திருவருள் தரும் திருஈங்கோய்மலை

அடியும் முடியும் அரியும் அயனும்
படியும் விசும்பும்பாய்ந் தேறி - நொடியுங்கால்,
இன்ன தெனவறியா ஈங்கோயே ஓங்காரம்
மன்னதென நின்றான் மலை.

என தேவாரம் போற்றும் அருமையான தலம் ஈங்கோய்மலை..


"திருஈங்கோய்மலை இறைவனின் திருவடிகளைப் பரவிய இப்பதிகப் பாடல்கள் பத்தையும் ஓத வல்லவர்கள் கவலைகள் நீங்கப் பெறுவர் " என்று  முதலாம் திருமுறையில் இடம் பெற்றுள்ள தனது பதிகத்தில் குறிப்பிடுகிறார்திருஞானசம்பந்தர் ..!

சங்ககாலப் புலவர் நக்கீரர்  இறைவன் மீது ஈங்கோய் எழுபது என்ற பாமாலை பாடியுள்ளார்.

http://www.thevaaram.org/thirumurai_1/onepage.php?thiru=11&Song_idField=11010

சிவபெருமானின் பாடல் பெற்ற தலங்களில், மலை மீது இருக்கும் கோவில்கள் மிகக்குறைவு. அவற்றில்  திருச்சி மாவட்டம் காவிரி வடகரைத் தலமான ஈங்கோய்மலை ஒன்று... 

அகத்தியர் ஈ உருவத்தில்  இறைவனை வழிபட்டதால் ஈங்கோய்மலை என்று பெயர் வந்தது. 

அம்பாள் இறைவனை வழிபட்ட இடமாதலின்  சிவசக்திமலை என்றும் பெயருண்டு. .

சிவன், தன் உடலின் இடப்பாகத்தை தருவதாக 
உமைக்கு உறுதியளித்த தலம்..!

சிவபெருமான தவம் செய்த  பெருமையும் கொண்டது .. தவம் செய்த ஈசன் ஈவடிவில் மலர்களில் இருந்த தேனை ஸ்வீகரிதுக்கொண்டதாலும் ஈங்கோய்மலை என்று பெயர் வந்திருக்கலாம்..!

மூலவர் மரகதாலேஸ்வரர்  மரகதம் போன்று பச்சை நிறத்தில் மரகதத்தால் ஆன சுயம்பு மூர்த்தியாக அருள்பாலிக்கிறார். இதனால் இவருக்கு மரகதாசலேஸ்வரர் என்ற திருநாமமும் உண்டு.

சிவபெருமானின் சந்நிதியில் உள்ள தீபம் காற்று பட்டாலும் அசையாத கொழுந்துடன் விளங்குகிறது. அதனால் சுவாமிக்கு அசல ஈசுவரர் என்ற பெயரும் உண்டு.

சிவராத்திரி நாளின் முனபின் நாடகளில் சூரிய ஒளி இறைவன் மீது படும் சமயம் லிங்கம் பல வண்ணத்தில் காட்சி அளிக்கிறது..!

காலைக் கடம்பர், மத்தியான சொக்கர், அந்தி திருவேங்கிநாதர் எனும் கூற்றுப்படி, ஒரேநாளில் காலையில் கடம்பவனேஸ்வரரையும், மதியம் அய்யர்மலையிலுள்ள ரத்தினகிரீஸ்வரரையும், மாலையில் திருஈங்கோய்மலை மரகதாஜலேஸ்வரரையும் ஒரே நாளில் நடந்து சென்று  தரிசித்தால் 108 சிவாலயங்களை தரிசித்த பயன் நிச்சயம் உண்டு. -

கார்த்திகை மாதத்து திங்கட் கிழமைகளில் வழிபடுதல் மிகவும் விஷேசம் ..

தினந்தோறும் காலை 10 மணி முதல் பகல் 12 மணி வரையிலும், மாலை 4-30 மணி முதல் 6 மணி வரையிலும் திறந்திருக்கும்.

ஐநூறு படிகளுடன் அமைந்த மலைக்கோயில் ...மலை ஏறும் படிகள் சுமாராக அமைந்திருப்பதாலும், வழியில் இளைப்பாற ஒரேஒரு மண்டபத்தைத் தவிர வேறு வசதி இல்லாததாலும்,சற்றே சிரமம் த்ருகிறது..

மலை அடிவாரத்தில் கொங்கு நாட்டுத் தலங்களுக்கே உரித்தான கல் விளக்குத் தூண்  காணப்படுகிறது.

 அடிவாரத்தில் போக முனிவர் சந்நிதி உண்டு..~

கோயிலுள்  தட்சிணாமூர்த்தி, விநாயகர், சுப்பிரமணியர் சந்நிதிகள் உள்ளன.

வலமாக வரும்போது கோயிலின் விசாலமான பழைமையான திறந்தவெளி அமைப்பைக் காண முடிகிறது.

அம்பாளுக்கும் சுவாமிக்கும் தனித்தனியே கோயில் விமானங்கள், கொடிமரங்கள் உள்ளன. 

திருமணத்தடை, குழந்தை பாக்கியம், கல்வியில் சிறந்து விளங்க இறைவனை பிரார்த்திக்கலாம்.

அம்பாளுக்கு, சிவன் தன் இடப்பாகம் தர உறுதி தந்த மலை என்பதால் இம்மலையை "சக்திமலை' என்கின்றனர். இதனை உணர்த்தும் விதமாக முன்மண்டபத்திலும், மலையிலும் அர்த்தநாரீஸ்வரர் வடிவங்கள் உள்ளன. 

மரகதாம்பிகை, நின்ற கோலத்தில் இருக்கிறாள். இவளது கருவறை விமானம், கோபுரம் போன்ற அமைப்பில் மூன்று கலசங்களுடன் இருக்கிறது.

கருவறை சுற்றுப்பிரஹாரத்தில்  மகிஷாசுரனை வதம் செய்த துர்க்கை காலுக்கு கீழே மகிஷனுடனும், மற்றொரு துர்க்கை சாந்தசொரூபியாகவும் உள்ளனர்.

 ஒரே இடத்தில் துர்க்கையின் இரண்டு வடிவங்களையும் காண்பது அரிதான ஒன்று

தென்திசை வந்த அகத்தியர், சிவனை வழிபட வந்தபோது நடை அடைக்கப்பட்டுவிட்டது. தனக்கு காட்சி தரும்படி சிவனை வேண்டினார்.

மலை அடிவாரத்தில் உள்ள தீர்த்தத்தில் நீராடிவிட்டு வந்தால் தன்னை வணங்கலாம் என்று அசரீரி சொன்னதன்படி அகத்தியர் தீர்த்தத்தில் நீராடியபோது, ஈ வடிவம் பெற்று மலை மீது பறந்து வந்து, சன்னதி கதவின் சாவித்துவாரம் வழியாக உள்ளே புகுந்து சுவாமியை தரிசனம் செய்தார்.

பின் மீண்டும் தன் பழைய வடிவம் பெற்று திரும்பினார்.

அகத்தியர் ஈ வடிவில் வழிபட்ட தலம் என்பதால், "திருஈங்கோய்மலை' என்றும், சிவனுக்கு "ஈங்கோய்நாதர்' என்றும் பெயர் உண்டு.

சிவனுக்கு தீபாராதனை காட்டும்போது லிங்கத்தில் ஜோதி ஜொலிப்பதைக் காணலாம்.

தைப்பூசத்தன்று சுவாமி, அம்பாளுடன் காவிரிக்கரையில் எழுந்தருளுகிறார். ஆடிக்கிருத்திகை மற்றும் பவுர்ணமி நாட்களில் கிரிவலம் செல்கின்றனர்.

பிரகாரத்தில் ஒரு தட்சிணாமூர்த்தி, விமானத்தில் வீணை தட்சிணாமூர்த்தி, கால்களை மாற்றி அமர்ந்த தட்சிணாமூர்த்தி என வித்தியாசமான வடிவங்களில்  குரு பகவானை தரிசிக்கலாம் ..!

ஆதிசேஷனும் வாயுவும் தத்தம் வல்லமையை நிலை நாட்டிட கடும் போரில் ஈடுபட்ட சமயம், ஆதிசேஷனால் முழுவதுமாக மூடப்பட்டிருந்த மேரு மலையிலிருந்து வைரம், சிவப்பு மணி, மரகதம், மாணிக்கம் மற்றும் நீலம் ஆகியவை சிதறி விழுந்தன. 

அவ்வாறு மரகதம் வீழ்ந்த இடமே திரு ஈங்கோயில் என்பர்.

இதன் காரணமாகவே இங்குள்ள மூலவர் மரகதாலேசுவரர் ஆனார்.

சிவபெருமான், அவர்களைச் சமாதானம் செய்து, மலையிலேயே மரகதலிங்கமாக எழுந்தருளினார்.

மரகத அசலத்தில் (மலையில்) எழுந்தருளியவர் என்பதால், "மரகதாசலேஸ்வரர்' என்ற பெயர் பெற்றார்.

இவருக்கு "திரணத்ஜோதீஸ்வரர்' என்ற பெயரும் உண்டு.

 மணமேடு
தொட்டியம் வட்டம்
திருச்சி மாவட்டம், 621209

சோழநாட்டுக் காவிரி வடகரைத்தலம். திருச்சிராப்பள்ளி - நாமக்கல் பேருந்து வழியில் அகண்ட காவிரியின் வடகரையிலுள்ளது.