தாயகமாய் கவர்ந்த தாய்லாந்து

வடவரையை மத்தாக்கி வாசுகிப்பாம்பை கயிறாக்கி அமிர்தம் கடையும் அருமையான காட்சி சுவர்ணபூமி என்று பெயருக்கு ஏற்றார் போல் ஜொலித்து கருத்தைக்கவர்ந்தது தாய்லாந்து விமான நிலையம்.

அதுவும் ஒரு வெளிநாட்டு விமான நிலையக்காட்சி என்றால்
வியப்பிற்கு எல்லை ஏது?

தாய்லாந்தில் நிறைய "கருடன்"களைப் பார்த்தோம். நம் தேசீய இலச்சினை அசோகரின் சிங்கங்களைபோல அவர்களின் அடையாளக்குறியீடோ என்னவோ!

புத்தர்கோவில்களிலும், கோவில் முகப்புகளிலும் அலங்காரமாக கருத்தைக் கவர்ந்தது. கருடா என்கிற பெயரில் விமானங்களும் காட்சிப்பட்டது.
சரி கருடன்களைப்பார்த்தால் நல்லதுதானே!

சிறுவயதில் கருடா கருடா பூப்போடு என்று நிறையமுறை வேண்டியிருக்கிறோமே!! 

தங்கியிருந்த ஹோட்டலுக்கு எதிரே கடல் இருந்ததால் காலையில் நடந்து சென்று எங்களுக்காக காத்திருந்த அதிவேக விசைப்படகில் கோரல் ஐலேண்டை நோக்கிய பயணம் இனிமை.

கடற்கரைக்கு நடுவே ஒரு பெரிய மேடை போல் அமைத்து ஸ்பீட் போட் மூலம் பாராசூட்டில் செல்ல பல மேடைகள் அமைக்கப்பட்டிருந்தன.


கடலின் மேலே சுமார் இரண்டு நிமிடங்கள் பறக்கும் இந்த 
பாராசூட் அட்டகாசமான அனுபவமாம்.


நான் வெற்றிகரமாக பின்வாங்கிவிட குடும்பத்தினர் 
அனைவரும் சென்றுவந்தனர்.

உலகிலயே மிகப்பெரிய நகைக்கடையான "ஜெம்ஸ் ஜூவல்லரி" க்கு சென்றோம்.

வைரம்,பவளம்,முத்து தங்கம்,வெள்ளி, யானை தந்தம் என அனைத்தினால் செய்யப்பட்ட நகைகள் கிடைக்கும்.

உள்ளே நுழைந்ததும் ஒரு குகைக்குள் ரயில் மூலம் சிறு பயணம் ஏற்பாடு செய்கிறார்கள்.

அந்த குகையில் பல்வேறு கனிமங்களை எவ்வாறு வெட்டி எடுத்து நகைகளாக ஆக்கப்படுகிறது என விளக்கம் கொடுக்கிறார்கள்.

தாய்லாந்தின் வரலாற்றில் அணிகலண்களின் பெருமையும் காண்பிக்கப்படுகிறது.

மிக அருமையான பயணம் அது.
பல கோடி செலவில் செயற்கையாக செய்யப்பட்ட குகை அது.

இங்கிருந்து உலகெங்கும் வைரக்கற்கள் ஏற்றுமதி ஆகிறதாம்!
சின்னகல்லு பெத்த லாபம்!!

வைரங்களை கொண்டு நகைகள் செய்யும் சிறிய தொழிற்சாலையும் காண்பிக்கப்படுகிறது.

நேரடியாக அதை கண்ட போது வித்தியாசமான அனுபவமாக இருந்தது. அங்கிருந்து சிரித்த முகத்துடன் உலகின் மிகப்பெரிய நகைக்கடைக்குள் பணிப்பெண் அழைத்துச்சென்றாள்

வைரம் ஒரிஜினலாம்! எப்போதுவேண்டுமானாலும்
வந்து மாற்றிக்கொள்ளலாம் என்று சான்றிதழ் தந்தார்கள்!

அந்த தங்கம் மட்டும் 18 காரட்டாம். இந்தியா போய்
22காரட்டில் பதித்துக்கொள்ளுங்கள் என்றார்கள்.

அங்கு பட்டை தீட்டும் வேலையில் இருந்த பெண்கள் காதில் ஐ பாட் போட்டுக்கொண்டு வாயில் பபிள்கம் மென்றுகொண்டு யாரைப்பற்றியும் கவலை இல்லாமல் கவனமாக மும்முரமாக வேலையில் ஈடுபட்டிருந்தது கண்கொள்ளாக்காட்சி.

விமான நிலைய கண்ணாடிகளை சுத்தம் செய்யும் காட்சி!