அருணாசல மகிமை!

திருவண்ணாமலையில் புகழ்பெற்ற கார்த்திகைப் பௌர்ணமி
சிவ வழிபாட்டுக்கு உகந்த திருநாளாகத்திகழ்கிறது..!

படைப்புக் கடவுளான பிரம்மதேவனுக்கும், காக்கும் கடவுளான திருமாலுக்குமிடையே "நானே உயர்ந்தவன்' என்ற பூசல் வந்தபோது, சிவபெருமான் நெடுஞ்ஜோதியாகத் தோன்றி அவர்களின் ஆணவ நிலையகற்றி உண்மையைக் காட்டியருளினார். 

பின்னர் மலையாக மாறிய  சம்பவம் கார்த்திகைப் பௌர்ணமியில்தான் நிகழ்ந்தது.

முக்தியடைவது பற்றி ஒரு சிவத்துதி உண்டு.

"தில்லையில் காண- காசியில் இறக்க-சிறக்கும் 

ஆரூர்தனில் பிறக்க-எல்லையில் பெருமை 

அருணையை நினைக்கஎய்தலாம் முக்தியென்று நடித்தீர்.'

திருவாரூரில் பிறந்தால் முக்தி கிட்டும்;
ஆனால் அது எல்லாருக்கும் சாத்தியமில்லை. 

காசியில் இறந்தால் முக்தி; அதுவும் எல்லாருக்கும் இயலாத ஒன்றே. 

சிதம்பரத்தை தரிசித்தால் முக்தி; அது முயன்றால் அடையக்கூடியதுதான் என்றாலும், பார்வையற்றோர், உடல் ஊனமுற்றோர் போன்றவர்களுக்கு எளிதாகாதே. 

ஆனால் "அருணாசல' என்று நினைத்தாலே முக்தியாம். 

ஏழை- பணக்காரன், உயர்ந்தவன்- தாழ்ந்தவன் என யார் வேண்டுமானா லும் எங்கிருந்தும் நினைக்கலாம். அதுதான் அருணாசல தல மகிமை!

"நமசிவாய' என்பது சிவ பஞ்சாட்சரம். "அருணாசல' என்பதும் சிவ பஞ்சாட்சரமே. ஒருமுறை "அருணாசல' என்று சொன்னால் ஒரு கோடி "அருணாசல' நாமம் சொன்னதற்குச் சமம்.

அருணாசல மலையை சிவசக்தி மலை ..!

அம்பிகை காஞ்சியில் காமாட்சியாய் எழுந்தருளி, மண்ணால் லிங்கம் அமைத்து வழிபட்டு சிவனுடன் ஒன்றிணையும் வரம் வேண்டினாள்.

சிவனோ, "அண்ணாமலையில் உன் தவம் தொடரட்டும்' என்றார். அதன்படி தேவி தவம்புரிந்து, ஈசனின் இடப்பாகம் பெற்று அர்த்தநாரீஸ்வரியானாள். ஆணும் பெண்ணும் சரிநிகரானவர்கள் என்னும் தத்துவத்தை உலகுக்கு உணர்த்திய தலம் அண்ணாமலை.

நவராத்திரி தேவியான துர்க்கா மகிஷாசுரனை அழிக்கப் பிறந்தவள். 

பிரம்மா, விஷ்ணு, சிவன் ஆகியோரது சக்திகள் ஒன்றிணைந்து உருவான இவள் அண்ணாமலையை வழிபட்டு மேலும் பலம் பெற்றாளாம். மகிஷாசுரமர்தினி கோவிலையும் திருவண்ணாமலையில் தரிசிக்கலாம்.

அருணை என்றால் செம்மை. எனவே இது செந்நிறமலை. செம்மையான மலை. ஞானமலை. ஞானத் தபோதனர்களை- சித்தர்களை தன்பால் ஈர்க்கும் மலை இது. 

மாணிக்கவாசகர் "திருவெம்பாவை' என்னும் தெய்வத்திரு நூலை திருவண்ணாமலையில் தான் படைத்தார்.

சம்பந்தர் பதிகம் பாடியுள்ளார்.

திருவண்ணாமலை வள்ளால கோபுரத்திலிருந்து கீழே குதித்து உயிர்விட முயன்றார் அருணகிரிநாதர். முருகப்பெருமான் அவரை தடுத்தாட் கொண்டார்.

முருகனை மையமாகக் கொண்டு அறுசமயக் கடவுள்களையும் ஒன்றிணைத்து "திருப்புகழ்' பாடினார் அருணகிரியார்.

 "திருவாசகத்துக்கு உருகார் ஒரு வாசகத்துக்கும் உருகார்' என்பதுபோல, "திருப்புகழைப் பாடார் ஒரு புகழும் அடையார்' என்பர்.

இங்குள்ள பாதாள லிங்கம் கரிகால்சோழன் காலத்தில் நிறுவப்பட்டதென்பர். கி.பி. 16-ஆம் நூற்றாண்டில் விஜயநகர மன்னர் கிருஷ்ணதேவராயர் இப்பகுதியில் ஆயிரங்கால் மண்டபம் அமைத்த பணியின் போது  பாதாள லிங்கத்தை அகற்றாமல் காத்தவர் ஞானயோகி தம்பிரான் சுவாமிகள்.