அனுகூலங்கள் அருளும் அனுமன்

ஆபதாம் அபஹர் தாரம் தாதாரம் ஸர்வஸத்பதாம்
லோகாபிராமம் ஸ்ரீராமம் பூயோ பூயோ நமாம்யஹம்


ஆர்த்தானம் ஆர்த்தி ஹந்தாரம் பீதானம் பீதி நாசனம்
த்விஷதாம் கால தண்டம் தம் ராமசந்த்ரம் நாமாம்யஹம்.'

ராமா என்று சொன்னால் எல்லா துன்பங்களும்விலகும்; 
இழந்தன கிட்டும்; எல்லாவகையான அனுகூலங்களும் கிடைக்கப் பெறும்;மனம் மகிழும்; நன்மைகள் ஏற்படும்; 
ஸ்ரீராமபிரானை எப்பொழுதும் வழிபடுகிறேன். 

வாழ்வில் ஏற்படும் துன்பங்களிலும் தாழ்வுகளிலும் மனம்கலங்காத பக்குவத்தையும் மனஉறுதியையும் தருபவரும், பயத்தைப் போக்குபவரும்;வல்லமை அளிப்பவரும், நம் எதிரிகளை நமக்கு முன்பாகச் சென்று அழித்துநம்மைக் காப்பவருவமான 
ஸ்ரீராமச்சந்திரனை நான் முழுமனதுடன் வணங்குகிறேன்'

அடிக்கடி சொன்னாலே அனைத்து நலன்களும் நம்மைத் தேடி வரும் சுலோகம்..


கைகேயி என்ற பெண் மான் கேட்ட வரத்தில் தசரதன் 
என்னும் சிங்கம் தளர்ந்து, உயிர் நீங்கியது. 

சீதாபிராட்டி கேட்ட பொன் மானைத் தொடர்ந்து ராமபிரான் என்ற சிங்கக் குருளை சென்றதால் ராவண சம்ஹாரத்துக்கு "பிள்ளையார் சுழி' போடப்பட்டது.

ராம பட்டாபிஷேகத்துடன் மங்கள நிறைவு காண்கிறது ராமாயணம்.
 

தமிழகத்தில் நாகையநல்லூர் என்னும் திருத்தலத்தில் கொண்டாடப்படும் கோலாகல ஸ்ரீராமநவமி உற்சவம் சற்று வித்தியாசமானது.

நாகையநல்லூர் திருத்தலத்தில் அக்ரஹாரம் தெருவில் உள்ள
ஸ்ரீராமர் கோயிலில் நடைபெறும் விழாவில் ஏராளமான
பக்தர்கள் கலந்து கொள்கிறார்கள்

நாகையநல்லூரில் ஸ்ரீராம நவமி உற்சவம் முன்னிட்டு தினமும் உபன்யாசம், நடிப்புடன் கூடிய கதா காலட்சேபம் ஆகியவை சிறப்புற நடைபெறும்.

இந்த விழாவின் கடைசி நாளன்று சீதாராம திருக்கல்யாணம் நடைபெறும். அன்று அங்கு வரும் பக்தர்களுக்குத் திருமண விருந்து அளிக்கப்படும்.

.

ஸ்ரீசீதாராம திருமண வைபவத்திற்குப் பின் பக்தர்களுக்கு விருந்தளிக்கும் நிகழ்ச்சி சிறப்பானது.
இந்த விருந்தில் கலந்து கொண்டாலே நம் பாவங்கள் 
நசிந்து புண்ணியம் சேரும் என்கிறார்கள்.

தார்சாலையில் அமைக்கப்பட்ட சுமார் 200 மீட்டர் நீளமும், 
ஐந்து மீட்டர் அகலமும் கொண்ட கீற்றுப் பந்தலின் கீழ், 
எவ்விதத் தரை விரிப்பும் இன்றி  பக்தர்கள் 
வரிசையாக அமர்ந்து கொள்வார்கள். 

அனைவருக்கும் தலைவாழை இலை போடப்படும். 

இனிப்புடன் பதினாறு வகைக் காய்கறிகளுடன் வடை, 
அப்பளம், பாயசம் என்று உணவு வழங்கப்படுகிறது. 

அத்துடன் விருந்து உண்ணும் பக்தர்களுக்கு 
ஒரு ரூபாய் தட்சணை வழங்குகிறார்கள். 

விருந்து சாப்பிட்டதும் இலையை மூடக்கூடாது. 
அனைவரும் சாப்பிட்டு எழுந்ததும் சிலர் தங்கள் வேண்டுதல்களை நிறைவேற்றுவதற்காக அந்த இலைகளின் மீது அங்கப்பிரதட்சணம் செய்கிறார்கள். 
சிலர் அந்த இலைகளைத் தலைமேல் வைத்து எடுத்துச் செல்கிறார்கள்.

இத்திருமண வைபவத்தில் ஸ்ரீஆஞ்சநேயருடன் முனிவர்கள், தேவர்கள் ஆகியோர் மானசீகமாக விருந்தில் கலந்து கொண்டு, அடியார்களோடு அடியார்களாகச் சாப்பிட்டிருப்பார்கள் என்பது நம்பிகை. 

அதனால் அவர்கள் சாப்பிட்ட இலைகளில், குறிப்பாக அனுமனும் சாப்பிட்டிருப்பதால் அந்த இலைகளில் அங்கப்பிரதட்சணம் செய்கிறார்கள். இதனால் ராமனின் திருவருள் எளிதில் கிட்டும் என்பது ஐதீகம்.

"ராமா' என்ற திருநாமத்தை யார் ஒருவர் பன்முறை ஜபிக்கிறார்களோ, அவர்களுக்கு சீதாபிராட்டி, லட்சுமணன், ஸ்ரீஆஞ்சநேயருடன் ஸ்ரீராமபிரான் காட்சி தருவார் என்பது ஆன்றோர் கூற்று.

ஒரு கோடி ராமநாமம் ஜபித்ததும்வைகுண்டத்திலிருக்கும் ஸ்ரீராமபிரானின் கோதண்டத்திலிருக்கும் மணி ஒலிஎழுப்புமாம். அந்த ஒலியைக் கேட்டதும் தன் பக்தருக்கு ஸ்ரீராமபிரான் காட்சிகொடுப்பாராம். 

திருச்சி சத்திரம் பேருந்து நிலையத்திலிருந்து முசிறி சென்று, அங்கிருந்து காட்டுப் புத்தூர் என்னும் ஊருக்குச் சென்றால் நாகையநல்லூர் செல்லலாம். நாமக்கல்லிருந்தும் காட்டுப்புத்தூர் சென்று நாகையநல்லூரை அடையலாம்.

பக்தரைப் காக்கும் பஞ்சமுக அனுமன்