“கோபாலா, கோவிந்தா’

வானாகி மண்ணாகி வளியாகி ஒளியாகி
ஊனாகி உயிராகி உண்மையுமாய் இன்மையுமாய்க்
கோனாகி யான் எனது என்று அவர் அவரைக் கூத்தாட்டு
வானாகி நின்றாயை என்சொல்லி வாழ்த்துவனே.

வேண்டத் தக்கது அறிவோய் நீ வேண்ட முழுதுந் தருவோய் நீ
வேண்டு மயன்மாற் கரியோய் நீ வேண்டி யென்னைப் பணிகொண்டாய்
வேண்டி நீ யாதுஅருள் செய்தாய் யானு மதுவே வேண்டினல்லால்
வேண்டும் பரிசொன் றுண்டென்னில் அதுவும் உன்றன் விருப்பு அன்றே.

கிருஷ்ண பகவான் ராஜசூய யாகத்திற்காக புருஷாமிருகத்தின் (வியாக்பாத மகரிஷி) பால் கொண்டு வர, பஞ்சபாண்டவர்களில் ஒருவராகிய பீமனிடம் வேண்டி 12 ருத்திராட்சங்களை பீமனிடம் கொடுத்து, புருஷாமிருகம் சிறந்த சிவபக்தி உடையது. அது திருமாலின் நாமத்தைக் கேட்டால் சினம் கொள்ளும் என்றும் கூறி எச்சரித்தார். 

புருஷா மிருகத்தால் ஆபத்து வரும் தருவாயில், ஒரு ருத்திராட்சத்தைத் தரையில் போட்டுவிட்டு ஓட வேண்டும், என்று கூறி கிருஷ்ணன் 
பீமனை வழியனுப்ப வைத்தார். 

பீமனும்,  புருஷாமிருகத்தைத் தேடி வந்து  திருமலையின் அடர்ந்த காட்டுப்பகுதியில் புருஷாமிருகம் சிவனை நோக்கி கடும் தவம் இருக்கும் புருஷாமிருகத்திடம் “கோபாலா, கோவிந்தா’ என்று திருமாலின் நாமத்தை பீமன் கூற, சினமடைந்த புருஷாமிருகம் பீமனை விரட்ட. கிருஷ்ணன் கூறியதைப் போல ஒரு ருத்திராட்சத்தைத் தரையில் போட்டுவிட்டு  பீமன் ஓட  ருத்திராட்சம் சிவலிங்கமாக உருவாகியது. 

உடனே, புருஷாமிருகம் சிவலிங்கத்தை பூஜை செய்துவிட்டு
பீமனை விரட்டியது. 

இதுபோன்று, 11 ருத்திராட்சங்களையம் தரையில் போட்டு விட்டு, நிறைவாக நட்டாலம் பகுதியில் ருத்திராட்சம் போட  அங்கு தோன்றிய சிவலிங்கத்தில் சிவனும், விஷ்ணுவும் ஒன்றாகத் தோன்றி ஹரியும், ஹரனும் ஒன்றே என்பதை உலகிற்கு உணர்த்தினர். 

நட்டாலம் ஆலயத்தில் மூலவர் சங்கரநாராயணராக காட்சி தருகிறார். 

இங்கு ஒரே விக்ரகத்தில், ஒரு பாதியில் சிவன் உடுக்கையுடனும், மறுபாதியில் விஷ்ணு சக்ராயுதத்துடனும் காட்சி தருகின்றனர். 

இந்த நிகழ்ச்சியினை, பக்தர்கள் ஆண்டு தோறும் சிவாலய
ஓட்டமாக ஒடுகின்றனர். 

சிவாலய ஓட்டம் நடைபெறும் 12 சிவாலயங்களும் விளவங்கோடு,
கல்குளம் தாலுகாவில் அமைந்துள்ளன.

 முன்சிறை திருமலை மகாதேவர் கோயில், 

திக்குறிச்சி சிவன் கோயில், 

திற்பரப்பு மகாதேவர் கோயில், 

திருநந்திக்கரை நந்தீஸ்வரர் கோயில், 

பொன்மனை தீம்பலான்குடி மகாதேவர் கோயில், 

திருப்பன்னிப்பாகம் சிவன் கோயில், 

கல்குளம் நீலகண்ட சுவாமி கோயில், 

மேலாங்கோடு சிவன் கோயில், 

திருவிடைக்கோடு மகாதேவர் கோயில், 

திருவிதாங்கோடு மகாதேவர் கோயில், 

திருப்பன்றிகோடு மகாதேவர் கோயில், 

திருநட்டாலம் சங்கரநாராயணர் கோயில் என வரிசையாக 12 சிவாலயங்கள் இந்த சிவாலய ஓட்டத்தில் இடம் பெறுகின்றன. 

சிவாலயங்களில் சிவராத்திரிக்கும் முன்தினம் மாலை முதல் பக்தர்கள் “கோபாலா, கோவிந்தா’ என்ற கோஷத்துடன் ஓடி தரிசனம் செய்கிறாகள்... 

 12 சிவாலயங்களையும் பெரும்பாலான பக்தர்கள் ஓடியே தரிசிக்கின்றனர். முன்சிறை திருமலை மகாதேவர் கோயிலில் இருந்து துவங்கி திருப்பன்றிகோடு மகாதேவர் கோயில் வரை உள்ள 11 கோயில்களிலும் பக்தர்களுக்குப் பிரசாதமாக திருநீறு வழங்கப்படுகிறது. 

நட்டாலம் சங்கரநாராயணர் கோயிலில் பிரசாதமாக 

சந்தனம் வழங்கப்படுகிறது.