பக்தருக்கருளும் ஸ்ரீ பஞ்சமுக ஆஞ்சநேயர்

அஸாத்ய ஸாதக ஸ்வாமிந்
அஸாத்யம் தவ கிம் வதா
ராம து‘த கிருபாஸிந்தோ
மத் கார்யம் ஸாதய ப்ரபோ


அசாத்யமான செயல்களையும் சாத்தியமாக்கும் அருளைத்தருபவர் ஆஞ்சநேயர்.

கோவையில் இருந்து மருதமலை செல்லும் வழியில் நவாவூர் பிரிவில் இருக்கும் ஸ்ரீராம்நகரில் மிகவும் பிரசித்தி பெற்ற ஸ்ரீ பஞ்சமுக ஆஞ்சநேயர்  கோவில் உள்ளது.

இந்த கோவிலில் கம்பீரமாக காட்சியளிக்கும் பஞ்சமுக ஆஞ்சநேயர் வேண்டுவோருக்கு வேண்டும் வரம் தந்து அருள் பாலிக்கிறார்.

பக்த ஆஞ்சநேயர் பஞ்சமுக ஆஞ்சநேயராக அவதாரம் எடுத்தது ஏன்?

பஞ்ச பூதங்கள் கொண்ட இந்த உலகில் காக்கும் தொழிலை செய்பவர்
பகவான்  நாராயணன்.

அவரது கையில் உள்ள சுதர்சன சக்கரத்தை அபகரிக்க முயன்றான்
மயில் ராவணன்.

 

அவன் எண்ணிய படியே அபகரித்தும் சென்று விட்டான்.

அதை எப்படியாவது மீட்டு விட வேண்டும் என்று களத்தில் இறங்கினார் ஆஞ்சநேயர்.

நேர்மைக்கு பெயர் போன ஆஞ்சநேயருடன் எதிரில் நின்று
போர் புரிந்து யாராலும் வெற்றி காண முடியாது.

 
 சகல சக்திகளிலும் உருமாறும் நிலையில் உள்ள மயில் ராவணனாலும் ஆஞ்சநேயரை போரில் எதிர்கொள்ள முடியவில்லை. 

எனவே பல உருவங்களாக மாறி ஆஞ்சநேயரை தாக்கிய 
தாக்குதலை அனுமனால் எதிர்கொள்ள முடிய வில்லை.

இதை அறிந்த  நாராயணன் ஆஞ்சநேயரை அழைத்து உபதேசித்தார். மயில்ராவணன் சகல சக்திகளாக உருமாறும் நிலையை கொண்டவன். அவனை உன்னால் மட்டும் எதிர் கொண்டு வெற்றியடைய முடியாது. ஆதலால் அவன் பறவையாக மாறினால் அதை எதிர் கொள்ள நீ கருடனாகவும், மிருகமாக மாறினால் மிருகமாகவும் அவதாரம் எடுக்க வேண்டும்.

மயில் ராவணன் பூமிக்கு அடியிலோ, கடலுக்கு அடியிலோ மறைந்து  தாக்கினால் அதனை துச்சமாக மதித்து தாக்க வராக மூர்த்தியாக அவதரிக்க வேண்டும். 

சமயோசிதமாக யோசித்து செயல்பட ஹயக்ரீவர் அவதாரத்தையும் உனக்கு தாரை வார்த்து கொடுக்கிறேன்.

 

இந்த 4 சக்திகளோடு உன் பலத்தையும் கொண்டு மயில் ராவணனை நீ வெல்வாய் என்று சொல்லி கருடன், நரசிம்மர், வராகமூர்த்தி, ஹயக்கிரிவர் ஆகிய தனது 4 அவதார சக்திகளை வழங்கினார்.

மறுகனமே ஆஞ்சநேயர்  பஞ்சமுக ஆஞ்சநேயராக உருவெடுத்தார்.

இந்த அவதாரத்தை கண்ட பார்வதி பத்மத்தையும், பரமேஸ்வரன் நெற்றிக்கண்ணையும், கருடன் தனது இறக்கைகளையும், ராமன் தனது வில் மற்றும் அம்பையும், சரஸ்வதி தனது ஸ்படிக மாலையையும், லட்சுமி தனது சக்திகளையும், மற்ற தெய்வங்கள் தங்கள் சக்திகளையும், ஆயுதமாக வழங்கினார்கள்.

ஸ்ரீ பஞ்சமுக ஆஞ்சநேயர் இந்த சக்தியையும், ஆயுதங்களையும் கையில் ஏந்தி மயில் ராவணனை எதிர்கொண்டு வெற்றி பெற்று ஸ்ரீ சுதர்சன சக்கரத்தை மீட்டு பகவான் நாராயணன் பாதக் கமலங்களில் சமர்ப்பித்து தலை வணங்கினார்.என்பது பஞ்சமுக ஆஞ்சநேயரின் ஆன்மீக வரலாறு. 

மருதலை ரோடு நவாவூர் பிரிவு ஸ்ரீராம் நகரில் குடிகொண்டுள்ள பஞ்சமுக ஆஞ்சநேயரை வணங்கினால் சகல தெய்வங்களையும் வணங்கி அருள்பெற்ற பலன் கிடைக்கும்.

ஆஞ்சநேயரை வணங்கினால் தோஷம், தடை, சத்ரு இல்லாமல்
இருந்தால் மட்டும் காரியசித்தி அருளுவார்.

ஆனால் பஞ்சமுக ஆஞ்சநேயரோ தடை, சத்ரு, தோஷம் இருந்தாலும் அதையெல்லாம் முறியடித்து காரியசித்தி அருளுவார்.     

கோவில் பூஜை முறை - தினமும் காலை 7 மணிக்கு கோவில் நடை திறக்கப்பட்டு பூஜை நடைபெறுகிறது.

 மதியம் 12 மணி வரை நடை திறந்திருக்கும். பின்னர் நடை சாத்தப்பட்டு மாலை 5 மணிக்கு மீண்டும் நடை திறக்கப்படுகிறது. இரவு 8 மணிக்கு நடை சாத்தப்படும் வரை பக்தர்கள் வந்து ஆஞ்சநேயரை வழிபட்டு செல்கிறார்கள். சனிக்கிழமை ஆஞ்ச நேயருக்கு உகந்த நாள் என்பதால் அன்று கோவிலில் கூட்டம் அலைமோதுகிறது.

அன்று பக்தர்கள் பஞ்சமுக ஆஞ்சநேயருக்கு துளசி மாலை அணிவித்து வழிபடுகிறார்கள்.

பக்தர்கள் நெய் விளக்கு ஏற்றி மனமுருக அனுமனை வேண்டுகிறார்கள். வேண்டுதல் நிறைவேறியவர்கள் வெற்றிலை மாலை அணிவித்தும், வெண்ணை சாத்தியும் வழி படுகிறார்கள்.  வடை மாலை அலங்காரம் செய்து மகிழ்கிறார்கள்.

சந்தனம் மற்றும் செந்தூர அலங்காரத்திலும் ஆஞ்சநேயர் அருள் பாலிப்பது கண் கொள்ளா காட்சியாகும்.

பஞ்சமுக ஆஞ்சநேயர் மூல நட்சத்திரத்தில் அவதரித்தவர். எனவே மூல நட்சத்திரத்தன்று ஆஞ்சநேயருக்கு சிறப்பு அபிஷேக ஆராதனைகள் நடைபெறும்.

 பசியாற அன்ன தானம் வழங்கப்படுகிறது.. புரட்டாசி 3-வது சனிக்கிழமை பஞ்சமுக ஆஞ்சநேயருக்கு மிகவும் சிறப்பான நாளாகும்.

அன்று 10 ஆயிரத்து 8 வடை மாலை அவருக்கு சாத்தப்படுகிறது. இந்த அலங்காரத்தில் ஆஞ்சநேயர் அழகுற ஜொலிப்பதை தரிசிக்க திரளான பக்தர்கள் வருவார்கள்.

தீபாவளியன்று காசியில் அன்னபூரணிக்கு லட்டுத்தேர் போல சென்னை அனுமனுக்கு வடைமாலை(1,00,008) தேர். 
வடைமாலை அலங்காரம் 

தேரின் ஒரு பக்க அழகும்  பின்னழகும்...

விழுப்புரத்திற்கு அருகில் ஒரு ஆஞ்சனேயர் கோவிலில் 
ஆடி மாதம் திருக்கல்யாணம் நடைபெறுகின்றது

 பிரம்மச்சரியம் சற்றும் பிசகாத ஆஞ்சநேயர்-- ராம அவதாரம் எடுத்த மகாவிஷ்ணுவிற்கு உதவுவதற்காக, மகேஸ்வரனின் அம்சமாகப் பிறந்தவர் வாயு புத்திரனான அனுமன்.

கேசரி - அஞ்சனை தம்பதியருக்கு வாயுபகவான் வரம்தர, அவர்களது மகனாக சிவனின் அம்சமாகப் பிறந்தார்  ஆஞ்சநேயர்.

ராமராவண யுத்தத்தின்போது, ராவணனுக்கு உதவ வந்தவன்,  அவனது உற்ற நண்பனான மயில்ராவணன். மாயைகளில் வல்லவனான அவன், விபீஷணன் போல் வடிவமெடுத்து, ராம - லக்ஷ்மணரை தன் இருப்பிடமான பாதாள உலகிற்கு கடத்திக் கொண்டு போனான்.

ராம-லக்ஷ்மணரை மீட்டுக் கொண்டு வருவதற்காக பாதாள உலகிற்குப் போனார் அனுமன்.

மயில் ராவணனின் அரண்மனையைக் கண்டுபிடித்து, அதனுள் நுழைய முயன்றார். அப்போது அவரைத் தடுத்தான் ஓர் இளைஞன். தன்னை வென்றாலே அரண்மனைக்குள் நுழைய முடியும் என்று சொல்லி எதிர்த்தான். 

விளையாட்டாய் அவனை வென்றுவிடலாம் என்று நினைத்தார் அனுமன். ஆனால் அவனோ, கொஞ்சமும் சோர்வின்றி அவரோடு போரிட்டான்.

முடிவே இன்றி சண்டை நீண்டுகொண்டே போக, சற்றே நிறுத்திவிட்டு, இவ்வளவு வீரத்தோடு சண்டையிடும் இளைஞனே, நீர் யார் ? உன் பெற்றோர் யார் ? கேட்டார் அனுமன்.

அவன் சொன்ன பதில், அனுமனையே அதிரச் செய்தது.

வல்லமை மிக்க வானர வீரரான அனுமனுக்கும், சுவர்ச்சலா தேவிக்கும் பிறந்தவன் நான். மகரத்துவஜன் என் பெயர். கம்பீரமாகச் சொன்னான், இளைஞன்.

திடுக்கிட்டுப் போன அனுமன், தான் யார் என்பதை அவனுக்குச் சொன்னார். பிரம்மச்சரியத்தைக் கடைபிடிக்கும் தனக்கு அவன் எப்படிப் பிள்ளையாவான் ? என்று கோபத்தோடு கேட்டார்.

அப்போது, அங்கே வந்தாள் சுவர்ச்சலாதேவி. அனுமனைப் பணிந்தாள். பராக்ரமம் மிக்கவரே.... தாங்கள் பிரம்மச்சரியம் பிசகாமல் வாழ்பவர் என்பது உண்மைதான். அதேசமயத்தில், இவன் உங்கள் மகன் என்பதும் உண்மைதான். சீதாபிராட்டியைத் தேடி தாங்கள் இலங்கைக்குச் சென்றபோது, உங்கள் வாலில் தீ மூட்டப்பட்டதல்லவா? அத்தீயால் இலங்கையை எரித்துவிட்டு, கடலிலே உங்கள் வாலை நனைத்து தீயை அணைத்தீர்கள். 

அப்போது, உங்கள் வியர்வை, கடலில் விழுந்தது.

மகரமீன் வடிவில் கடலில் நீந்திக் கொண்டிருந்த நான், அந்த வியர்வையை விழுங்கினேன். அதன் விளைவாக என் கருவில் உருவாகிப் பிறந்தவன் இவன். நம் மகன் !

ஆச்சர்யத்தோடு ஆஞ்சநேயர் கேட்டுக் கொண்டிருக்க, தொடர்ந்த சுவர்ச்சலாதேவி, மயில்ராவணன் மாயையால் மயக்கி மகரத்துவஜனை அடிமைப்படுத்தி வைத்திருப்பதையும் சொன்னாள். 

பிரம்மச்சரிய விரதம் கெடாமலே தனக்கு ஒரு மகன் பிறந்திருப்பதை அறிந்து மகிழ்ந்தார் மாருதி.

பின் மயில்ராவணனின் மாளிகைக்குள் நுழைந்து மாயைகளை அழித்து அவன் மரணத்துக்கும் வழிவகுத்தார்.

ராமரின் ஆசியோடு தன் மகனை பாதாள உலகிற்கு மன்னனாக்கினார். 

பிள்ளையாரும் முருகனும் எப்படி சிவசக்தியின் நேரடி ஐக்கியமில்லாமல் பிறந்தார்களோ, அப்படியே சிவனின் அம்சமான அனுமனுக்கும், அம்பிகையின் அம்சமான சுவர்ச்சலாதேவிக்கும் பிறந்தவன், மகரத்வஜன்.

வாழ்த்தலாம் வாங்க....


http://moonramkonam.com/2011/07/moonramkonam-poem-and-journey-essay-contest-results/#comment-782

மூன்றாம்கோணம் – கவிதை, கட்டுரைப் போட்டி முடிவுகள்

--1. முதல் பரிசு -ரூபாய் ஆயிரம் பெறும் பயணக் கட்டுரை

-ராஜராஜேஸ்வரியின் “கொள்ளைகொள்ளும் கொல்லி மலைச் சாரல்”

ராஜராஜேஸ்வரி அவர்களின் இன்னொரு கட்டுரை, “வியத்தகு விமான நிலையங்களும்” மிகச்சிறப்பான முறையில் எழுதப்பட்டிருந்தது..படங்களும் அருமை..பாராட்டுக்கள்

பரிசுகள் அனுப்பப்படும் விவரங்கள் வெற்றி பெற்றவர்களுக்கு மெயிலில் அனுப்பப்படும் !

இந்த போட்டிகளில் கலந்து கொண்ட அனைவருக்கும் எங்கள் நன்றிகள் பல! அவர்கள் கலந்து கொண்டமையைப் பாராட்டி கலந்து கொண்ட அனைவருக்கும் ஒரு இ-புக் அனுப்பபடும்!

வாழ்க நற்றமிழ் ! வளர்க அதன் புகழ் !

கவிதைப் போட்டியில் முதல் பரிசு பெற்ற சாகம்பரி அவர்களுக்கு 
மனம் நிறைந்த வாழ்த்துக்கள் . பாராட்டுக்கள்.