மனத்திற்கு இனிய மஹாலக்ஷ்மி

“பத்மேவ மங்கள ஸரித்பாரம் ஸம்ஸார ஸந்ததே:|
துரித க்ஷேபிகா பூயாத் பாதுகா ரங்க பூபதே:||”

“பாதுகையானது பிராட்டியைப் போன்றது.  ஆற்றுவெள்ளம் போன்று சுபங்களைப் பெருகச் செய்வதில், ஸம்சார சங்கிலியை அறுப்பதில், பாபங்களைப் போக்குவதில் இணையானது”

இத்தனை பெருமைகளையும் சக்திகளையும் தன்னகத்தே கொண்ட இந்த மஹாலக்ஷ்மியை, மக்கள் தங்கள், தங்கள் விருப்பம் பூர்த்தியடைய, எண் வகைச் செல்வங்களையும் பெற்று மகிழ உபாஸிக்கிறார்கள்.

மகப்பேறு வேண்டுபவர்கள் சந்தான லக்ஷ்மியையும்,
நல்ல பதவி வேண்டுபவர்கள் ராஜ்ய லக்ஷ்மியையும்,
எல்லா சித்திகளையும் பெற ஆதிலக்ஷ்மியையும்,
தான்யம் மிகுதியாக விளைய தான்யலக்ஷ்மியையும்,
தங்கள் முயற்சிகளில் வெற்றிகிட்ட விஜயலக்ஷ்மியையும்,
தங்களுக்கு சகல சௌபாக்யங்களும் கிடைக்க மஹாலக்ஷ்மியையும், வீரம் போட்டிகளில் வெற்றிகிட்ட வீர லக்ஷ்மியையும் வணங்குகிறோம்..


“கிரீட - மகுடோபேதாம் ஸபுர்ணவர்ண ஸமந்விதாம்|
ஸர்வாபரண ஸம்யுக்தாம் ஸுகாஸந ஸமந்விதாம்||

பரிபூர்ணம் ச கும்பஞ்ச தக்ஷிணேந கரணேது|
சக்ரம் பாணம் தாம்பூலம் ததா வாமகரணேது||

சங்கம் பத்மம் ச சாபம் சகண்டி காமபி தாரிணீம்|
ஸத்கஞ்சு கஸ்தநீம் த்யாயேத் தனலக்ஷ்மீம் மனோகரம்||”

சிரசில் கிரீடமும், எல்லா ஆபரணங்களை அணிந்தவளும்,
ஆசனத்தில் வீற்றிருப்பவளும்,
தன் கரங்களில் பரிபூர்ண கும்பம், சக்ரம், அம்பு, தாம்பூலம் சங்கு, தாமரைமலர், வில், கண்டிகை, தாங்கியவளாக எட்டு கரங்களுடன், மனத்திற்கு இனியவளாக விளங்கும் தனலக்ஷ்மியை நாம் தியானம் செய்வோம்.

ஸ்ரீதேவி தாயார் பாற்கடலிலிருந்து அவதரித்தது பங்குனி மாதம் உத்திர நக்ஷத்திர தினத்தன்று. தாமரைமலர் மீது அமர்ந்த வண்ணம் தோன்றித் தம் கரங்களில் இருந்த மாலையுடன் வெளியே வந்தாள். 

அவள் அங்கு கூடியிருந்த ஒவ்வொரு தேவர்களையும் பார்த்துக் கொண்டு வந்தபோது, அவர்கள் அனைவரும் தங்களுக்குத்தான் மாலையிட வருகிறாள் என்று ஆவலுடன் எதிர் பார்த்திருந்த போது, இது எதையும் கவனியாதவர் போன்று எங்கேயோ பார்த்த வண்ணம் இருந்த மஹாவிஷ்ணுவின் கழுத்தில் அந்த மாலையை அணிவித்து அவரையே தன் கணவனாக ஏற்றுக்கொண்டாள். அவனும் அவளைத் தன் மார்பினில் தாங்கிக் கொள்ள அவளே “ஹரி ப்ரியா ஆனாள்”.