Sunday, October 6, 2013

நலம் நல்கும் நவராத்திரி



நவராத்திரி சுபராத்திரி நவராத்திரி சுபராத்திரி
அலைமகளும் கலைமகளும் கொலுவிருக்கும் ராத்திரி
மலைமகளும் சேர்ந்து நம்மை மகிழவைக்கும் ராத்திரி

சிவனுக்கு உகந்தது சிறப்பான சிவராத்திரி. 
அவர் தம் தேவியர்க்கு உகந்தது நவராத்திரி.
கன்னியர்க்கு ஒன்பது நாள் நவராத்திரி

நவம்’ என்ற சொல் நவ நவமாய் பெருகும்’ நவக்கிரகங்கள்,  நவரத்தினங்கள், நவதானியங்கள், நவயோகங்கள், நவரசங்கள், நவபாஷாணங்கள், நவகற்பங்கள், நவமேகங்கள், நவநிதிகள் என ஒன்பதின் பெருக்கத்தை விசேஷமாக கூறுவார்கள். 
நாடு முழுவதும் ஒன்பது நாட்களுக்கு விமரிசையாக கொண்டாடப்படும் நவராத்திரி பண்டிகை சிறப்பானது. 

புரட்டாசி மாதம் அமாவாசைக்கு பிறகு பூர்வ பட்ச பிரதமை திதியில் ஆரம்பித்து நவமி திதியில் முடியும் ஒன்பது இரவுகளே நவராத்திரி ஆகும். 

நவராத்திரி  நமது பண்பாடு, கலை, கலாசாரம் போன்றவற்றை பிரதிபலிக்கும் விழாவாக  பெண்களை முன்நிறுத்தி கொண்டாடப்படும் பண்டிகையாகும்.
சக்தி தேவியான அம்பாளை பிரார்த்தித்து அவள் அருள் வேண்டி
ஒன்பது ராத்திரிகள் விரதம் இருந்து வணங்குவதே சிறப்பு.

இச்சா சக்தி, ஞான சக்தி, கிரியா சக்தி (இச்சை என்றால் விருப்பம், ஞானம் என்றால் அறிவு, கிரியா என்றால் செய்தல்) என்ற முப்பெரும் தேவிகளை வணங்குவதே நவராத்திரியின் சிறப்பாகும்.

இதற்கு சாரதா நவராத்திரி என்றும் பெயர் உண்டு. 

நவராத்திரி பண்டிகை முடிந்து வரும் தசமி திதியை
‘விஜயதசமி’ என்று கொண்டாடி நிறைவு செய்கிறோம். 
சுபகாரியங்கள் செய்ய விலக்கி வைக்கும் பிரதமை, அஷ்டமி, நவமி ஆகிய திதிகளையும் சிறப்பிப்பதற்காகவும், எல்லா திதிகளிலும் இறைவன் அம்சம் உளளது என்பதை உணர வைப்பதற்காகவும், நவராத்திரியில் இந்த திதிகளுக்கு முக்கியத்துவம் தரப்பட்டுள்ளது. 

நவராத்திரியில் வரும் நவமி நாள் ஆயுத பூஜை , சரஸ்வதி பூஜை என்றும் கொண்டாடப்படுகிறது. 

மாணவர்கள் புத்தகங்கள், நோட்டு, பேனா, பென்சில் போன்றவற்றை வைத்து வணங்குவார்கள். கடைகள், அலுவலகங்கள், தொழிற்சாலைகள் என்று எல்லா துறைகளில் இருப்பவர்களும் ஆயுத பூஜையை விமரிசையாக கொண்டாடுவார்கள். 
நவராத்திரியில் வரும் தசமி நாள் விஜயதசமி என கொண்டாடப்படுகிறது. இந்நாளில் தொடங்கப்படுகின்ற எந்த செயலும் வெற்றிகரமாக முடியும் என்பது ஐதீகம். 
இந்நாளில் ஞானம், வித்தை, கல்விக்கு அதிபதியான சரஸ்வதி தேவியை வணங்குவதால் எல்லா வளமும், நலமும் வந்து சேரும். 
விஜயதசமி நாளில் கல்வி கற்கவும், புது கணக்கு ஆரம்பிக்கவும், முக்கிய பேச்சுவார்த்தைகள், ஒப்பந்தங்கள் போடுவதற்கும் இயல், இசை, நாடகம், நாட்டியம் போன்ற கலைகள் விருத்தியடைய வழிபடுவது மிகவும் உகந்ததாகும். 


Saturday, October 5, 2013

சௌபாக்யங்கள் வர்ஷிக்கும் நவராத்ரி




ஆத்தாளை, எங்கள் அபிராம வல்லியை, அண்டம் எல்லாம்
பூத்தாளை, மாதுளம் பூ நிறத்தாளை, புவி அடங்கக்
காத்தாளை, ஐங்கணைப் பாசங்குசமும் கருப்புவில்லும்
சேர்த்தாளை, முக்கண்ணியைத், தொழுவார்க்கு ஒரு தீங்கில்லையே.

என லலிதா சஹஸ்ரநாமத்திற்கு இணையான அபிராமி அந்தாதியில் சகல செல்வங்களும் தரும் இமய கிரிராச தனையை அன்னை அபிராமியை வணங்கிப்போற்றி  சௌபாக்யங்கள் வர்ஷிக்கும் நவராத்ரி தினங்களை ஒன்பது நாட்களும்  கொலுவைத்து கோலாகலமாய் கொண்டாடிக்களிப்போம் ..

நவராத்திரி என்றாலே சக்தியை வழிபடுவது என்பது தான் அர்த்தம்.

உலகம் அனைத்தும் சக்தி மயம் என்பதை விளக்குவதே நவராத்திரியின் முக்கிய தத்துவம் ...

சர்வ வல்லமை படைத்த பராசக்தி  நவராத்ரி விரதத்தால்  மகிழ்ந்து 
சகல சௌபாக்கியங்களும்  அருள்கிறாள்..!..
புரட்டாசி மாதத்தில் நவக்கிரகங்களில் நாயகமாக உள்ள சூரியன், 
கன்னி இராசியில் சஞ்சரிக்கும்  தட்சணாயண காலமாகும்.

அக்டோபர், நவம்பர் மாதங்கள் மழை, குளிர் காலம் நம் நாட்டில் நிலவுவதால்  இந்த காலத்தில் உடல் சோர்வைத் தரக்கூடிய நோய்க் காரணிகள் அதிகம் என்பதால்  பெண்களுக்கு புரதச் சத்து தேவைப்படும். 

புது வாழ்வு பிறக்கும் புரட்டாசி மாதத்தில் நவராத்திரி நாட்களில் விதவிதமான புரதச்சத்து நிறைந்த பயறு வகைகளை   ஒன்பது நாட்களிலும் 9 வகையான பயறு வகைகள், பழங்களை அம்மனுக்கு பிரசாதங்களாக படைத்து, அவற்றை மற்றவர்களுக்கும் வழங்குவதை வழக்கமாகக் கொண்டு பண்டிகையாகக் கொண்டாடி  உடம் நலத்தைப் பேணி வந்துள்ளது மருத்துவ ரீதியிலும் ,கொலு வைத்து கொண்டாடும் பண்டிகை விஞ்ஞான ரீதியாகவும் நன்மையைத் தருகிறது


நவராத்திரி வழிபாடு சக்தி மகிமையை விளக்கும்  முதன்மைத்  தேவைகளான கல்வி, செல்வம், வீரம்  என்கிற மூன்றையும் வேண்டி அவற்றுக்கு அதிபதிகளான சரஸ்வதி, லஷ்மி, துர்கை என்று மூன்று சக்தி அம்சங்களையும் வழிபடுதலே  விரத்தின் நோக்மாகும். 

முதல் மூன்று நாட்களில் வீரத்தையும், தைரியத்தையும் 
வேண்டி பராசக்தியை வழிபடுதல் வேண்டும்..

அடுத்த மூன்று நாட்களும் செல்வத்தை வேண்டி 
மஹாலஷ்மியை வழிபடவேண்டும். 

இறுதி மூன்று நாட்களும் கல்வி, அறிவு, சகல கலை ஞானங்கள் என்பவற்றை வேண்டிச் சரஸ்வதி தேவியை வழிபட வேண்டும். 

நவராத்திரியின் ஒன்பதாம் நாளாகிய மஹாநவமியன்று சரஸ்வி பூஜை -கலைமகள் விழா - ஆயுத பூஜை என- சிறப்பிடம் பெறுகிறது 

புத்தகங்கள் சரஸ்வதி தேவியின் உறைவிடம், கலைப் பொருட்கள், இசைக்கருவிகள், தொழிற்கருவிகள் முதலிய ஆயுதங்களுக்கும் அதிபதி அவளே. அதனால் மஹாநவமியான   9வது நாள் இவற்றை பூஜையில் வைத்து வழிபடுகிறோம் ..!