ஜேஷ்டாபிஷேகம்

 ஆராத அருளமுதம் பொதிந்தகோயில்!

அம்புயத்தோன் அயோத்திமன்னற்களித்த கோயில்!

தோலாத தனிவீரன் தொழுத கோயில்!

துணையான வீடணற்ககு துணையாங்கோயி்ல்!

சேராத பயனெல்லாஞ் சேர்ந்தகோயில்!

செழுமறையின் முதலெழுத்து சேர்ந்தகோயில்!

தீராதவினையனைத்தும் தீர்க்கும் கோயில்!

திருவரங்கமெனத்திகழுங்கோயில்தானே!

"நல்லார்கள் வாழும் நளிரங்கம்"என ஆழ்வார்களால் சிறப்பிக்கப்படும் ஸ்ரீரங்கம் திருத்தலத்தில் அருள்புரியும் ஸ்ரீரங்கநாதருக்கு ஆனித்திருமஞ்சன அபிஷேகம் நடைபெறுகிறது.

ஆனி மாதத்தில் கேட்டை நட்சத்திரத்தன்று பெரிய பெருமாளான ஸ்ரீபள்ளிகொண்ட ரங்கநாதருக்குத் திருமஞ்சனம் மிகச்சிறப்பாக நடைபெறும் அபிஷேகத்தை ஜேஷ்டாபிஷேகம் என்று போற்றுவர்.

இத்திருமஞ்சனத்தின்போது பெருமாளின் திருக் கவசங்களையெல்லாம் களைந்துவிட்டு ஏகாந்தத் திருமஞ்சனம் நடைபெறும். 


பெரிய திருமஞ்சனம் என்னும்.இதை சேவிப்பது மிகவும் விசேஷம். 


 ஸ்ரீரங்கம் கோவிலின் தென்புறத்தில் ஓடும் காவிரி நதியில் 
வேத மந்திரங்கள் முழங்க நீர் சேகரிப்பார்கள். 


தங்கக் குடத்தில் நிறைத்த நீரை யானையின் மீதும்; வெள்ளிக்குடங்களில் நிறைத்த நீரை கோவில் பரிசாரகர்கள் தலையில் சுமந்தும்  திருமஞ்சனத்திற்கு எடுத்து வருவார்கள்.

திருமஞ்சனம் நடைபெற்றதும் பெரிய பெருமாளுக்கு தைலக்காப்பு இடுவார்கள். திருமுக மண்டலத்தைத் தவிர மற்ற திருமேனியை 
இந்த நாளில் தரிசிக்க முடியாமல் திரையிட்டிருப்பார்கள்.

திருமஞ்சனத்திற்கு அடுத்த நாள் கோவிலில் பெருமாளுக்காகத் தயாரிக்கப்படும் சிறப்புமிக்க பிரசாதத்தை பெருமாளுக்கு நைவேத்தியம் செய்த பின் பக்தர்களுக்கு அளிப்பார்கள். 
ஜ்வாஜ்ஜல்யமான நடராஜப் பெருமானின் ஆனந்த நடனக் கோலம்

ஆனித் திருமஞ்சன அபிஷேகத்தின்போது நடராஜப் பெருமானையும், ரங்கநாதப் பெருமாளையும் தரிசிப்போர் வாழ்வில் வசந்தம் வீசும் 
என்பது ஐதீகம் !