சிறப்பு தரும் சித்திரைப் புத்தாண்டு

 சித்திரை மாதத்தின் முதல் நாள் புத்தாண்டாக

சிறப்புறக் கொண்டாடுகிறோம்..

நாம் மட்டுமல்ல ..இயற்கை அன்னையும் பழுத்த பழைய இலைகளை உதிர்த்து மண்ணுக்கு உரமாக்கிவிட்டு பச்சைப்பசும் இலைத்தளிர் ஆடைகளை அணிந்து கண்களிக்கும் வண்ணம் காட்சிதருகிறாள்...

மரம் முழுக்க இலைகளே தெரியாமல் சரக்கொன்றை மரம் தங்கநகைகளை தாராளமாக அணிந்த புதுமணப்பெண்ணாய் ஏராள புன்னகையொடு வரவேற்பதைக் கண்குளிரக்காணும்போதே சித்திரை பிறக்கப்போகிறது என கட்டியம் கூறும்..

வாகை மரத்தின் பூக்கள் சித்திரையை சாமரம் வீசி வரவேற்கும்..

அப்போதுதான் முட்டையிலிருந்து வெளிவந்து அனுபவம் கற்காத இளம் குஞ்சுப்பற்வைகள் கண்திறந்ததும் செந்நிறமலர்கள் மரம் முழுவதும் பூத்திருப்பதைப் பார்த்து காடே தீப்பற்றிவிட்டதோ என அலறி தாயின் சிறகிற்குள் தஞ்சமடைந்து மழலை மிழற்றுவதைக் கேட்டு இயற்கை அன்னை ஆனந்தமடைந்து தன் வண்ணமலர்களால் அர்ச்சித்து மண் மகளையும் நதி மகளையும் பூவாடை போர்த்துகிறாள்..

வேப்பம்பூக்கள் கொத்துக்கொத்தாய் மலர்ந்து 
மணம்பரப்பி மகிழ்ச்சியூட்டும்..

சித்திரை முதல்நாளில்  வேப்பம்பூக்களையும் , வாழைப்பழத்தையும் ,கரும்பு சர்க்கரையும் , புளிப்புக்கு சிறிது மாங்காயும் கலந்து அறுசுவையாக முதல் உணவாக எடுத்துக்கொள்வது ஆண்டுமுழுவதும் பிணிகளை அறுத்து நோய் எதிர்ப்புச்சக்தியை தரும் என்பது  நம்பிக்கை..

முக்கனிகளும் கனிந்து வாசம் வீசும் திருநாள்..

சித்திரையின் முதல் நாளில் நித்திரைநீங்கி எழுந்ததும் முதல்காட்சியாகக் காணும் கனிகாணல் நிகழ்ச்சி ஆண்டின் மங்களகரமான தொடக்கத்திற்கு அச்சாரமாக திகழ்கிறது..

பெரியோர்களிடம் ஆசிபெற்று கைநீட்டம் என்று நாணயம் பெறுதல் செல்வ வளம் ஆண்டுதோறும் சிறப்பாக இருப்பதை குறிக்கிறது..

ஆலயங்களில் சிறப்புப்பூஜைகளும் , நாணயம் பெறுதலும் இறைவனின் அருளை பெற்றுத்தருகிறது..

சித்திரைப்புத்தாண்டு அன்று சிறப்பு விருந்து உணவுகளும் பூஜை அறை அலங்காரங்களும் அன்று தொடங்கும் உறுதியான முதலடி ஆண்டு தோறும் தொடர்ந்து வருவதான தன்னம்பிக்கையைத்தருகிறது..! 

சித்திரை மாதத்தில் புத்தாண்டு தொடங்குவது என்பது வானநூலையும் பருவங்களின் சுழற்சியையும் அடிப்படையாகக் கொண்டது.

 இயற்கையை ஒட்டி, சித்திரை மாதத்தைத் தொடக்க மாதமாகக் கொண்டமைந்ததமிழ்புத்தாண்டு தினத்தன்று வீடுகளை மாவிலை தோரணங்களால் அலங்கரிப்பது வழக்கம்.

 பூஜை அறையில் உள்ள படங்களை  மங்களகரமான மஞ்சள் நிற மலர்களால் மலர்களாலும்  ரூபாய் நாணயங்களினாலும், பழங்களினாலும் அலங்கரித்து   வருடத்தின் முதல்நாள் இவற்றில் கண் விழித்தால் வீட்டில் மங்களம் பொங்கும் என்பது பாரம்பரியமான நம்பிக்கையாகும்.

 வசந்த காலத்தை வரவேற்கும் விதமாக மஞ்சள் நிற பூக்கள் அதிகமாய் பூத்துக்குலுங்கும். பூக்களினால் பூஜை அறையை அலங்கரிக்கிறோம்..

தாமரை மலரில் லட்சுமி தேவி வாசம் செய்கிறாள் என்பதால் நடுநாயகமாக லட்சுமி தேவியின் படத்தை வைத்து தாமரை மலர்களால் அலங்கரிக்கலாம்.

கோடை காலத்தில் அதிகம் கிடைக்கும் மாங்கனி. பசும் மஞ்சள் நிறத்தில் பார்க்கவே கண்ணைப் பறிக்கும்.

அதேபோல் ஆரஞ்சு, எலுமிச்சை, வெள்ளரிக் கனி,போன்றவைகளை தட்டில்  வைத்து நடுவில் சிகரம் வைத்ததுபோல மாதுளம் பழங்களையோ, ஆப்பிள் பழங்களையோ அடுக்கலாம்.

செல்வத்தின் திரு உருவான  லட்சுமி தேவி  வீட்டில் வாசம் செய்ய தாம்பாளத்தில் சில்லறை நாணயங்களைக் கொட்டி அதனைச் சுற்றி ரூபாய் நோட்டுக்களை அடுக்கலாம்

பலவகை பழங்களை ஒரு தட்டில் வைத்து அலங்கரித்து மையப்பகுதியில் புதிய ரூபாய் நோட்டுக்களை வைத்து, அதன் மேல் தங்க, வெள்ளி நகைகளை வைத்து அலங்கரிப்பார்கள்.

வருடப்பிறப்பிற்கு முதல்நாள் இரவே பூஜை அறையில் ஒரு கண்ணாடியை வைத்து அதன் முன்பாக இந்த பழத்தட்டினை வைத்து விடுவார்கள்.

விடிந்த உடன் குழந்தைகளின் கண்களை மூடிக்கொண்டு பூஜை அறைக்கு அழைத்து செல்லும் அம்மா அந்த பழத்தட்டிலும், கண்ணாடியிலும் விழிக்கச் சொல்வார்கள். இதுபோன்ற மங்கலப் பொருட்களைப் பார்த்தால் மகிழ்ச்சி அதிகரிக்கும் என்பது நம்பிக்கை.

அன்றைய தினம் கனி காணுதலையும், கை நீட்டம் நிகழ்ச்சியையும் பார்க்கும் போது புது வருட தினத்தன்று உற்சாகத்தைத் தருகிறது.

வல்லமை மின் இதழில் வெளியான எமது ஆக்கம்..

பங்குனி மாதத்தின் முழுநிலவுநாளை ஆலயங்களில் சிறப்பாக கொண்டாடுகிறோம் ..தெய்வங்களின் திருவீதி உலாவும் தேர்த்திருவிழாக்களும் சிறப்புற நடைபெறுகின்றன...

ஆஸ்திரேலியாவில் மார்ஸ் என்னும் செவ்வாய் கிரகம் பூமிக்கு அருகில் வருவதால் விழாக்கோலம் பூண்டு ஸ்டார் வார்ஸ் படத்தில் வருவது போன்ற உடைகள் அணிந்துகொண்டு வானியல் ஆராய்ச்சிமையத்தில் குழுமி தொலை நோக்கிகள் வழியாக செவ்வாய் கிரகத்தைக்கண்டு களித்திருகிறார்கள்..  

இதோ மகன் அனுப்பிய படங்கள்....!!

 ஏன் அவ்வளவு சிறிதாக தெரியும் கிரகங்களை கஷ்டப்பட்டு தேடிப் பார்க்கவேண்டும் ..முழு நிலவு நாளாயிற்றே .. இன்று களங்கம் சற்றே குறைந்து ஒளி வீசும் நிலவைக் கண்டுகளிக்கலாமே என்று சந்திரனை நோக்கி தொலைநோக்கியைத் திருப்பினால் நிலவின் பிரகாசம் கண்களை கூசச்செய்ததாம் ..

பொதுவாக சக்திவாய்ந்த வானியல் தொலைநோக்கிகள் வழியாக சந்திரனைப் பார்க்க ஆராய்ச்சியாளர்கள் ஆர்வம் காட்டுவதில்லையாம் ..

அத்தனை பிரகாசமான ஒளி கண்களுக்கு ஊறு விளைக்குமாம் ..

வானியல் ஆராய்ச்சியாளரான கலிலியோ கூட இந்தமாதிரி தொலை நோக்கிகள் வழியே பிரகாசமான கோள்களை உற்று நோக்கி ஆராய்ச்சிகள் செய்ததால் கண் பிரச்சினைகளால் பாதிக்கப்பட்டாராம்..!- 

முத்திரை பதிக்கும் சித்திரை தமிழ்புத்தாண்டு

முத்திரை பதிக்கும் சித்திரையின் முதல்நாள் புத்தாண்டு கொண்டாட்டங்கள் களை கட்டுகின்றன..கணி காணுதல் இனிய ஆண்டு தொடக்கமாக கனிகிறது..!

விஷூ அன்று பொழுது புலரும் நேரம் முதற்பார்வையில் விஷூவைக் கண்டால் அவ்வருடம் முழுதும் சிறப்பானதாகவும், செழுமையானதாகவும், நேர்த்தியானதாகவும்,  அமையுமென்பது நம்பிக்கை..!

விஷூக்கனியின் போது பூஜை அறையில் முதல் நாள் இரவு பழவகைகளை  தட்டில் வைத்து நாணயங்களையும் ., தங்க நகைகளையும் வைப்பார்கள்.  வாழைப்பழம், ஆரஞ்சு எலுமிச்சை, மாம்பழம், அன்னாசி, ஆப்பிள், முந்திரி என ஏராளமான பழவகைகள் போன்ற நன் மங்கலப்பொருட்கள் இடம் பெறும்.

 அதிகாலை எழுந்து பூஜைகள் செய்துவிட்டு நண்பர்களுக்கும், உறவினர்களுக்கும் கைநீட்டம் கொடுத்து மகிழ்வார்கள்.  விருந்துண்ணுவார்

குருவாயூர் ஸ்ரீ கிருஷ்ணன் கோவிலுக்குச் சென்று விஷூக்கனி காழ்சா" என்ற குருவாயூரப்பனின்  காட்சியை தரிசித்தல் விஷேசம்.. 

இரவில் கோவில் நடையில் ஏழை பணக்காரர் வித்தியாசமின்றி தங்கி மிக அதிகாலை விடியலில் நிர்மால்யத்ரிசனம் பெறுவது பரவசமான நிகழ்ச்சியாகும்..

குருவாயூர் ஆலயத்தில் அமைக்கப்பட்டிர்ருக்கும் பிரம்மாண்டமான விஷு ஏற்பாடுகளும் தங்க சிம்மாசனத்தில் குருவாயூரப்பன் அருட்காட்சியும் அந்த ஆண்டு முழுவதும் நலம் சேர்க்கும் ..

விஷு நன்னாளில் அஷ்ட மாங்கல்யம் எனச்சொல்லப்படும்,

பஞ்சலோக பாத்திரம்

தாம்பூலம்

மஞ்சள் அரிசி

குங்குமம்

கண்ணாடி

புதிய துணி

கொட்டைப்பாக்கு

சுந்தரகாண்டம், இராமாயணம், பகவத்கீதை போன்ற 

இந்து மதநூல்களுள் ஒன்று

மற்றும் பழவகைகளுள்,மாம்பழம்

தேங்காய்

முந்திரி

வாழைப்பழம்

பசுமையான காய்கறிகள்

இவைகளோடு சேர்த்து,தங்ககாசுகள்

வெள்ளிக்காசுகள்

நெல்மணிகள்

தூய நீர்!

இது போன்ற பொருட்களை காண்பதன் மூலம் எதிர்வரும் அந்த வருடம் மிகஇனிமையான வருடமாக செல்வம் கொழிக்கும் வருடமாக, எனபது 

நம்பிக்கை..

கனி" பார்வைக்காக சராசரி அளவுள்ள உருளிஉபயோகப்படுத்தப்படுகின்றது.

வெண்கலத்தினால் ஆன  பாரம்பரிய வழக்கமாக உருளி பஞ்சலோகத்தால் செய்யப்பட்டு ஐந்து உலோகங்கள் சூட்சுமமாக அண்டத்தைக் குறிக்கின்றது

அதன் ஐந்து தத்துவங்களாகிய நிலம், நீர், நெருப்பு, காற்று மற்றும்

ஆகாயம் என்ற ஐம்பெரும் தத்துவங்களைக் குறிப்பனவாக அமைகின்றது.

அட்சதம் எனப்படும் அரிசி, மஞ்சள் கலவை நெல்லாகவும் அரிசியாகவும் கலக்கப்பட்டு.  உருளிக்குள் மற்ற பொருட்களை வைப்பதற்கு அடித்தளமாக உருளிக்குள் செல்லும் முதற்பொருளாக உபயோகப்படுத்துகின்றனர்.

அவ்வருட  வெற்றி- தோல்விகள் புதுவருடத்தின் துவக்க நாளில் உள்ளடங்கி இருக்கின்றது என்ற நம்பிக்கை உள்ளதால் வருட துவக்கம் சிறப்பாக இருக்கவேண்டும் என்ற உயரிய நோக்குடன் கொண்டாடப்படுகின்றதே விஷு பண்டிகை. 

முதல் அடி அடுத்த அடிக்கு தளம் என்பதால் வருடத்தில் முதல் நாளில் அதாவது பிரம்ம முகூர்த்ததில்)நல்லதை காண்பது வழியாக அந்த வருடத்தின் முழு  ஐஸ்வரியமும்  தங்கள் வாழ்வில் கொண்டுவர வேண்டும் என்று  முத்திரை பதிக்கும் மாதம் சித்திரைத்திருநாள்


தங்க நகைகளைத்தாராளமாகவும், ஏராளமாகவும் அணிந்து 
இனிய புன்னகை பூக்கும் எழிலான புதுமணப்பெண்களைப் போன்ற 
தங்க மழை சொரியும் சரக் கொன்றை மரங்கள் , 

இயற்கை அன்னையின் கொடையாக நோய்கள் தீர்க்கும் மருத்துவப் பெட்டகமான வேப்பம்பூக்களை மலர்விக்கும் வேப்பமரங்கள்.. ,!!

இலைகளே தெரியாமல் காடே தீப்பற்றிவிட்டதோ.. என்று தன் தாயிடம் அண்டி புகலிடம் கோரி கூச்சலிடும்  அறிவு முதிராத சின்னஞ்சிறு புத்தம்புது பறவைகளைக் குழந்தைகளைப் பராமரித்து வாழும் 
செந்நிற மலர்களை புஷ்பிக்கும் மேபிளவர் மரங்கள்..!!

நீல மலர்களை அணிந்து கண்களுக்கு 
ரம்யமான தோற்றத்தை தரும் மரங்கள்..

இன்னும்..இன்னும் ... பலவகை மரங்கள் எல்லாம் பழைய முதிர்ந்த இலைகளை உதிர்ந்த்துவிட்டு ஒளிரும் இளம் தளிர்களையும் புத்தம் புது புன்னகை சிந்தும் பூக்களையும் அணிந்து கண்களுக்கு விருந்தளிக்கும் நாள் சித்திரை முதல்நாளாகும்..! 

எனவே நாமும்  இயற்கையைப் பார்த்து பாடம் கற்று பழையன நீக்கி 

புத்தம் புது எண்ணங்களையும் வண்ணங்களையும் ஏற்று 

வாழ்வில் இனிமை சேர்ப்போமாக..!!

தொடர்புடைய பதிவுகள்..

* விஷுக்கனி