நந்திக் கல்யாணம் கண்டால் முந்திக் கல்யாணம்

அப்பனை நந்தியை ஆரா அமுதினை 

ஒப்பிலி வள்ளலை ஊழி முதல்வனை 

எப்பரிசு ஆயினும் ஏத்துமின் ஏத்தினால் 

அப்பரிசு ஈசன் அருள் பெறலாமே 

- திருமூலவர் திருமந்திரம்

புத்திரபாக்கியம் வேண்டி சிவபெருமானை நோக்கி கடுந்தவம் புரிந்த சிலாதமுனிவரது தவத்துக்கு இரங்கிய சிவபெருமான் அருளால் பிறந்தவர்  நந்தி பகவான்..

மகன் பிறந்த மகிழ்ச்சியை  முழுமையாக அனுபவிக்க முடியாமல்.  பிள்ளைக்கு ஆயுள் எட்டு வருடங்கள்தான் என்று நிபந்தனை விதித்திருந்தார் சிவபெருமான்.

பெற்றோரின் கவலை  உணர்ந்த சிறுவனான நந்தி காரணம் அறிந்து. "கவலை வேண்டாம்' என்று அவர்களை ஆறுதல்படுத்திய நந்தி, தனியே சென்று சிவனைக் குறித்து தவம் மேற்கொண்டான். 

சிவனருளால் பூரண ஆயுள் பலமும், கயிலைக்கே காவலனாகும் பேறும் பெற்றான். அதனால் அதிகார நந்தி என பெயரும் பெற்றான்.

நந்தியை சிவபெருமான் தன் மகனாகவே ஏற்றுக்கொண் டார். 

உரிய வயதில் அவனுக்குத் திருமணம் செய்து வைக்க எண்ணிய சிவன், வசிஷ்ட முனிவரின் பேத்தியை மண மகளாகத் தேர்ந்தெடுத்து, பங்குனி மாத பூச நட்சத்திர நாளில் திருமழபாடியில்  கோலாகலமாக சிறப்பாகத் திருமணம் செய்து வைத்தார்.

 பார்வதியும் பரமேஸ்வரனும் திருவையாறிலிருந்து பல்லக்கில் வருவர். நந்தி மாப்பிள்ளை கோலத்தில், வெள்ளியாலான தலைப்பாகை அணிந்து, கையில் செங்கோல் ஏந்தி, குதிரை வாகனத்தில் மேளதாளங்கள் முழங்க வைத்தியநாதன்பேட்டை வழியாகத் திருமழபாடி வருவார். 

திருமண விழா முடிந்ததும் புனல்வாசல் வழியாக திருவையாறு திரும்பிச் செல்வர். இதைத்தான் "வருவது வைத்தியநாதன்பேட்டை; போவது புனல்வாசல்' என்பர்.

நந்தி திருமணத்தின்போது பல தலங்களிலிருந்து பல பொருட்கள் வந்தன. 

திருவேதிக்குடியிலிருந்து வேதியர்கள் வந்தனர். 

திருப்பழனத்திலிருந்து பழ வகைகள் வந்தன. 

திருப்பூந்துருத்தியிலிருந்து மலர் மாலைகள் வந்தன. 

திருநெய்த் தானத்திலிருந்து யாகத் திற்கும் சமையலுக் குமான நெய் வந்தது. 

திருச்சோற்றுத் துறை யிலிருந்து அறுசுவை அன்ன வகைகள் வந்தன. 

இந்தத் தலங்க ளெல்லாம் திருமழ பாடியைச் சுற்றி அமைந்துள்ளன.

நந்தி திருமண விழா காணும் திருமணமாகாத ஆண்களுக்கும் பெண்களுக்கும் விரைவில் திருமணம் கூடி வரும் என்பர். 

"நந்திக் கல்யாணம் கண்டால் முந்திக் கல்யாணம்' என்பது சொல் வழக்கு. விழாவைக் காண்போர் இல்லத்தில் மகிழ்ச்சியும் ஒற்றுமையும் நிலவும்;சுபகாரியங்களும் நடை பெறும் .

சிவாலயங்களில் கர்ப்பக்கிரகத்திற்கு எதிரில் கம்பீரமாக அமர்ந்திருக்கும் நந்திதேவர் தருமவிடை எனப்படுகிறார்..!

அழிவே இல்லாத தருமம். விடை (ரிஷபம்) வடிவில் இறைவனிடத்தில் சென்றடைய, அந்த நந்தியின் மீது ஈஸ்வரன் அமர்ந்திருக்கிறார். 

தருமம் இறைவனைத் தாங்குகிறது. 

நந்தி விடும் மூச்சுக்காற்றுதான் சிவபெருமானுக்கு உயிர்நிலை தருகிறது. 

இதனால்தான் மூலவரின் தொப்புள் பகுதியை உயிர் நிலையாகக் கொண்டு, அதன் நேர்க்கோட்டில் நந்தியின் நாசி அமையுமாறு அமைக்கப்படுகிறது. 

இந்த மூச்சு தடையேதுமின்றி மூலவரைச் சென்றடையத்தான் நந்தியின் குறுக்கே போவதும் விழுந்து வணங்குவதும் கூடாது என்பது வழக்கத்தில் இருக்கிறது. ..!

பிரதோஷ காலங்களில் நந்தியின் கொம்புகளுக்கிடையில் சிவ தரிசனம் பெறுவதும் ,நந்தி வாகன சேவையும் மிகவும் விஷேசமான பலன்களைத் தரும்.