சித்திரைப் பொங்கல்..

ஈரோட்டில் ஒரு தெருவெங்கும் வேப்பிலைத் தோரணங்களாக கண்களைக் கவர்ந்தது..விசாரித்தோம்..

அலங்காரமாக தென்னை ஓலைகளாலும், வாழைப் பந்தல்களாலும் அந்தத்தெருமுனையில் அமைத்திருந்த மாரியம்மன் கோவிலுக்கு அழைத்துச்சென்று கூழ் குடிக்கிறீர்களா என உபசரித்தார்கள்..

 பக்கத்தில் அம்மனில் எதிரில் ஆடுபலியிட்ட தடயம் ..எனவே தயக்கம் ..!

 
அரிசி, கம்பு .ராகி மூன்றையும் அரைத்து மாவாக்கி கூழ்காய்ச்சி கொத்துமல்லி இலைகள், மாங்காய்த்துண்டுகள் , வெள்ளரிக்காய் துண்டுகள் சேர்த்து  வைத்திருந்தார்கள்.. உப்புப் போடமாட்டார்களாம்...
மற்றொரு பெரிய பாத்திரத்தில் சர்க்கரைப்பொங்கல் இருந்தது..
அந்தத்தெருவில் இருக்கும் வீடுகளில் இருந்து ஒவ்வொரு வீட்டுக்கும் 
600 ரூபாய் இந்த கொண்டாட்டத்திற்கு வசூலிப்பார்களாம்..

அந்தத்தெருவே திரண்டு மேளதாளத்துடன் காவிரி ஆற்றிற்குச்சென்று ஒரு கல்லை அம்மனாக பாவித்து பேழையில் வைத்து எடுத்து வருவார்களாம்..

அரிசி மாவில் அம்மனின் உருவம் செய்து சந்தனம் பூசி , 
மஞ்சள் குங்குமம் இட்டு அம்மனாக்குகிறார்கள்..

காவிரி ஆற்றிலிருந்து பக்தியுடன் தீர்த்தம் எடுத்து வந்த ஒரு கும்பத்தை பூச்சரங்கள் சுற்றி அம்மனுக்கு அருகில் வைத்து தங்கள் பிரார்த்தனைகளைவேண்டிக்கொள்க்கிறார்கள்..

பஞ்சலோகத்தால் ஆன அம்மன் சிலையையையும் அழகாக அலங்கரித்து வைத்திருந்தார்கள்..

அம்மை நோய் தாக்காமலிருக்கவும் , தொழில் வியாபார அபிவிருத்திக்காகவும் , உடல் நல மேம்பாடுகளுக்காகவும் மற்ற பிரார்த்தனைகளுக்காகவும் தெருமக்கள் கூடியிருந்து  சந்துபொங்கல் என்று கோலகலமாக கொண்டாடுகிறார்கள்..

வெயில் காலங்களில் இல்லங்களில் வெப்பத்தின் தாக்கம்அதிகமாக இருக்கும் என்கிற காரணத்தால் தெருவெங்கும் இடை வெளிவிடாமல் வேப்பிலைத்தோரணங்களால் குளிர்ச்சிப்படுத்தி  மக்களை தற்காலிகமாக அமைக்கப்பட்ட வாழைக்குலைகள் , தென்னை ஓலை, மாவிலை ,வேப்பிலைதோரணங்கள் கொண்ட இடத்தில் குழுமச்செய்து கூழ் வார்த்து குளிர்ச்சிப்படுத்தும் பண்பாட்டு நிகழ்வாகவும் இந்த சந்துப்பொங்கல் என்கிற நிகழ்ச்சி அமைக்கப்பட்டிருக்கலாம்..

ஒரே தெருவைச்சேர்ந்தவர்களின் ஒற்றுமையும் பலப்படுமே..!

அம்மனின் முன்னிலையில் கடாவெட்டு நிகழ்ந்த ரத்தத்தடயம் இருந்தது..அறுநூறு ரூபாய் கட்டியவர்களுக்கு ஒரு கிலோ ஆட்டுக்கறியாம்..

மற்றபடி பணம் கொடுத்தவர் கொடுக்காதவர் என்கிற பேதம்பார்க்காமல் அந்த தெருவாசிகள் அனைவருக்கும் பொங்கலும் , கூழும் விநியோகிப்பார்களாம்..!

விழா முடிந்த பின் அலங்கரித்த  அம்மனை பிரியாவிடை கொடுத்து மேளதாளத்துடன் கூடி மீண்டும் ஆற்றில் விட்டுவிட்டு வருவார்களாம் .

அப்புறம் அடுத்த சித்திரை மாததத்தில் கொண்டாட அழைத்து வருவார்களாம்..

அங்கே ஆப்பிரிக்காவிற்கும் ,சவூதி அரேபியாவுக்கும் ஏற்றுமதி செய்யப்படும் துணிவகைகளை பார்வையிட்டோம் ..

இருபக்கமும் அழகானபார்டர்களுடன் உயரம் குறைந்த சேலைகள் காட்சிப்பட்டன..ஆப்பிரிக்கப்பெண்களின் சாரங் என்னும் உடை அது..

அரேபியாவிலிருந்து  ரெகுலராக ஆர்டர் வருகிறதாம்.. முஸ்லீம்கள் தொழுகையின் போது விரிப்பாவும் , தோளில் ,தலையில் , இடுப்பில் அணிய என்று எட்டு துண்டு துணிகள் செட்டாக தேவைப்படுமாம்.. பத்து நாட்கள் நமாஸ் செய்யப் பயன்படுத்திவிட்டு நெருப்பில் போட்டு விடுவார்களாம்..

அந்த எட்டு துண்டுகள் கொண்ட செட் அவர்கள் செலாவணியில் ஒருடாலர் மதிப்பீடு என்றால் அதைத் துவைத்து சலவை செய்ய தேவைப்படும் தண்ணீரின் மதிப்பு இரண்டு டாலர்களாம்..

அங்கே தண்ணீர் பெட்ரேலைவிட மதிப்பு மிகுந்ததாயிற்றே.. எனவே துணிவகைகள் யூஸ் அண்ட் த்ரோ தானாம்..  துணி வியாபாரிகளுக்கும் ரெகுலராக ஆர்டர் கிடைக்க காரணமாவும் அமைகிறது..  
என்று பல நிகழ்வுகளை இனிமையாக பகிர்ந்துகொண்டார்கள்..!

                                        சமயபுர நாயகியே...பாடல்.. 

வீரபாண்டி சித்திரைத் திருவிழா

அசுரன் ஒருவனை வெல்வதற்காக சக்திதேவியின் அம்சமான 
அன்னை கௌமாரி  வைகை நதியின் கரையின் அடர்ந்த காட்டுப் பகுதியில் சிவலிங்கம் செய்து அதன்முன் தவமியற்றி வந்தார்.

இதையறிந்த அசுரன் கௌமாரியை கடத்திச் செல்ல முயன்றதைத் 
தன் ஞானதிருஷ்டியால் உணர்ந்த கௌமாரி 
அருகிலிருந்த அருகம்புல்லை எடுத்து அசுரனை நோக்கி வீசினாள்.

அந்த அருகம்புல் முக்கழுப்படையாக உருவெடுத்து அசுரனை இரண்டாகப் பிளந்து கொன்றதைப் பார்த்த தேவர்கள் வானிலிருந்து மலர்களைத் தூவினர்.

அன்னை  பூஜித்து வந்த சிவலிங்கத்திற்கு "திருக்கண்ணீசுவரர்" 
எனப் பெயரிட்டாள்.

மதுரையைத் தலைநகராகக் கொண்டு ஆண்ட  பாண்டிய நாட்டின் மன்னன் வீரபாண்டியன் தனது ஊழ்வினைகளால் இரண்டு கண்களின் பார்வையை இழந்தான்.

 பார்வை வேண்டி தவம் மேற்கொண்ட அரசன் முன்பு, ஈசன் தோன்றி. ‘தென்பாண்டி சீமையில் முல்லையாறு பாயும் ஊரில் கண்ணுடைய தேவி தவம் கொண்டுள்ளாள். அம்மன் அமர்ந்துள்ள திசையில் எனக்கு கோயில் எழுப்பு, தேவி மனம் மகிழ்ந்து உனக்கு ஒரு கண் பார்வை வழங்குவாள்.

மற்றொரு கண் பார்வையை நான் வழங்குகிறேன்’ என்று கூறி மறைந்தார்.

அதுபோன்றே ஈசனுக்கு மன்னன் வீரபாண்டியன் கோயில் எழுப்பி 

கண் பார்வை பெற்றான்.

கண்ணீசுவரமுடையாருக்கு கற்கோயிலும், கௌமாரியம்மனுக்கு சிறிய கோயில் ஒன்றையும் அமைத்து வழிபாடு செய்தான்

ஈசனுக்கு கோயில் எழுப்பி கண் பார்வை பெற்ற மன்னன் வீரபாண்டியன் பெயரே காலப்போக்கில் வீரபாண்டி என ஊர் பெயரானது.

வீரபாண்டியில் உள்ள கண்ணீஸ்வரமுடையார் கோயில் 
கௌமாரி பார்க்கும் திசையில் அமைந்துள்ளது.

பாண்டிய மன்னனுக்குக் கண் பார்வை தந்த இந்தக் கோயிலில் வணங்கிச் செல்பவர்களுக்கு அம்மை மற்றும் கோடைக்கால அனைத்து 
வெப்ப நோய்களும் நீங்கி விடும் என்பது  நம்பிக்கை ...

சித்திரை மாதக் கடைசி செவ்வாய்க் கிழமை துவங்கி வைகாசி மாத முதல் செவ்வாய்க் கிழமை வரையிலான எட்டு நாட்கள்
சிறப்பு சித்திரைத் திருவிழா நடைபெறுகிறது

சித்திரைத் திருவிழாவின் போது மட்டும் 24 மணி நேரமும் கோயிலில் வழிபாடு நடத்தப்படுகிறது.

தேனி மாவட்டத்தில் நடைபெறும் சிறப்பான திருவிழா வீரபாண்டி கௌமாரியம்மன் கோயில் சித்திரைத் திருவிழா ...

கோயிலின் தீர்த்தமாகக் கோயிலுக்கு அருகே ஓடும் 
முல்லை நதியின் நீர் பயன்படுத்தப்படுகிறது.

கோயில் கோபுரம் இந்திய சுதந்திரமடைந்த காலத்தில் கட்டப்பட்டிருப்பதால்  கோபுரத்தில் இந்திய சுதந்திரப் போராட்டத் தியாகிகளான மகாத்மா காந்தி, கஸ்தூரிபா காந்தி, ஜவஹர்லால் நேரு, நேதாஜி சுபாஸ் சந்திரபோஸ் ஆகியோரது உருவச் சிலைகள் கோபுரம் அமைக்கப்பட்ட போது இடம் பெற்றுள்ளது.

தேனி மாவட்டம் முல்லையாறு ஓடும் பகுதியில் அமைந்துள்ள வீரபாண்டி.  கொலுவீற்றிருக்கும் கௌமாரியம்மன் தேனி மாவட்ட மக்களின்
 காவல் தெய்வமாக விளங்குகிறாள்.

பசு ஒன்று நடந்து சென்ற போது அதன் கால் ஒரு கல் மீது இடற அந்த கல்லிலிருந்து ரத்தம் பீறிட்டது.

இந்த சம்பவத்துக்குப் பிறகு, தினமும் அந்தப் பசு நேராக அந்த கல் இருக்கும் இடம் தேடி வருவதை வாடிக்கையாக கொண்டது.

கன்றுக்குக்கூட பால் தராமல் பசு தினமும் எங்கே செல்கிறது என்று பார்த்தபோது, மடியிலிருந்து பால் தானாக கறந்து, கல்லின் மீது பொழிய, அவ்வளவு பாலையும் கல் உறிஞ்சிக் கொண்டிருந்தது.

 பக்தர் ஒருவரின் கனவில் தோன்றிய அம்மன், ‘நான் கௌமாரி. எனக்கு அந்த இடத்தில் கோயில் எழுப்பு’ என்று கூறியதன் பேரில் வீரபாண்டியில் கோயில் எழுப்பப்பட்டதாக  வரலாறு கூறுகிறது.

கோயிலில் சுயம்புவாக  அம்மன் எழுந்தருளி அருள்பாலிக்கிறாள்...

சித்திரை கடைசியில் துவங்கி 8 நாட்கள் நடக்கும் திருவிழாவில் 
முல்லையாற்றங் கரையில், அருள் இறக்கி மேளதாளத்துடன் தினசரி ஆயிரக்கணக்கான பக்தர்கள் அக்னி சட்டி எடுத்து ஊர்வலமாக வந்து அம்மனுக்கு நேர்த்திக்கடன் செலுத்துவது மெய் சிலிர்க்க வைக்கும்.

திருவிழா நாட்களில் அம்மன் தினசரி பல்வேறு அலங்காரத்தில் பக்தர்களுக்கு காட்சியளிப்பார். 

பால், பன்னீர், தேன் உள்ளிட்ட பலவகை அபிஷேகங்கள் நடக்கும். பக்தர்கள் 22 நாட்கள் விரதமிருந்து நேர்த்திக்கடன் செலுத்துவர்.

வீரபாண்டி கௌமாரி வினை தீர்க்கும் வீரபாண்டி மாரி என்றே அழைக்கப்படுகிறார்.

குழந்தை வரம், திருமண யோகம், நோய்களுக்கு நிவாரணம், வேலைவாய்ப்பு என பலவற்றுக்கும் இங்கு வந்து வேண்டி. வேண்டுதல்கள் விரைவில் நிறைவேறுவதாகவும்  பரவசமடைகின்றனர்.

கௌமாரி அம்மனிடம் நேர்த்திக் கடனாக வேண்டிக் கொண்டவர்கள் அக்கினிச் சட்டி எடுத்து  ஆயிரம் கண் பானை சுமந்தும் மாவிளக்கு எடுத்தும்  நேர்த்திக்கடன் செலுத்துகின்றனர்கா.

சிலர் நாக்கில் அலகு குத்துதல் எனும் சிறிய வேலைக் குத்திக் கொண்டு அக்கினிச் சட்டி எடுக்கின்றனர்.

சித்திரைத் திருவிழாவின் போது அம்மன் அன்ன வாகனம், சிம்ம வாகனம், காமதேனு வாகனம், கருட வாகனம், குதிரை வாகனம் போன்றவற்றில்  காட்சி அளிக்கிறார்.

சித்திரைத் திருவிழாவில் வெள்ளிக்கிழமையன்று பூவால் அலங்கரிக்கப்பட்ட பூப்பல்லக்கில் ஊர்வலமாக வந்து  அருள் பொழிவது கண்கொள்ளாக்காட்சி..!.

அம்மை குணமாக வேண்டுவோர் சேற்றை உடலில் பூசி சேத்தாண்டி வேடம் பூண்டு அம்மனுக்கு நேர்த்திக்கடன் செலுத்துகின்றனர்.
  

சித்திரைத்திருவிழா நெருங்கும் சமயத்தில், பக்தர் கனவில் தோன்றும் அம்மன், முக்கொம்புடன் கூடிய பால் வடியும் அத்திமரம் இருக்கும் திசையை காட்டுகிறது.

அதன்படி சென்று, அத்திமரத்தை கொண்டு வருகின்றனர்.

தேனி அருகே உள்ள அரண்மனைப்புத்தூர் தட்சிணாமூர்த்தி கோயில் அருகே இருந்த அத்திமரம் கொண்டு வரப்படுகிறது..!

முதலாவதாக அத்தி மரத்திற்கு வீரபாண்டி கண்ணீஸ்வரமுடையார் கோயிலில் சிறப்பு வழிபாடுகள் நடக்கும். அதன்பின்னர் மேளதாளத்துடன் திருக்கோயிலுக்கு கொண்டு வருகின்றனர்.

முக்கொம்புடன் கூடிய பால்வடியும் அத்திமரத்தை கோயிலில் 

கொடிக் கம்பமாக வைத்து வணங்குகின்றனர்

சித்திரைத் திருவிழாவின் போது  முல்லை ஆற்றிலிருந்து தீர்த்தம் எடுத்துச் சென்று அம்மன் கோயிலில் இருக்கும் முக்கொம்பிற்கு ஊற்றிவிட்டு அதன்பிறகு அம்மனை வழிபடுவது  வழக்கம்..!

கொடிக் கம்பத்தை ஈஸ்வர மூர்த்தியாக வணங்குகின்றனர்.

திருவிழா நாட்களில் முல்லையாற்றில் இருந்து புனித நீர் எடுத்து வந்து  கொடிக் கம்பத்திற்கு அபிஷேகம் செய்கின்றனர்.

தேனியில் இருந்து கம்பம் செல்லும் வழியில் 8வது கிலோ மீட்டரில் அமைந்துள்ளது வீரபாண்டி கௌமாரியம்மன் கோயில்..