அரும்பெரும் ஜோதி

சிவத் தலங்களில் முதன்மை பெற்ற காசி திருத்தலத்திலுள்ள சிவன் கோவில்களைக் கணக்கிட முடியாது. 


காசி நகருக்கு இதயம் போல அமைந்திருக்கும் காசி விஸ்வநாதர் கோவிலில் சிவராத்திரி அன்று ஏராளமான வேத விற்பன்னர்களைக் கொண்டு முறைப்படி ஹோமங்களும், சிவனைப் பற்றிய துதிகளின் பாராயணமும் விசேஷமாக நடைபெறும். 

காசியில் உள்ள அனைத்து சிவன் கோவில்களிலும் அபிஷேகமும் அலங்காரமும் அன்று முழுவதுமே நடத்தப்படும். சிவராத்திரி அன்று காசி விஸ்வநாதர் கோவிலில் லட்ச தீபங்கள் ஏற்றுவார்கள்.  
காசி முழுவதுமே அன்று ஜகஜோதியாக இருக்கும்.


இராமேஸ்வரத்தில் சிவராத்திரியன்று காலையில் திறக்கும் சந்நிதியை மறுநாள் பிற்பகலில் தான் மூடுவார்கள். அபிஷேகமும் வழிபாடுகளும் விமரிசையாக நடக்கும். 

தேவாரம், திருவாசகம், ஸ்ரீருத்ரம் ஆகியவை இரவு-பகலாக ஒலிக்கும். இரவின் நான்கு ஜாமங்களிலும் தனித்தனி அலங்காரங்கள் செய்வார்கள். ஒவ்வொரு ஜாமத்திலும் ஸ்வாமி மூன்று பிராகாரங்களிலும் உலா வந்து அருள் புரிவார். 

ஸ்வாமிக்கு ஆயிரம் குடங்களின் நீராலும் (சஹஸ்ர கலச), ஆயிரம் சங்குகளின் நீரைக் கொண்டும் அபிஷேகம் செய்வார்கள். 
மாலையில் வெள்ளி ரத உலாவும் காலையில் பெரிய ரத உலாவும் நடைபெறும்.


நேபாளத்தில் சிவராத்திரி பெரும் விழாவாகவே கொண்டாடப்படுகிறது. 

இங்குள்ள பசுபதி நாதர் கோவிலில் இந்தியாவின் பல பகுதிகளிலிருந்தும், நேபாளத்தின் பல பகுதிகளிலிருந்தும் துறவிகளும் பக்தர்களும் தரிசனம் செய்வதற்குக் குவிவார்கள்.

அன்று அனைவருக்கும் அன்னதானம் அளிக்கப்படும். 

இதை நேபாள மன்னர் தன் சொந்தச் செலவில் செய்கிறார். கோவிலில் லட்ச தீபம் ஏற்றுவார்கள். எல்லாருமே புத்தாடை அணிவார்கள். பசுக்களுக்குச் சிறப்புப் பூஜைகள் செய்யப்படும்.

ஆந்திர மாநிலம்: ஸ்ரீசைலத்தில் மல்லிகார்ஜுன ஸ்வாமி கோவில் மண்டபத்தை விஜய நகர மன்னர் ஒருவர் சிவராத்திரியன்று வழங்கியதாகக் குறிப்பு உள்ளது.

திருச்சி கோவில் சிலா சாஸனம் ஒன்று, சிவராத்திரி விழாச் செலவுக்காக சோழ மன்னர், தன் செல்வத்தை தானம் செய்ததாகச் சொல்கிறது.

சிவராத்திரி அன்று இரவு முழுவதும் கண் விழித்து ஸ்வாமியை தரிசித்து வழிபாடு செய்ய முடியாவிட்டால் கூட, ‘லிங்கோற்பவ’ காலமாகிய இரவு 11.30 மணி முதல் 1மணி வரை உள்ள காலத்திலாவது சிவதரிசனம் செய்து வழிபட வேண்டும்.

‘சிவ சிவ என்கிலர் தீவினையாளர்
சிவசிவ என்றிடத் தேவருமாவார்’

என்னும் திருமூலரின் வாக்குப்படி ஆதியும் அந்தமும் இல்லாத அரும்பெரும் ஜோதியான சிவபெருமானுக்குரிய விரதங்களில் தலையாயது சிவராத்திரி விரத நாளில் சிவபெருமானைச் சிந்தையில் நிறுத்தி சீரிய வாழ்வைப் பெறுவோம்.

எள்ளளவும் அன்பு இல்லாதவர்கள் ஆனாலும் சரி; அன்பு கொண்டவர்களாக இருந்தாலும் சரி; சிவராத்திரி அன்று சிவபெருமானைத் தரிசித்தவர், விரதம் இருந்தவர், வழிபாடு செய்தவர் ஆகியோருக்கு நற்கதி கிடைக்கும்’ என்பது ஐதீகம்..

பகற்பொழுது என்பது சிவபெருமானுக்கும், இரவுப்பொழுது அம்பிகைக்கும் உரியது. அம்பிகை தனக்குரிய, இரவுப்பொழுதை சிவபெருமான் பெயரால் ‘சிவராத்திரி’ என வழங்கச் செய்தார். நவராத்திரி நாயகி நமக்காகத் தந்தது-சிவராத்திரி.

பூஜையின் போது ஐந்தெழுத்து மந்திரமான `சிவாய நம' என்ற மந்திரத்தை உச்சரிப்பது மனோ சக்தியை கொடுக்கும். மேலும் சிவபெருமானின் வெவ்வேறு பெயர்களான பவ, சர்வ, ஈசான, பசுபதி, உக்ர, ருத்ர, பீமா மற்றும் மகாதேவா என்று கூறியும் பூஜிக்கலாம்.

 

இந்த பூஜையின் போது, சிவனுக்கு உகந்த வில்வ இலைகளைக் கொண்டு அர்ச்சனை செய்வது மிகச் சிறந்த பலனை தரும். 

 

நான்கு ஜாமங்களிலும் தூங்காமல் பூஜை செய்து, மறுநாள் விடியற்காலையில் நீராடி, சிவனை வழிபட்டு, ஏழை-எளியவர்களுக்கு தங்களால் முடிந்த தானத்தை வழங்கி, விரதத்தை நிறைவு செய்ய வேண்டும்.