உயிர்களை உய்விக்கும் உஜ்ஜீவநாதர் கோவில்

 ஓம் ருத்ரம் பசுபதிம் ஸ்தாணும் நீலகண்டம் உமாபதிம்

நமாமி சிரஸா தேவம் கிம்னோ ம்ருத்யுகரிஷ்யதி!

காலகண்டம் கால மூர்த்திம் காலாக்னிம் கால நாசனம்

நமாமி சிரஸா தேவம் கிம்னோ ம்ருத்யுங்கரிஷ்யதி!

-- மார்க்கண்டேயர் அருளிய மார்க்கண்டேய ஸ்தோத்திரத்தை 

தினமும் பாராயணம் செய்பவர்களுக்கு எமபயம் நீங்கும். 

நீண்ட ஆயுள் உண்டாகும்.

.

16 வயது முடிவில் தனது உயிரை எடுக்க எமதர்மன் வருவான் என்பதை உணர்ந்த மார்கண்டேயர், சிவ தலங்கள் பலவற்றிற்கும் சென்று சிவபெருமானை பூஜித்து வந்தார். 

அதன் ஒரு பகுதியாக திருச்சியில் இருந்து குமாரவயலூர் செல்லும் வழியில் 4 கிலோமீட்டர் தொலைவில் உய்யக்கொண்டான் திருமலை தலத்தில் உள்ள உஜ்ஜீவநாதர் கோவில் தலம் வந்த மார்கண்டேயருக்கு, ஈசன் காட்சி கொடுத்து, மார்கண்டேயரின் உயிரைக் காப்பாற்ற வரம் கொடுத்த தலமாகும். பின்பு திருக்கடவூரில் ஈசன், எமனை அழித்து மார்கண்டேயரின் உயிரைக் காப்பாற்றினார்.

 :

சிவ தலங்கள் தோறும் தன்னை பூஜித்து வந்த மார்கண்டேயரின் பக்தியை மெச்சி, ஆடி பவுர்ணமி நாளில் ஈசன் உஜ்ஜீவநாதர் கோவில் தல கருவறையை விட்டு வெளியே வந்து மார்கண்டேயருக்கு காட்சி கொடுத்தார். 

மார்கண்டேயரது உயிரைக் காப்பதாகவும் வரம் கொடுத்தார். மார்கண்டேயருக்காக ஈசன் கருவறையை விட்டு வெளியே வந்ததற்கு அடையாளமாக, சுவாமியின் திருப்பாதம்,  ஆலயத்தில் ஈசனின் கருவறைக்கு இடது புறம் உள்ள கொடிக்கம்பத்தின் கீழே அமைந்திருக்கிறது. 

மார்கண்டேயருக்கு, ஆடி பவுர்ணமி இரவில் சிவபெருமான் காட்சி கொடுத்ததால், அந்த நாளில் இங்குள்ள சிவனுக்கு சிறப்பு அபிஷேகங்களும், விசேஷ பூஜைகளும் நடைபெறும். 

பின்பு மார்கண்டேயருக்கு, ஈசன் காட்சி கொடுக்கும் நிகழ்வு நடத்தப்படும். 

ஒவ்வொரு மாத பவுர்ணமி அன்றும்,  ஈசனுக்கு சிறப்பு அபிஷேகங்கள் நடைபெறுவது வழக்கமாக உள்ளது. உயிர்களை உய்விக்கும் பொருட்டு உஜ்ஜீவநாதர் கோவில் தலத்தில் ஈசன் எழுந்தருளியுள்ளதால், ‘உய்யக்கொண்டான் திருமலை’ என்ற பெயரை பெற்றுள்ள இத்தலத்தின் புராணக்கால பெயர் திருக்கற்குடி என்பதாகும். 

இறைவன் சுயம்பு மூர்த்தியாக எழுந்தருளியுள்ள சிறப்புக்குரிய உய்யக்கொண்டான் திருமலை’   ஆலயத்தில் வீற்றிருக்கும் இறைவனுக்கு உஜ்ஜீவநாதர்,கற்பக நாதர், விழுமிய நாதர், முத்தீசர், உச்சிநாதர் போன்ற பெயர்களும் உள்ளன.  

 உடனுறை சக்தியாக வீற்றிருக்கும் ‘மைவிழியம்மை’ என்னும் அஞ்சனாட்சி அம்பாள்  அன்னையை ‘மையார் கண்ணி’ என்று சுந்தரமூர்த்தி சுவாமிகள் போற்றிப் புகழ்ந்துள்ளார். 

மற்றொரு அம்பிகை ‘ஸ்ரீபாலாம்பிகை’ என்ற திருநாமத்தில் 

வீற்றிருந்து அருள்பாலிக்கிறார். 

 அஞ்சனாட்சி அம்மனை வழிபட சகல விதமான கண் சம்பந்தப்பட்ட நோய்களும் குணமாகும் என்பது நம்பிக்கை. 

அப்பர், சம்பந்தர், சுந்தரர் ஆகியோரது பாடல் பெற்ற தலம். நாரதர், உபமன்யு முனிவர், மார்கண்டேயர், கரன், திரிசிரன், அருணகிரிநாதர் ஆகியோர் வழிபட்டு பேறு பெற்ற தலம் என்ற சிறப்புகளை பெற்றுள்ள ஆலயம், சிறிய மலைக்கோவில் மலையின் மீது கிழக்கு நோக்கியபடி ஆலயம் அமைந்துள்ளது. 

மலையில் செதுக்கப்பட்ட 64 படிகளை ஏறிக் கடந்து, ஆலயத்தை அடையலாம். தருமபுரம் ஆதீனத்தின் கீழ்  கோவில் இருக்கிறது. இந்த ஆலயத்தை நந்திவர்மப் போத்தரையன் என்ற பல்லவ மன்னன் கட்டியுள்ளார். 

ஆலயத்தில் ‘இடர் காத்தார்’ என்ற பெயரில் சிவலிங்கம் ஒன்று தனிச் சன்னிதியில் உள்ளது. ராவணனுடைய சகோதரர்களில் ஒருவரான கரன் என்பவன் இந்த சிவலிங்கத்தை வழிபட்டு பேறு பெற்றுள்ளான். 

நமது இடர்களை களைவான் இந்த கயிலைநாதன். கோபுர வாசலின் உள்ளே நுழைந்து சென்றால், நேராக ஆறுமுகப் பெருமானின் சன்னிதியும், தென் புறம் ஞானவாவி (முத்தி தீர்த்தம்) என்று அழைக்கப்படும் திருக்குளமும் உள்ளது.  கோவில் பிரகாரம் ‘ஓம்’ என்னும் பிரணவ வடிவில் அமைந்திருப்பது விசேஷமானது. 

பிச்சாடனர், சந்திரசேகரர், அர்த்தநாரீஸ்வரர் சன்னிதிகளில் வேண்டிக்கொண்டால் நினைத்தது நிறைவேறும் என்பது   நம்பிக்கை.  கருவறையை அடுத்துள்ள உட்பிரகாரத்தில் இருக்கும் பிச்சாடனர் வரப் பிரசாதியாக திகழ் கிறார். அவரது இடையில் படம் எடுக்கும் பாம்பு, இடக்காலை ஊன்றி, வலக்காலை சற்று உயர்த்தியபடி காட்சியளிக்கிறார். 

அவரது இடதுபக்கம் குட்டி பூதம், வலது பக்கம் மேல் நோக்கி தாவும் மான் என மிக அழகிய திருக்கோலத்தில் பிச்சாடனரின் திருக்காட்சி அமைந்துள்ளது. மூலவர் கருவறையின் பின்புறம், அர்த்தநாரீஸ்வரர் காளையின் பின்னணியுடன் அற்புதத் திருக்கோலம் கொண்டு அருள்கிறார். பங்குனி மாதத்தில் ஆலயத்தில் பிரம்மோற்சவ விழா நடைபெறுகிறது. 

உஜ்ஜீவ நாதருக்கு பாலாபிஷேகமும், அவரது திருப்பாதத்திற்கு பானமும் படைத்து வேண்டிக்கொண்டால் நீண்ட ஆயுள் கிடைக்கும். சுவாமியின் திருப்பாதத்திற்கு பானகம் படைத்து வழிபடுவது, பிறத் தலங்களில் காண இயலாதது. மேலும் ஈசனுக்கு நெய், மிளகு, சீரகம் சேர்க்கப்பட்ட அன்னம் படைத்து வழிபட்டால், தீராத நோய்களும் குணமாவதுடன், தீர்க்காயுள் கிடைக்கும் என்று கூறப்படுகிறது. 

: 

 வசந்த மண்டபத்தில் ஆறுமுகப் பெருமானுக்கு, ஈசன் ஆறுமுகங்களின் தத்துவங்களை உபதேசம் செய்ததாக ஐதீகம். இங்கு வந்து இரட்டை பிள்ளையாரை வழிபட்டு, ஆவுடை மேல் உள்ள முருகப்பெருமானுக்கு அபிஷேக, அர்ச்சனைகள் செய்து வழிபட்டால், தந்தை– மகன் உறவு பலப்படும். 

 எம பயம் இல்லாதிருக்கும் வகையில், தெற்கில் கொடிமரமும், அதன் அருகில் சிவனுடைய மழு முதலிய படைகளும் வைக்கப்பட்டுள்ளன. 

ஈசனையும், அம்பாளையும் வழிபட உயிருக்கு வந்த ஆபத்து நீங்கி விடும். 

பொன்னொளி ஓடை என்னும் வற்றாத தீர்த்தம், குடமுருட்டி ஆறு, ஆலயத்தின் தெற்கே நான்காம் பிரகாரத்தில் உள்ள மூர்த்தி தீர்த்தம், வடக்கில் உள்ள எண்கோணக் கிணறு தீர்த்தம், மூன்றாம் பிரகாரத்தில் உள்ள நாற்கோண தீர்த்தம் என இந்த ஆலயத்தில் 5 தீர்த்தங்கள் உள்ளன.

குவலயம் காக்கும் சிவனுக்கு குவாய் தீவில் ஆலயம்

 பசிபிக் பெருங்கடலில் இருக்கும் ஹவாய்   8 தீவுகள் அடங்கிய  தீவு கூட்டத்தின் கடைசியில் இருக்கும் குட்டி தீவு குவாய் (KUHAI). ஓரு மிதக்கும் இலையின் வடிவில் இருக்கும் இந்த  அழகானதீவு முழுவதும் பரவியிருப்பது  பலவிதமான மலர்கள்.மலர்ந்து மணம் வீசுவதால்  மலர் தோட்ட தீவு அழைக்கப்படும் எழில் கொஞ்சும் இடத்தில் நடராஜருக்கு   கோவில் அமைந்திருக்கிறது..

அங்கு வழிபடப்படும் ஸபடிகலிங்கத்திற்காக  மற்றொரு பிரமாண்டமான கோவிலும் அருகில்  எழுந்து கொண்டிருகிறது. 

 சிவ யோகஸ்வாமி என்ற சிவாச்சாரியர்.   உபதேசித்து தீட்சை பெற்ற  அருளாசியால் ஞானம் பெற்று இந்து மதத்தின் மீதும் ஈர்ப்பு கொண்ட அமெரிக்கர்  - உலகின் பலநாடுகளில் பயணித்து இறுதியில் ஹவாய் தீவுக்கு  வந்த போது இங்கு  சிவபெருமான் வாழ்ந்ததை உணர்ந்திருக்கிறார். .  

தான் சிவனை கண்ட இந்த இடத்தில்  வழிபட ஒரு கோவிலையும், அதை முறைப்படி நிர்வகிக்க ஒரு ஆதினத்தையும் உருவக்கினார்.

 31 ஆண்டுகள் சிவாய சுப்ரமணி ஸ்வாமியாக  அவர் வாழ்ந்த இந்த இடம்  படிப்படியாக வளர்ந்து இன்று 363 ஏக்கரில் பரந்து விரிந்திருக்கிறது. 

 இவர் கலிபோர்னியாவில் பிறந்த அமெரிக்கர். பள்ளி மாணவனாக இருந்த போதே குருவால் அடையாளம் காணப்பட்டு வளர்க்கபட்டவர்.    

அமெரிக்கர், ஐரோப்பியர் போன்ற பலநாட்டினர்  இந்த ஆதினத்தின் மரபுகளுக்கேற்ப இந்துவாகி இங்கு வருகின்றனர், வழிபடுகின்றனர்.. உலகின் பல நாடுகளில் இவரை குருவாக ஏற்ற இந்துக்கள் இருக்கின்றனர்.  வழிபாட்டு மன்றங்களும் இருக்கின்றன.  மொரிஷிசியஸ் நாட்டில் ஒரு கோவிலையும் நிறுவயிருக்கிறார்கள்.

கேரளகோவில் பாணியில் சரிவான கூரையிட்ட உயரமான கட்டிடத்தில் கோவில். சன்னதியில் கம்பீரமாக நடராஜர். அதன் முன்னே நுழைவாயிலில்  தனி மண்டபத்தில் பெரிய நந்தி. அருகே தாமரை பூத்த தாடகம். நுழையும் முன் தடாகத்தில் கால் அலம்பிகொண்டபின்  நந்தியாரை வலம் வந்த பின்னர் சன்னதிக்கு போக வேண்டும், 

வாசல் கதவு அருகிலேயே சந்தனமரத்தில் வடித்த வினயாகர்.  சன்னதிக்கு போகும் முன் கடக்கும் நீண்ட கூடத்தின் இருபுறமும் நாட்டியத்தின் 108 கர்ணங்களை காட்டும் நடராஜரின் பிரபஞ்சநாட்டியவடிவங்களில் சிறிய சிலைகள். தங்கத்தில் மின்னுகின்றன. இந்த கோவிலை நடராஜர் கோவில் என சொல்லுவதில்லை. ”கடவுள் கோவில்” என அழைக்கிறார்கள்

  

சன்னதியில் நடராஜர் முன்னே ஸ்படிக லிங்கம் தினசரி காலயில் அபிஷகம் பூஜை... சன்னதிக்கு  இருபுறமும் பெரிய அளவில் பிள்ளையார், முருகன் சன்னதிகள்  தினசரி காலையில்  9 மணிக்கு வரும் பக்தர்களுக்காக பூஜை .  சமஸ்கிருத மந்திரங்களை ஸ்பஷ்ட்டமாக சொல்லும் அமெரிக்க ஐரோப்பிய அர்ச்சகர்கள். தமிழக சிவன் கோவில் சம்பிராதயங்கள் கடைப்பிடிக்கபடுகின்றன,  

.மூன்று மணி நேர காலத்திற்கு ஒருவர் என தொடர்ந்து இவர்கள் சிவபூஜை செய்துவருகிறார்கள்.    1973ல் இந்த கடவுள் கோவிலில் பூஜைதுவங்கிய காலத்திலிருந்து விடாமல் தொடர்ந்து செய்யபட்டுவருகிறதாம். 

 நடராஜரின் பாதங்களுக்கு அருகில் வைத்து ஆராதிக்கப்படும்  3 அடி உயர ஸ்படிக லிங்கம் தான் உலகிலேயே உயரமான ஸ்படிகலிங்கமாம்.  இதற்கான ஒரு தனிக்கோவிலைத்தான் இப்போது கட்டிக்கொண்டிருக்கிறார்கள்.  அதற்கு ”இறைவன் கோவில்” என பெயரிட்டிருக்கிறார்கள்.  இறைவன், அல்லது கடவுள் என்பது தான் நம்மை காக்கும், உயர்ந்த சக்தி. கோவில் என்பது அந்த சக்தியின்  பல வடிவங்களின்  இருப்பிடம் அந்த வடிவங்கள்தான்  தெய்வங்கள் என்கிறார்கள்..

பசுஞ்சோலையாக இருக்கும் இந்த வளாகத்தின் ஒரு புறத்தில் இறைவனுக்கு கோவில் எழுந்து கொண்டிருக்கிறது. பெரும்பாலான பணி முடிந்தநிலையில் இருக்கும் இந்த கோவில் கணபதி ஸ்தபதியால் வடிவமைக்கபட்டது, இப்போது அவரது உதவியாளார்களால் தொடரப்படுகிறது. 

முக்கிய பகுதிகள் பங்களூர் அருகே இந்தகோவிலுக்கென்றே  ஏற்படுத்தபட்டிருக்கும் சிற்பசாலையில் உருவாக்க பட்டு இங்கே அனுப்படுகிறது. அவைகளை இணைத்து கோவிலை உருவாக்கும் பணியில் தமிழ் நாட்டிலிருந்து வந்த சிற்பிகள் ஈடுபட்டிருக்கிறார்கள். கோவிலின் தூண்கள், படிகட்டுக்கள் என ஒவ்வொரு பகுதியும் மிக நேர்த்தியுடனும், கலைநுணுக்கத்துடனும் வடிக்கபட்டுகொண்டிருக்கிறது 

கோவில் கட்டுமானத்தில் கற்கள் மட்டுமே-.   கான்கீரிட், சிமிண்ட் கிடையாது. சன்னதிக்கு தங்க விதானம்,  சுற்றுபுற நடைபாத தளகற்கள்  கூட பங்களுரிலிருந்து இறக்குமதி செய்யபடும் கற்கள்தான். 

கோவில்கள் ஹாவாய்தீவிலிருப்பதால் பக்தர்களைத்தவிர நிறைய டூரிஸ்ட்கள் வருகிறார்கள்.  ஒரு  சுற்றுலா சொகுசு கப்பல் இந்த கோவிலைக்காண்பிபதற்காகவே  இந்த தீவில் நிற்கிறது. 

கோவிலில் உணவோ, தங்க அனுமதியோ கிடையாது. அதனால் இந்த இறைவன் அருளால் அருகில் நிறைய ஹோட்டல்கள். ரிசார்ட்கள். இயற்கையாகவே வனப்பு மிகுந்த இந்த வனப் பகுதியை மேலும் அழகாக்கியிருக்கிறார்கள்  செயற்கை அருவி, நீர்தேக்கம் எல்லாமிருக்கும்  தோட்ட பகுதியை புனித காடு என அழைக்கிறார்கள்.  

ஆங்காங்கே பெரிய அளவில் கருங்கலில் தக்‌ஷணாமூர்த்தி, ஆஞ்னேயர்,  ஆறுமுகன் சிலைகள். ஹவாய் தீவுகளுக்ககே உரிய அழகிய மலர்கள் அனைத்தும் இங்கே இருக்கிறது. சில, உலகில் இந்த தீவில் மட்டுமே மலரும் அபுர்வமான வகைகள்.  இந்த தோட்டதின் மலர்கள்தான் பூஜைக்கு பயன்படுத்தபடுகிறது. 

ஒரு பகுதியில் காய்கறி  கீரைகள் தோட்டம், இங்கு வசிக்கும் ஸ்வாமிகளுக்கு தேவையான உணவு பொருட்களை இங்கேயே விளைவித்து கொள்கிறார்கள். இமய மலைப்பகுதியில் வளரும் உருத்திராட்ச மரம் இங்கே வளர்வது ஒரு ஆச்சரியம்.   ரூத்திராட்ச மரத்தின் பழங்கள் நீல வண்ணத்திலிருக்கிறது

. 

வெறும் வழிபாட்டு தலமாக மட்டும் இல்லாமல்  ஆதினம்  இந்து மதம், சைவசித்தாந்தம் குறித்து ஆராய்பவர்களுக்கு உதவியாக ஹிமாலயன் அகெடமி என்று ஒரு கல்வி நிறுவனத்தையும். ஹிந்துயிஸம் டுடே என்ற காலாண்டு பத்திரிகையும் நடத்துகிறது  

ஆதின தலைவர் ,ஸ்வாமிகள் எல்லாம்  ஆப்பிள் மெக்கிண்டாஷ் கம்ப்யூட்டர்கள், ஐபோன் சாட்லைட் போன் எல்லாம் பயன்படுத்தும்  ஹை டெக் பயன்பாடு கொண்டு  இருக்கிறார்கள்,  

இவர்களின் இணைய தளத்தின் மூலம் தலைவரின்  அருளுரைகளும் தினசரி ஒலிபரப்பபடுகிறது

உலகின் எந்த பகுதியில் வாழ்ந்தாலும் அங்கு தங்கள் கோவில்களை நிறுவி வழிபடுவது இந்தியர்களின்-தமிழர்களின் மரபு. ஆனால் இந்தியர்கள் மிக குறைந்த அளவிலியே இருக்கும் ஹவாய் தீவில்  ”அமெரிக்க இந்துக்கள்”  அழகான கோவிலை நிறுவியிருப்பது  ஆச்சரியம்

திருக்கார்த்திகை சங்காபிஷேகம்

ஒவ்வொரு வருட கார்த்திகை மாதத்தில் வரும் திங்கட் கிழமைகளில் சிவாலயங்களில் சங்காபிஷேகம் நடைபெறும்.

கார்த்திகை மாதத்தில் தீப ஒளியால் ஏற்படும் வெப்பத்தை நடுநிலைப்படுத்தவும் சிவரூபத்தை குளிர வைக்கவும் சங்கு அபிஷேகம் நடைபெறுகின்றது.

கடலில் இருந்து கிடைக்கும் சங்கு பாற்கடலில் இருந்து தோன்றிய சந்திரனின் அம்சமாகப் போற்றப்படுகின்றது.

சங்கினில் நிரப்படும் தீர்த்தம் மேலும் குளிர்ந்து அதைக் கொண்டு அபிஷேகம் செய்கையில் சிவபெருமான் மனம் குளிர்ந்து சந்திரனுக்கு வரம் அளித்ததைப் போல பக்தர்களுக்கு என்றும் வளமான வாழ்க்கையை அளிப்பார் என சாஸ்திரங்கள் போற்றுகின்றன.

 சங்கிலிருந்து பிரணவமாகிய ஓங்கார ஒலி எழுவது சிறப்பு..

 உலக நன்மைக்காகவும், மழைவளம் பெருகவும், கல்விச்செல்வம் அதிகரிக்கவும் வேண்டி ஆண்டுதோறும் கார்த்திகை மாத சோமவாரத்தில்  சிவ ஆலயங்களில் 1008 சங்காபிஷேகம் நடைபெறும்.

கார்த்திகை மாதம் திங்கள்கிழமை கடைபிடிக்கப்படும்  சோமவார விரதம் சிவனுக்கு மிகவும் உகந்த விரதம். 

சிவனின் தலையில் இருக்கும் சந்திரன் சோமவார விரதத்தை கடைபிடி சிவனுக்கு மிகவும் பிடித்தவனாகி சிவனின் தலையிலேயே இடம்பெற்றான்.

கார்த்திகை மாதத்தில் இறைவன் அக்னிப் பிழம்பாக இருப்பார். எனவே அவரை குளிர்விக்கும் பொருட்டு சங்காபிஷேகம் செய்வார்கள். 

சங்காபிஷேகம் செய்தால் அது தேவாமிர்தத்தால் சுவாமியை அபிஷேகம் செய்வதற்கு ஒப்பானது

திருக்கழுக்குன்றம் குளத்தில் உருவாக்கும் புனித சங்கு :

 அனைத்து சிவ தலங்களையும் வழிபட்டு விட்டு திருக்கழுகுன்றம் திரிபுரசுந்தரி சமேத வேதகிரீஸ்வரர் திருக்கோவிலுக்கு வருகை தந்த மார்க்கண்டேயர் பூஜை செய்யும்போது பூஜைக்குரிய தீர்த்தப் பாத்திரம் வேண்டி சிவனை நினைத்தார்.அப்போது சங்கு தீர்த்தக்குளத்தில் ஒரு அற்புதமான சங்கு கரை ஒதுங்கியது. 

சங்கை சிவபெருமானே பூஜைக்கு கொடுத்து அருள் புரிந்ததாக தல வரலாறு கூறுகிறது. 

இதனையடுத்து 12 ஆண்டுக்கு ஒருமுறை சங்கு தீர்த்தக் குளத்தில் சங்கு உருவாகிறது. இதனை புனித சங்காக பூஜையில் வைத்து பூஜித்து வருகிறார்கள்.

ஆண்டு தோறும் கார்த்திகை மாதம் கடைசி சோமவாரத்தில் வேதகிரீஸ்வரருக்கு 1008 சங்காபிஷேகம் நடைபெறும்போது சங்குதீர்த்தக்குளத்தில் உருவாகும் புனித சங்கு பூஜையில் முதன்மை பெறும். இந்த குளத்தில் குளித்தால் தோல் நோய் தீரும் என்பது நம்பிக்கை.

மதுரை, திருக்கடையூர், திருவாதவூர், திருவாடானை, திருவெண்காடு, திருவிடைமருதூர், திருச்சி, மயிலாடுதுறை, திருக்கழுக்குன்றம் மற்றும் பல சிவதலங்களில் கார்த்திகை மாத திங்கள்கிழமைகளில் 1008 சங்குகள் வைத்து பூஜித்து சிறப்பாக அபிஷேகம் நடத்தப்படுகிறது.

h