புதுமை! புதுமை!! கொண்டாட்டம்!!!

கொடுத்துவைத்தவர்கள் பதிவர் சந்திப்பு நிகழ்த்தி பதிவுகளும், காணொளிகளும், படங்களும் போட்டு கொண்டாடிக் களிப்பூட்டி அசத்துகிறர்கள்.

நிறைய குடும்பப் பொறுப்புகளில் கலந்துகொள்ளமுடியாதவர்களின் திருப்திக்கு ஒரு யோசனை.. 

பெரிதினும் பெரிது கேட்பதுதானே நல்லது. 

அஸ்து தேவதை ததாஸ்து சொல்லி நடத்தி கொடுக்குமே !

கூழுக்கும் ஆசை மீசைக்கும் ஆசை கதையாக இருக்கிறதே... என்கிறீர்களா?

இரண்டுக்குமே ஆசைப்படலாம்!  "அமெட் மெஜஸ்டி' கப்பலில் பயணிப்பதற்கு முடிவெடுத்தால்!

கப்பல் பயணம் செய்யும் அனுபவத்துக்கு வெளி மாநிலங்களுக்கு எங்கும் செல்ல வேண்டாம். சிங்காரச் சென்னையிலேயே அதற்கான வழியை உண்டாக்கியிருக்கின்றனர் அமெட் மெஜஸ்டி கப்பல் நிறுவனத்தினர். 

இனி கப்பல் பயணம் எங்கே, எப்படி, போன்ற கேள்விகளுக்கான பதில்கள்...

உல்லாசக் கப்பலில் முன்பதிவு செய்பவர்கள் குறிப்பிட்ட நாள்களில் சென்னை துறைமுகம் 7-வது நுழைவாயிலில் உள்ள "அமெட் மெஜஸ்டி' கப்பல் அலுவலகத்துக்கு, பயண நேரத்திற்கு 2 மணி நேரத்துக்கு முன்பு வரவேண்டும். அங்கு சுங்க அதிகாரிகளின் சில சட்ட சோதனைக்குப் பிறகு கப்பல் பயணத்துக்குச் செல்லலாம்.

என்னென்ன வசதிகள்?

9 அடுக்குகள் கொண்ட இந்த உல்லாசக் கப்பல் முழுவதும் குளிர்சாதன வசதி செய்யப்பட்டுள்ளது. கடலின் அழகை ரசித்துக் கொண்டே சாப்பிட வசதியாக உணவு விடுதி (சைவம், அசைவம்), நடுக்கடலில் வானின் அழகை ரசித்துக் கொண்டே குளியலாட வசதியாக நீச்சல் குளம், கண்கவர் நடன நிகழ்ச்சிகள், சிறார்களுக்கான பொழுதுபோக்கு அம்சங்கள், கருத்தரங்கு கூடங்கள், அழகு நிலையங்கள், தங்குவதற்கான தனித்தனி அறைகள் என ஐந்து நட்சத்திர ஹோட்டலுக்கு இணையாக பல்வேறு வசதிகள் இந்தக் கப்பலில் செய்துதரப்பட்டுள்ளன.

நடுக்கடலில் டும்... டும்...டும்!

ஏதாவது புதுமையை செய்துவிட வேண்டும் என்ற எண்ணம் இப்போது அதிகரித்து வருகிறது. அம்மி மிதித்து... அருந்ததி பார்த்து... திருமணங்களை நடத்திய நம் நாட்டில், அதிலும் பல புதுமைகளை நிகழ்த்திட பலர் ஆர்வம் காட்டி வருகின்றனர். வாழ்நாளில் எப்படி ஒரு முறை பிறக்கிறோமோ, அதேபோல திருமணங்களும் மனிதனின் வாழ்க்கையில் ஒருமுறைதான் வருகிறது, அதில் புதுமைகளைப் புகுத்தத் தயங்குவதில்லை செல்வந்தர்கள். இந்தப் புதுமை விரும்பிகளுக்காக அமெட் உல்லாசக் கப்பல் சிறப்பு ஏற்பாடுகளைச் செய்துள்ளது. 

திருமணத்துக்காக கப்பலை முன்பதிவு செய்துவிட்டால் அன்றைய தினம் அவர்களது குடும்ப உறுப்பினர்கள், நண்பர்கள் தவிர, மற்றவர்களுக்கு அனுமதி இல்லை. 500 இருக்கைகள் கொண்ட திருமண அரங்கம் அனைத்து வசதிகளுடனும் அமைக்கப்பட்டுள்ளது.

முன்பதிவுக்கு போட்டி...

ஆழமான நீலக்கடலின் நடுவினில் அலைகளின் தாலாட்டில், அன்புக்குரியவர்களின் வாழ்த்துகளோடு திருமணங்களை நடத்துவது ஒன்றில் மட்டுமே திருமண வீட்டாரின் கவனம் இருக்கும் வகையில், மற்ற அனைத்து வசதிகளும் கப்பலில் கிடைக்கின்றன. அடுத்த மாதங்களில் வரும் திருமண முகூர்த்தங்களுக்கு இப்போதே ஆர்வத்துடன் பலர் முன்பதிவு செய்து வருகிறார்கள்.

சலுகைகளும் உண்டு...

இந்தக் கப்பலில் உல்லாசப் பயணம் செய்ய நபர் ஒருவருக்கு ரூ. 6,000 முதல் கட்டணம் நிர்ணயிக்கப்பட்டுள்ளது. ஆனால் நடுத்தர மக்களும் உல்லாசக் கப்பலில் சென்று கடலின் அழகை ரசிக்கும் வகையில் தம்பதி சிறப்பு சலுகை கட்டணம் ரூ. 6,901 (கணவர் ரூ. 4,999 + மனைவி ரூ. 1,902) என்று அமெட் நிர்வாகம் அறிவித்துள்ளது. இந்தக் கட்டணத்தில் வெள்ளி, சனி, ஞாயிறு ஆகிய 3 நாள்கள் கப்பல் இயக்கப்படுகிறது. வெள்ளிக்கிழமை மாலை 4 மணிக்குப் புறப்படும் கப்பல் கடல் தூரத்தில் 50 மைல் தூரம் சென்று மறுநாள் காலை 11 மணிக்கு துறைமுகம் வந்து சேரும். 

இதே போல்தான் சனி, ஞாயிற்றுக்கிழமைகளில் இயக்கப்படுகிறது.

பள்ளி மாணவர்களுக்கும்...

பள்ளி நிர்வாகம் சார்பில் மாணவர்களை இந்தக் கப்பலுக்குக் கல்விச் சுற்றுலா அழைத்து வரலாம். ஒரு மாணவருக்கு ரூ. 250 வீதம் கட்டணம் நிர்ணயித்துள்ளது. கடலில் சில கிலோ மீட்டர் தூரம் பயணம் செய்து கடலின் அழகை ரசிக்கும் வாய்ப்புடன், கப்பல் எவ்வாறு இயங்குகிறது, கேப்டன், தலைமை பொறியாளர், பைலட் ஆபிஸர் ஆகியோரின் பணிகள் எவை? என்பது உள்ளிட்ட கடல்சார் தொடர்பான முக்கிய விவரங்கள் மாணவர்களுக்குக் கற்றுத்தர சிறப்பு ஏற்பாடுகளும் செய்யப்பட்டுள்ளன. மேலும் இந்தப் பயண நேரத்தில் மாணவர்களுக்கு சிறப்பான சிற்றுண்டி வசதிகளும் வழங்கப்படும் என்று நிர்வாகம் தெரிவித்துள்ளது.