க் கொண்டுள்ளனர். வாகன பூஜைக்கு பெயர்பெற்ற ஆலயம்.

தினமும் மாலை 6.30 மணியளவில் கட்டளைதாரர்கள் அடிப்படையில் விநாயகர் தங்கத் தேரில் பவனி வந்து அருள்புரிவார்.

அம்மையப்பன் அம்சமாக (அர்த்தநாரி) இங்கு விநாயகர் அருள்புரிகிறார்.
உமையொரு பாகம் கொண்ட ஈசனின் ஒருங்கிணைந்த வடிவமுடைய ஈச்சனாரி விநாயகரை விநாயகர் சதுர்த்தியன்று வழிபடுவது கிடைத்தற்கரிய பெரும் பேறாகும்..!

அன்பே சிவம் என்பதற்கேற்ப,  திருக்கோவிலில் அனைவரும் 
இன்முகத்துடன் உபசரிக்கும் தன்மையை  காணலாம். 

குடும்பப் பிரச்சினைகளை நினைத்து வருபவர்கள் ஈச்சனாரி விநாயகரை தரிசித்தபின் சுமைகளை இறக்கி சுகமாக வீட்டுக்குச் செல்வர் 

தட்டு காணிக்கைகளை தனி உண்டியலில் போட்டு, 
சதவிகித அடிப்படையில் பகிர்ந்துகொள்கின்ற பண்பு 
வேறெங்குமில்லாத சிறப் பம்சம்.

ஜாதகம் இல்லாதவர்கள் தமிழ் வருடப்பிறப்பு, தமிழ் மாதப் பிறப்பு, சங்கடஹர சதுர்த்தி, விநாயகர் சதுர்த்தி போன்ற நாட்களில் தரிசனம் செய்தால் பன்மடங்கு பலன் உண்டாகும்.

 சிறப்புமிகு ஈச்சனாரி ஆலயம் கோவை- பொள்ளாச்சி நெடுஞ்சாலையில், கோவையிலிருந்து பத்து கிலோமீட்டர் தொலைவில் உள்ளது.!

தொடர்புடைய பதிவுகள்...

ஈஸ்வர மைந்தர் ஈச்சனாரி விநாயகர்

இன்பவாழ்வளிக்கும் ஈச்சனாரி விநாயகர்