ஸ்ரீ சக்ர வழிபாடு

வெளி நின்ற நின் திருமேனியைப் பார்த்து, என் விழியும் நெஞ்சும் 
களி நின்ற வெள்ளம் கரை கண்டதில்லை, கருத்தினுள்ளே 
தெளி நின்ற ஞானம் திகழ்கின்றது என்ன திருவுளமோ?
ஒளி நின்ற கோணங்கள் ஒன்பதும் மேவி உறைபவளே.


அபிராமி அந்தாதியில் அபிராமி பட்டர் " ஒளி நின்ற கோணங்கள் ஒன்பதும் மேவி உறைபவளே" என்று அம்மையின் இருப்பிடமாக ஸ்ரீசக்ரம் விளங்குதை கூறுகின்றார்.

சக்ரங்களுக்கெல்லாம் சிரேஷ்டமானது ஸ்ரீசக்ரம்.
அது தேவியின் திருவருட் சக்கரம்.

அரிசி மாவு அல்லது மஞ்சள் பொடி ஆகியவற்றினால் யந்திரம் அமைத்து அந்த யந்திரத்திலே சக்தி வீற்றிருக்கிறாள் என நினைத்து வழிபடல்
 ஸ்ரீ சக்கர பூசை வழிபாடு எனப்படும்.

அம்பாளுடைய சக்ரத்தை ஸ்ரீசக்ரம் என்றும் ஸ்ரீசக்ர ராஜமென்றும் சொல்வதுண்டு.

சரீரமானது ஜீவனுக்கு எப்படி நிலைக்களனாக உள்ளதோ,
அவ்வாறே சிவன் சக்தி இருவருக்கும் இருப்பிடமாக உள்ளது ஸ்ரீசக்ரம்.

ஸ்ரீசக்ரமானது கீழ்நோக்கிய முக்கோணங்கள் ஐந்தும், மேல் நோக்கிய முக்கோணங்கள் நான்கும் சேர்வதால் உண்டாவது. மேல்நோக்கிய நான்கு முக்கோணங்களை ‘சிவாத்மகம்’ என்றும் கீழ்நோக்கிய ஐந்து முக்கோணங்களையும் ‘சக்தியாத்மகம்’ என்றும் கூறுவர்.

ஸ்ரீசக்ரத்தில் அடங்கிய பிந்து, அஷ்டதளம், ஷோடதளம், சதுரச்ரம் என்ற இவை சிவ சக்ரங்கள் (சிவாத்மகம்),

த்ரிகோணம், அஷ்டகோணம்,தாசாத்வயம், மன்வச்ரம் இவை சக்திச் சக்ரங்களாகும் (சக்தியாத்மகம்).

சக்திச் சக்ரங்கள் மேன்மை உடையவையாகும்.

இந்த இரண்டிலும் சக்திச் சக்ரச் சேர்க்கையினால்தான் சிவச்சக்ரத்திற்கு மேன்மை ஏற்படுவதாக ‘சிவசக்த்யா யுக்தோ’ என்று சௌந்தரியலஹரி சுலோகம் கூறுகிறது.

ஸ்ரீசக்ரத்தின் மத்திய பாகத்தை பிந்து என்பர்.

ஸ்ரீசக்ரத்தின் மத்தியிலுள்ள த்ரிகோணத்தின் நடுவில்
பிந்து இருப்பதால் அதற்கு ‘பைந்தவஸ்தானம்’ என்று பெயர்.

.இந்த முக்கோண ஸ்தானங்களில் பிரபஞ்ச தத்துவங்களையும் மனோ நிலைகளையும் குறிக்கும் யோகினிகள் என்று அழைக்கப் பெறும்
சக்திகள் அமர்ந்திருக்கிறார்கள்.

முக்கோண ஸ்தானங்களில் அமர்ந்திருக்கும் யோகினிகள் ஆவரண தேவதைகள் என்று அழைக்கப் பெறுகிறார்கள்.

ஆவரண என்றால் மறைக்கும் என்று பொருள்.

பிந்து மண்டலத்திலுள்ள பிரம்ம ஸ்வரூபத்தை மறைத்து, பஞ்ச பௌதீகப் பிரபஞ்சத்தைத் தோற்றுவிப்பவர்கள் இந்த யோகினிகளே.

சூரியனிடமிருந்து கிரணங்கள் தோன்றுவது போல, 
யோகினிகள் தேவியிடமிருந்து தோன்றுகிறார்கள்.

ஆவரண தேவதைகள் அம்பாளிடமே ஐக்கியமாகி விடுவதை
ஸ்ரீசக்ரபூஜையில் காணலாம். 

ஒன்றிலிருந்து ஒன்று தோன்றியது. பின்பு அவை இரண்டுமே இரண்டறக் கலந்து ஒன்றுபட்டு விடுவதால் அம்பாளை
பிரகாச-விமர்ச-பரப்ரம்மஸ்வரூபிணி என்று போற்றுகிறோம்.

Maha Meru Sri Chakram

ராகம் எனப்படும் விருப்பைக் குறிப்பது பாசம். குரோதம் என்ற வெறுப்பைக் குறிப்பது அங்குசம். கரும்பு வில் மனத்தையும், ஞானேந்திரிய பஞ்சகம் பஞ்சபுஷ்ப பாணங்களையும் குறிப்பிடுகின்றன. 

ஸ்ரீசக்ர பூஜையைச் செய்பவர்கள் லௌகீக சுகங்களை அடைவதோடு நிவர்த்தி மார்க்கத்தில் வெறுப்பு, விருப்பு, புலன்கள் ஆகியவற்றையும் வென்று, ஜிதேந்திரியனாக, ஜீவன் முக்தியை அடைகிறான்.

அம்பாளாகிய ஸ்ரீசாரதையை வழிபடும் சாஸ்திரத்திற்கு ஸ்ரீவித்யை என்றும் அம்பாளுடைய மந்த்ரத்திற்கும் வித்யை என்றும் சொல்லப்படுகிறது.

 சகலவிதமான மந்த்ரங்களுக்குள்ளும் மிக உயர்ந்த-
உன்னதமான மந்த்ரம் ‘ஸ்ரீ வித்யை’

ஆதிசக்தியாக, சர்வேச்வரியாக, ராஜ்யலக்ஷ்மியாக விளங்கும் ஸ்ரீராஜராஜேஸ்வரி தன்னை ஆச்ரயித்தவர்களுக்கு ராஜபீடங்களைக் கொடுக்கவல்லவள்.

சிருஷ்டி, ஸ்திதி, சம்ஹாரம் என்னும் மூவகை கிருத்யங்களுக்காக மும்மூர்த்திகளைத் தோற்றுவித்த மூல சக்தி-பரதேவதை அவளே!

சந்த்ரமௌலீஸ்வர லிங்கத்தின் சக்தியாக ஸ்ரீ சக்ர ரூபத்தில் பூஜை பண்ணுவது திரிபுரசுந்தரிக்குத்தான்.

 சிவன் மாதிரியே - அவளுக்கும் பூர்ண சந்த்ரசம்பந்தம் நிறைய உண்டு. அவருடைய சிரசில் பூரண சந்த்ரன் இருக்கிதென்றால் - இவள் வாசம் பண்ணுவதே பூர்ண சந்த்ர மத்தியில் தான்.

சந்த்ர மண்டல மத்யகா என்று ஸஹஸ்ரநாமத்தில் போற்றுகிறோம்..

அம்பாளுக்கு விசேசமான திதி பௌர்ணமி..

அவளே நம்முடைய சிரசின் உச்சியில் பூர்ணசந்த்ரனாக
அம்ருதத்தைக் வர்ஷிக்கும் அமிருதவர்ஷிணி

திவ்ய தம்பதிகள் ஜில்ஜிலுவென்று அழகாக அம்ருத கிரணங்களைக் கொட்டிக் கொண்டிருக்கும் சந்த்ர சம்பந்தத்துடன் லோகத்தின் தாபத்தையெல்லாம் போக்கி ஆனந்தம் கொடுப்பதற்காகச் சந்த்ரமௌளியாகவும்; திரிபுரசுந்தரியாகவும் இருக்கிறார்கள்.

அவள் சிரசிலும் சந்தரகலை உண்டு. சாரு சந்த்ர கலாதரா என்று சகஸ்நாமத்தில் வருகிறது. மஹாதிரிபுரசுந்தரி - சந்த்ர மண்டல மத்யகா
சாரு சந்த்ர கலாதரா என்ற நாமாக்கள் ஆனந்தமளிப்பவை..

கற்பக விருஷத்தினடியில் நினைத்ததை, நினைத்த மாத்திரத்திலே பெறுவது போல, சகல நற்காரியங்களும் ஸ்ரீசக்ரத்தின் கீழ் அமர்ந்து வேண்ட கை கூடும்

ஸ்ரீ மஹா மேரு 

ஸ்ரீசக்ரங்களைத் தாடங்கங்களாக அணிந்த அன்னை அகிலாண்டேஸ்வரி