வண்ணமிகு வண்டியூர் தெப்பக்குளம்

மாணிக்க மூக்குத்தி அணிந்து , மரகதப்பச்சைக்கிளி தோளில் கொஞ்ச செங்கோல் தாங்கி மதுரை அரசாளும் அன்னை மீனாட்சியின் மதுரையில் 

கண் இமைக்கவிடாமல் கவர்ந்தது வண்டியூர் தெப்பக்குளம்.

திருமலை நாயக்கர் தனது மாளிகை (திருமலை நாயக்கர் மகால்) கட்டும் பொருட்டு தோண்டிய பெரிய பள்ளமே பின்னர் பிரம்மாண்டமான தெப்பக்குளமாக 1645-ஆம் ஆண்டில் உருப்பெற்றது. திருமலை நாயக்கர் சமுத்திரம், வண்டியூர் தெப்பக்குளம் என்று அழைக்கப்படும் இது தென்வடலாக 1000 அடி நீளமும்; கீழ்மேலாக 950 அடி அகலமும் கொண்டது. 

 குளத்தின் நடுவில் ஒரு தீவுபோல் அமைக்கப்பட்டு, நடுவில் நீராழி மண்டபம், கோவில், நான்கு மூலைகளிலும் நான்கு சிறிய மண்டபங்கள் அமைக்கப்பட்டுள்ளன. இந்தக் குளத்தின் கரையில் வண்டியூர் தெப்பக்குளம் மாரியம்மன் ஆலயமும்; மரகதவல்லி அம்பாள் சமேத ஸ்ரீ முக்தீஸ்வரர் ஆலயமும் அமைந்துள்ளன.

இத்தனை சிறப்புகள் பெற்ற வண்டியூரில் மிக முக்கியமான ஒரு வைணவ ஆலயமும் உள்ளது. இங்கு சதுர்புஜ விமானத்தின்கீழ் கருவறையில் வீரராகவப் பெருமாள் ஸ்ரீதேவி, பூதேவி மற்றும் நாச்சியாருடன் காட்சி தருகிறார். ஆண்டாள் நாச்சியாரும் உள்ளார். சுமார் 500 ஆண்டுகள் பழமை வாய்ந்ததாகக் கருதப்படும் இந்த ஆலயத்தில் அரச மரமும் வில்வ மரமும் தலமரங்களாக உள்ளன. திருமலை நாயக்கரின் ஆட்சிக்காலத்தில் இந்த வீரராகவப் பெருமாள் மூலவரின் சிலை வைகை நதியில் கண்டெடுக்கப்பட்டதாகவும்; பின்னர் அவரே பிரதிஷ்டை செய்து ஆலயம் எழுப்பியதாகவும் செவிவழிச் செய்திகள் கூறுகின்றன.

இந்த ஊர் வண்டியூர் என்று அழைக்கப்படுவதற்கு ஒரு காரணம் கூறப்படுகிறது. சித்ரா பௌர்ணமிதோறும் வைகை நதியில் எழுந்தருளும் கள்ளழகர், தல்லாகுளம் வழியாக வந்து வைகை நதியில் இறங்கி, அதன் வடகரையில் மண்டூக மகரிஷிக்கு சாபவிமோசனம் தந்து காட்சி கொடுத்தார். 

எனவே, அந்த இடம் மண்டூர் என்று அழைக்கப்பட்டு, காலப்போக்கில் மண்டியூர் என்று மருவி, தற்பொழுது வண்டியூர் என்று அழைக்கப்படுகிறது. அழகர் மலையிலிருந்து கள்ளழகர் மதுரை வரும் வைபவத்துடன் மிக நெருங்கிய தொடர்பு கொண்டது இந்த வண்டியூர் ஸ்ரீ வீரராகவப் பெருமாள் ஆலயம்.

சித்திரை மாதம் பௌர்ணமி நேரம் முத்துரதங்கள் ஊர்வலம் போகும் நேரம் 
வெண்ணிலா விண்ணிலே கண்ணிலே களிக்கும் காட்சி..

சித்திரை மாதம் நடைபெறும் மதுரை மீனாட்சியம்மன் திருக்கல்யாணம், கள்ளழகர் திருவிழாக்களின்போது மதுரையிலிருந்து சுமார் 12 கிலோமீட்டர் தூரத்திலுள்ள அழகர் கோவிலிலிருந்து சுந்தரராஜப் பெருமாள் என்ற கள்ளழகர் மதுரைக்கு எழுந்தருளுகிறார். அப்போது கள்ளழகர் இந்த வீரராகவப் பெருமாள் ஆலயத்துக்கு வந்து எதிர்சேவை கொண்டு, இரவில் தங்கி திருமஞ்சனம் கண்டு வைரமுடி தரிசனம் தருகிறார். 

பின்னர் ஷேச வாகனத்தில் வைகையாற்றின் நடுவில் இருக்கும் மையமண்டபம் எனப்படும் தேனூர் மண்டபத்தில் எழுந்தருளி நாரைக்கு சாப விமோசனம் தந்து அதன்பின்பு தீர்த்தவாரி காண்கிறார். தீர்த்தவாரி முடிந்து தங்கக் கருட வாகனத்தில் மண்டூக மகரிஷிக்குச் சாப விமோசனம் தந்து, இராமராயர் மண்டபத்தில் தசாவதாரம் கண்டு பூப்பல்லக்கில் அழகர் மலைக்குத் திரும்புவார்.

இத்தகைய நிகழ்ச்சிகளுக்கு மையமாகத் திகழும் வண்டியூர் பெருமாள் ஆலயக் கருவறையில் ஸ்ரீதேவி, பூதேவியுடன் எழுந்தருளியுள்ள ஆண்டாள் நாச்சியாருக்கு பக்தர்கள் மணப்பேறு கிட்ட புடவை சார்த்தி வேண்டிக்கொள்கின்றனர். இவ்வாறு செய்ய திருமணத் தடை விலகுமென்று நம்பப்படுகிறது. கள்ளழகர் திருவிழா, வைகுண்ட ஏகாதசி, திருக்கார்த்திகை போன்றவை இந்த ஆலயத்தின் முக்கிய திருவிழாக்களாகும். இத்திருக்கோவில் அருள்மிகு கள்ளழகர் திருக்கோவிலின் இணைக் கோவில்களில் ஒன்றாகும்.

மதுரை மாநகருக்கு மிக அருகில்- ராமநாதபுரம் சாலையில் சுமார் ஐந்து கிலோமீட்டர் தூரத்திலுள்ள "வண்டியூர் தெப்பக்குளம்' மதுரைக்கு வருகை தரும் அனைவருக்கும் தெரிந்த ஒரு இடமாகும்.