சிந்தை மகிழும் சிவத்ரிசனம்

கொட்ட மேகமழுங் கொள்ளம் பூதூர்
நட்டம் ஆடிய நம்பனை யுள்கச்
செல்ல வுந்துக சிந்தை யார்தொழ
நல்கு மாறருள் நம்பனே.

திருஞான சம்பந்தர்  வரும் போது வழியில் உள்ள வெட்டாறில் வெள்ளம் ஏற்பட்டது.  சிவனை தரிசிக்காமல் செல்ல கூடாது என்பதில் தீவிரமாக இருந்தார் சம்பந்தர்.  ஆற்றின் கரையில் இருந்த ஓடம் ஒன்றை அவிழ்க்க செய்து அதன் மீது தன் அடியவர்களுடன் ஏறினார்.

சோழ நட்டில் பஞ்சத்தலங்கள் உள்ளன. திருக்கருகாவூர் எனப்படும் பாதிரி வனம், அவளி நல்லூர் என்ற முல்லை வனம், அரித்து வாரமங்கலம் என்னும் வன்னி வனம், ஆலங்குடி என்னும் புன்னை வனம், திருக்கொள்ளம்புதூர் என்னும் வில்வவனம் ஆகிய.. ஐந்து கோவில்களையும் இணைக்கும் ஒரு சம்பிரதாயம், அதிகாலை ஆரம்பித்து நடு இரவு வரையிலான ஐந்து வரிசையான அடுத்தடுத்த கால பூஜையில் கலந்து கொள்வதாகும்.
தல விருட்சம் வில்வம்

 திருக்கருகாவூரில் உஷத்கால பூஜை,
அவளி நல்லூரில் கால சந்தி,
அரித்துவார மங்கலத்தில் உச்சிகாலம்,
ஆலங்குடியில் சாயரட்சை என்று பூஜைகளில் கலந்து கொண்டுவிட்டு, திருக்கொள்ளம்புதூர் போய் அர்த்த சாம பூஜையில் கலந்துகொள்ள வேண்டும் அவர்.

தீபாவளி தின அமாவாசை இருள் சூழ்ந்த  பொழுதில்  அடியார்களுடன் புறப்பட்டு முள்ளி ஆற்றைக் கடப்பதற்காக வந்தார். கட்டுக்கடங்காத வேகத்துடனும் பெருத்த ஓசையுடனும் ஓடும் அந்த வெள்ளத்தைக் கண்டு , சம்பந்தர் கட்டப்பட்டிருந்த படகை அவிழ்த்து தாம் ஏறி உட்கார்ந்து சீடர்களையும் அழைத்தார்.

 வெள்ளத்தையும், திசையையும் அறிய முடியாத அமாவாசைக் கருமையையும் கண்டு பயந்து தடுமாற்றம் கொள்ள சம்பந்தர் தேவாரத் திருப்பதிகம் பாட ஈசனே படகுக்கு முன்னால் போய் வெள்ளத்தினூடே வழியமைத்துக் கொடுக்கவே  பாதுகாப்பாக அக்கரை போய்ச் சேர்ந்தனர்.

தமது நாவையே ஓடக்கோலாக கொண்டு, 
"கொட்டமே கமழும் கொள்ளம்பூதூர் 
நட்டமாடிய நம்பனை யுள்கச் செல்வுந்துக 
சிந்தை யார்தொழ நல்கு மாறரு ணம்பனே' எனும் திருப்பதிகம் பாடினார்.

இந்த ஓடத்திருவிழா ஆண்டு தோறும் ஐப்பசி அமாவாசைக்கு மறுநாள் சிறப்பாக நடக்கிறது.

சம்பந்தரின் உற்சவ சிலையை படகில் வைத்து ஓதுவார்கள். தேவாரம் ஓத முள்ளி ஆற்றின் இக்கரையிலிருநது அக்கரைக்குப் படகு போகும். அதிகாலை சூரியோதயத்துக்கு முன்னால் ஓடம் கரை சேரும்.
ஓடத்தில் வரும் சம்பந்தர்

 ரிஷபவாகனத்தில் வில்வனநாதர், சம்பந்தரை எதிர்கொண்டழைக்கும் வகையில் காத்திருப்பார்.
இந்த ஓடத் திருவிழாவுக்காகவே உண்டானதுபோல ஒவ்வொரு வருடமும் ஆற்றில் நீர் கரைபுரண்டோடும் காட்சியும் கண்கொள்ளாதது ஆகும்.

சம்பந்தரின் சிவ தரிசனம்

கும்ப கோணத்திலிருந்து 28 கி. மீ. தொலைவில் உள்ளது. இங்குதான் முந்தின நடு இரவில் நடக்க வேண்டிய அர்த்தசாம பூஜை, தீபாவளிக்கு மறுநாள் அதிகாலையில் மேற்கொள்ளப்படும் இந்த புதுமையான வழக்கம் 

அர்த்தசாம பூஜை அந்த அதிகாலை நேரத்தில் மேற்கொள்ளப்படும். தீபாவளிக்கு அடுத்த நாள் மட்டுமே இவ்வாறு காலம் தவறிய பூஜை நடைபெறுகிறது

கோயில் 5 நிலை ராஜகோபுரத்துடன் கிழக்கு நோக்கி 75 அடி உயரத்தில் 2 பிரகாரங்களுடன் அமைந்துள்ளது.

இறைவன் சுயம்பு லிங்கமாக அருள்பாலிக்கிறார் மூலவர் வில்வனநாதர்,

சிவன் சன்னதி

அம்பாள் செளந்தரநாயகி என்ற அழகு நாச்சியாருடன் பக்தர்கள் அனைவரையுமே திருஞானசம்பந்தராக பாவித்து அருள் பாலிக்கிறார்.

அம்மன் சவுந்தரநாயகி

உள்பிரகாரங்களில் பொய்யாத விநாயகர், வலம்புரிவிநாயகர், முருகன், ஆதிவில்வநாதர், கஜமுக்தீஸ்வரர், பஞ்சலிங்கம், கஜலட்சுமி ஆகிய சன்னதிகள் உள்ளன. பிரம்மா, அகத்தியர், அர்ச்சுனன் ஆகியோர் வழிபாடு செய்துள்ளனர்.

கோயில் மூன்றாம் குலோத்துங்க சோழன், மூன்றாம் ராஜராஜசோழன் இவர்கள் காலத்தில் கட்டியிருக்க வேண்டும் என கல்வெட்டுகள் கூறுகிறன.

பிரம்மா தனக்கு ஏற்பட்ட பிரம்மஹத்தி தோஷம் நீங்க வழிபாடு செய்த தலங்களில் இதுவும் ஒன்று.

தலவிருட்சம் வில்வம். கூவிளம் என்பதற்கு வில்வம் என்பது பெயர். கூவிளம்புதூர் என்ற பெயர் மருவி காலப்போக்கில் கொள்ளம்புதூர் ஆனது.