அம்பாள்புரி கூத்தனூர்

சரஸ்வதி நமஸ்துப்யம் வரதே காமரூபிணி!

வித்யாரம்பம் கரிஷ்யாமி ஸித்திர் பவது மே ஸதா !!   

மாமன்னன் இரண்டாம் ராஜராஜன் தனது அவையில் அவைப் புலவராக விளங்கிய ஒட்டக்கூத்தருக்கு பரிசாக வழங்கிய ஊர்.... அதனால் கூத்தன் + ஊர் கூத்தனூர் எனப்பட்டது. 

ஒட்டக்கூத்தர் தனக்கு கவிபாடும் திறன் வேண்டி நாள்தோறும் அம்பிகையை வழிபட்டு வந்தாராம்! கூத்தரின் பக்தியில் மகிழ்ந்த நாமகள் அவருக்கு அருளி அவரை வரகவியாக்கினாளாம்.

இந்த அம்பாள்புரி எனப்படும் கூத்தனூரை- வேதமாதாவான சரஸ்வதி தேவி தனக்குரிய இடமாகத் தேர்ந் தெடுத்து தவம் செய்யக் கருதினாளாம். 


 இங்கு தேவி அமைதி சொரூபமாக வெள்ளையாடை தரித்து, வெண்தாமரை யில் பத்மாசனத்தில் அமர்ந்து, இடது கீழ்க்கையில் புத்தகமும், வலது கீழ்க்கையில் சின்முத்திரையும் காட்டி, வலமேல் கையில் அட்ச மாலை, இடமேல் கையில் அமிர்த கலசம் ஏந்தி, சடாமுடியுடன்- கருணைபுரியும் இரு விழிகளுடன்- "ஞானசஷஸ்' என்ற மூன்றாவது திருக்கண்ணுடன் புன்னகை தவழ கிழக்கு திசை நோக்கி அருளாட்சி புரிகிறாள். 






ஆலயக் கருவறையின் மேலே ஐந்து கலசங்களுடன் விமானம் அமைந்துள்ள இந்த கோவிலில், ராஜகோபுரங்கள் ஏதும் தனியாக இல்லை. 

இங்குள்ள நடராஜர் சிலையில் முயலகன் பக்கவாட்டில் இல்லாமல் நேர்முகமாகக் காணப் படுகிறான். அவன் முதுகின்மீது பெருமான் தாண்டவமாடுகிறார். 


மகாமண்டபத்தின் இடப்பக்கம் நான்கு திருமுகங்களுடன் கைகூப்பிய பிரம்மா நிற்கும் சிலை உள்ளது. 


வெளியே இடது பக்கம் ஒட்டக்கூத்தரின் சிலை உள்ளது. 


ஆலயத்துக்குள் நுழையும்போது பலிபீடத்தின்முன் அம்பாளின் வாகனமான அன்னம் அன்னையை நோக்கிய வண்ணம் உள்ளது. பெரிய மதில்களுடன் ஆலயம் அமைந்துள்ளது.



இத்தகைய அருள்மிகு ஞான சரஸ்வதியின் திருக்கோலத்தைக் காண கண்கள் ஆயிரம் வேண்டும் என்று, ஸ்ரீலலிதா சகஸ்ரநாமத்துக்கு பாஷ்யம் எழுதிய பாஸ்கரர் கூறுகிறார். 

இந்த அம்பிகையின் எழில் அழகைக் கண்டு களிக்க முன்ஜென்ம புண்ணியமும் வேண்டும் என்று தேவி மகாத்மியம் கூறுகிறது. 

கூத்தனூரில் குடிகொண்டிருக்கும் அம்பிகையின் தோற்றம் சௌந்தரிய லஹரியில் 15-ஆம் பாடலில் கூறப் பட்டுள்ளது.


கம்பர் சரஸ்வதி அந்தாதியில் வாக் தேவதையைப் பற்றிப் புகழ்ந்து பாடியுள்ளார். 


குமரகுருபரர் சகலகலாவல்லி மாலையும், ஒட்டக்கூத்தர் ஈட்டி எழுபது என்ற நூலையும் பாடியுள்ளனர். 


இது தவிர சரஸ்வதி தியான சுலோகங்கள் "கூத்தனூர் கலைமகள்' என்ற தலைப்பில், சௌந்திரா கைலாசம் அவர்கள் தமிழில் இயற்றியுள்ளார். 


 சரஸ்வதி அஷ்டோத்திரம், ஸ்ரீசரஸ்வதி காயத்ரி, சரஸ்வதி அந்தாதி, சரஸ்வதி தியான சுலோகங்களும் புகழ்ந்து பாடப்பட்டுள்ளன.


வசந்த நவராத்திரி, சாரதா நவராத்திரி ஆகியவை வெகு சிறப்பாகக் கொண்டாடப் படுகின்றன. சாரதா நவராத்திரி 12 நாட்களும்; அதன்  பின்வரும் பத்து நாட்கள் ஊஞ்சல் காப்பு, மஞ்சள் காப்பு, புஷ்ப அலங்காரங்கள்  என பல்வேறு அலங் காரங்களில் அம்பாள் பக்தர்களுக்கு காட்சி தருகிறாள். 


சரஸ்வதி பூஜையன்று ஒருநாள் மட்டும், நியமத்துடன் இருந்து அம்பிகையின் பாதங்களில் பக்தர்களே மலரிட்டு அர்ச்சிக்கலாம். 

அர்த்த மண்டபத்தில் அம்பிகையின் பாதம் இருக்கும்படி அலங்காரம் செய்கின்றனர். 


ஒரு விஜய தசமி நாளன்று புருஷோத்தம பாரதி என்ற வாய் பேசமுடியாத பக்தர் ஒருவருக்கு அம்பிகையின் அருள் கிடைத்ததாகக் கூறப்படுகிறது. 

அதனால் இன்றும் அந்த நாளில் ஆலயத்திற்கு வந்து வித்யாப்யாசம் செய்து பள்ளிகளில் குழந்தைகளைச் சேர்க்கின்றனர். 

அன்று காலை மஹன்யாச ருத்ராபிஷேகமும், மாலை அன்ன வாகனத்தில் தேவி வீதியுலா எழுந்தருளும் காட்சியும் நடைபெறுகிறது. 


சித்திரை 1-ஆம் நாளில் தொடங்கி 45 நாட்கள் லட்சார்ச்சனைகள் நடைபெறுகின்றன. 


இந்நாட்களில் ஏறக்குறைய ஏழு லட்சம் அர்ச்சனைகள் நடைபெறுகின்றனவாம்! 


இசைக் கலைஞர்கள் இந்த ஆலயத்திற்கு வந்து  இசைக் கருவிகளுக்கு பூஜை செய்து வாசித்த பிறகே பிற நிகழ்ச்சிகளில் பங்கேற்கின்றனர். 

இசை, நாட்டிய அரங்கேற்றங்களும் உண்டு. மாணவர்கள் தேர்வு எழுதச் செல்லும்முன் எழுதுகோல்களை அம்பிகையின் பாதத்தில் வைத்து அர்ச்சனை செய்து எடுத்துச் செல்வதும்; பள்ளி திறந்தவுடன் புத்தகங்களை வைத்து வழிபட்டு எடுத்துச் சென்றும் அருளாசி பெறுகின்றனர்


இந்தக் கலைமகள்     காளிதாசன் "சம்பூர்ண இராமாயணம்' பாட அருள் செய்தவள்- கம்பனுக்காக கிழங்கு விற்றவள்- ஆதிசங்கரரின் பெருமைகளை வெளிப்படுத்த சரஸவாணியாய் அவதரித்தவள்- தமயந்தி நளனைத் தேர்ந்தெடுக்க உதவியவள் என்றெல்லாம் போற்றப்படுகிறாள்.


திருவாரூர் மாவட்டம், (நன்னிலம் வட்டம், பூந்தோட்டம் அஞ்சல்) திருவாரூர்- மயிலாடுதுறை மார்க்கத்தில், பூந்தோட்டம் பேருந்து நிலையத்திலிருந்து சுமார் அரை கிலோமீட்டர் தூரத்தில் அமைந்துள்ள தமிழகத்தில் சரஸ்வதிதேவிக்கு தனி ஆலயம் அமைந்திருப்பது  அருள்மிகு கூத்தனூர் மகாசரஸ்வதி அம்மன் ஆலயம். ..

கூத்தனூரில் உள்ள ஸ்ரீகமலாட்சி அம்பாள் சமேத ஸ்ரீஹரிநாதேஸ்வரர் ஆலயத்தில் கல்யாண துர்க்கையும்; லட்சுமி யும் மடியில் வைத்துக் காட்சி தரும் லட்சுமி நாராயணப் பெருமாள் ஆலயத்தில் மகாலட்சுமியும்; தனக்கென தனி ஆலயத்தில் மகாசரஸ்வதியும் கோவில் கொண்டிருப்பதால் இந்த ஊர் அம்பாள்புரி என்றும் அழைக்கப் படுகிறது. ஹரி நாதேஸ்வரம் என்ற பெயரும் உண்டு. இங்கு நவகிரகங்கள் இல்லை.





Consecration on at the Maha Saraswathi temple.