சிரகிரி வேலவன்

பங்குனி மாத முழு நிலவு வெள்ளிக்கிழமை நாளில் சிரகிரிவேலவன் தரிசனம் பெற சென்றிருந்தோம்...

ஆயிரத்து முன்னூறுக்கு மேற்பட்ட படிகள் கொண்ட மலைக்கோவிலுக்கு வாகனத்தில் செல்லவும் அருமையான பாதை உண்டு..

தினசரி அபிஷேகத்திற்கு காளைகள் மூலமாக தண்ணீர் கொண்டுவரும் அதிசய தலம்..

வேங்கை மரத்தேர் அற்புதமாக காட்சியளித்தது..

முன்புறம் புளியடி விநாயகர் சந்நிதியும், அடுத்து கோயிலின் உட்புறத்தில் மூலவர் சென்னிமலை ஆண்டவருக்கு வலது பாகத்தில் மார்க்கண்டேசுவரர் மற்றும் உமையவல்லி அம்மன் சந்நிதிகளும், இடது பாகம் காசி விஸ்வநாதர் மற்றும் விசாலாட்சி அம்மன் சந்நிதிகளும் அமையப்பெற்றுள்ளன. 

அம்மன் சந்நிதியிலிருந்து பின்புறம் சென்றால்மலையின் உச்சியில் சித்தர் மகான்(பின் நாக்குச் சித்தர்) புண்ணாக்குச் சித்தர் கோயில் வேல்கள் நிறைந்த வேல் கோட்டமாக அமைந்துள்ளது. இதன் அருகே சரவண மாமுனிவரின் சமாதிக் கோயிலும் உள்ளது. இந்தக் கோயில் அருகே மிகப் பழமை வாய்ந்தகுகை ஒன்றும் காணப்படுகிறது.

கோவிலை விரிவுபடுத்தும் பணி நடைபெற்றுக்கொண்டிருந்தது...
பாலாலயத்தில் விக்ரஹங்கள் வைத்திருந்தார்கள்...

சுயம்புவான சிரகிரி வேலவனின் கண்பார்வையில் துவாரபாலகர்களின் அருகில் நவக்கிரஹ நாயகரான சனிபகவான்...சுற்றிவர சுற்றுச்சுவரின் வெளிப்பாகத்தில் சுக்கிரன் , பின் புறம் சூரியன் ,சந்திரன் , குரு, ராகு, கேது ,புதன் என நவக்கிரஹங்களில் எட்டும் முருகனைச்சுற்றி அமைந்திருக்க முருகனே செவ்வாய்க்கிரஹமாக வேறெங்கும் காணமுடியாத வித்தியாச அமைப்பு கருத்தைக் கவர்ந்தது.

முருகன் தன்னைத்தானே பூஜித்து நமக்கு பூஜை முறை வகுத்துத்தந்த அக்னிஜாத மூர்த்தி என்னும் இரண்டு தலைகளை உடைய மூர்த்தம் அபூர்வமானது...

 சிரசுப்பூ உத்திரவு கேட்டவருக்கு நலமாக அளித்தார் கேட்டபடி அளிக்கும் கருணை முருகன்..

புதுக்கணக்கு புத்தகங்கள் வைத்து அர்ச்சனை செய்துகொண்டிருந்தார்கள்...

அருணகிரிநாதரால் திருப்புகழ் பாடி படிக்காசு பெற்ற திருத்தலம்

பிரம்மஹத்தித் தோசம் பீடிக்கப்பட்ட சிவாலயச் சோழனின் வாட்டத்தைப் போக்க அர்ச்சகர் உருவில் முருகப் பெருமானே எழுந்தருளி மன்னனுக்காக பூசை செய்து மன்னனைப் பீடித்திருந்த பிரம்மஹத்தி தோசத்தைப் போக்கியருளினார்.

அமிர்தவள்ளியும் சுந்தர வள்ளியும் சென்னிமலை ஆண்டவரை திருமணம் செய்ய தவம் செய்யும் பகுதி தனியாக அமைந்திருக்கிறது...

வீடுகட்டும் பிரார்த்தனைக்கு நிறைய கற்கள் அடுக்கி வைக்கும் வழக்கம் திருப்பதி மலை மாதிரி இங்கும் நீக்கமற நிறைந்து காணப்பட்டது..

ஆடுகள் , குரங்குகள் , மயில்கள் நிறைய காணப்பட்டன..

முழு நிலவு எழிலுற கிழக்கு வானில் எழுந்து முருகனைத் தரிசிக்கும் திகட்டாத காட்சி அற்புதம்....

   

தேர் நிலைக்கு அருகில் கைலாசநாதர் ஆலயம் தன் பழமையை பறைசாற்றியது..

தேரோட்டம் கண்டு மகிழ்ந்த முருகன் அன்னைதந்தை அருளும் ஆலயத்தில் சீராடிக்கொண்டிருந்தான்..

செயற்கை மின் ஒளி விடை பெற்ற பின் இயற்கை முழு நிலவொளியின் அமுத கிரணத்தின் ஒளியில் முருகன் தரிசனம்...

எந்தாயும் எனக்கருள் தந்தையுமாய்

சிந்தாகுலம் தீர்த்து எமையாள் ஷண்முகனாய் எழில் முருகன்..

இப்பிறவிப்பிணி இனிவாராமல் போக

தப்பிதம் இல்லாமல் உந்தனைப்பாட மனம் வைத்தருள்வாய் 
முருகா என வேண்டி வணங்கினோம்..

சிரகிரி வேலவன் சீக்கிரம் வருக --என மனம் தன்னிச்சையாய் கந்தசஷ்டிகவசம் சுவாசமாய் ஓடிக்கொண்டிருக்க கோவிலை வலம் வ்ந்தோம்...

வெள்ளிக்கிழமை விசாலாட்சி அம்மன் சந்நிதியில் திருவிளக்குப் பூஜை 

பூரண நிலவொளியாய் அன்னை பிரகாசித்து அருள்பொழிய நட்சத்திர மின்மினிகளாய் திருவிளக்கின் சுடர்கள் ஒளிர்ந்திட வானத்திலும் அதே காட்சி பௌர்ணமி நிலவும் சுற்றி பவனிவரும் நட்சத்திரங்களுமாய்...

வில்வமரம் தழைத்திருந்தது... முன் கோபுரம் வழியாக முழு நிலவு 
காசி விஸ்வநாதரை நேராக தண்கிரணங்களால் வணங்கியது...

கோவிலுக்கு வெளியே அரசமரத்தடி பிள்ளையார் 
முதல் பிள்ளை லட்சணமாக அமர்ந்து இருக்கிறார்..

சிரகிரி வேலவனான தன் தம்பிக்காக தன் முதல் பூஜையை மலைமேல் விட்டுகொடுத்து சகோதர ஒற்றுமை பேணும் அண்ணனை மனதார பிரார்த்தித்தோம்..

சாவை சடங்காக நினைக்கும் மனிதர்கள் நடுவே அதை சரித்திரம் ஆக்கிய தியாகி குமரன். 

சென்னிமலையில் குமரன் பிறந்த இல்லம் தேர் நிலைக்கு அருகில் கண்டோம்....

அரசியல் காரணங்களால் பிழைக்கச்சென்ற திருப்பூரை பெயரில் சேர்த்து திருப்பூர்க்குமரனாக அறிமுகம் பெற்ற தேசத்தியாகிக்கு திருப்பூரில் நினைவகம் அமைத்துவிட்டோம் என்று பிறந்த இல்லத்தை நினைவிடமாக எளிமையாக வைத்திருக்கிறார்களாம்..

அச்சமில்லை… அச்சமில்லை அச்சம் என்பது இல்லையே என்ற பாரதியின் வைரவரிகளை விண்அதிர முழங்கி கொடி பிடித்து கொண்டு முன்னேறி சென்று வெள்ளையர் குண்டாந்தடி தாக்குதலில் குரமனின் மண்டை பிளந்து கொட்டிய செந்நீர் தாயக மண்ணை மேலும் சிவப்பாக்கி தரையில் சாய்ந்த நிலையிலும் வலது மணிக்கரம் பற்றிய தேசிய கொடி கீழே விழவிடாமல் தாங்கி மண்ணுக்கு உடலை தந்து மணிக்கொடிக்கு தன் மார்பை தந்து தானே ஒரு வரலாறாக மாறிய சென்னிமலை குரமன் 

இரத்தம் சிந்தி ,யுத்தம் செய்து பெற்ற சுதந்திரம் !

தண்ணீர் விட்டோ வளர்த்தோம் இப்பயிரை 
கண்ணீரால் காத்தோம் சர்வேசா -- என்று சுதந்திர வேள்வியில் இந்திய விடுதலை போரில் உடல் பொருள் ஆவி என்கிற மூன்றையும் ஆகுதியாக அளித்த தியாகப்பட்டியலில் முதன்மை இடம் பெற்று சாகவரம் அடைந்த தியாகி குமரன் என்னும் தேச பக்திச் சொந்தக்காரனுக்கு ஆத்மார்த்தமாக அஞ்சலி செலுத்தினோம்...

சென்னிமலை காமாட்சி அம்மன் கோவில் பொங்கல்விழா  பால் குடங்கள் சிறப்பு பூஜை செய்யப்பட்டு மேளதாளத்துடன்  சென்னிமலை 4 ரதவீதிகளில் ஊர்வலமாக வந்து திருக்கோயிலை அடைந்த பின்பு காமாட்சியம்மனுக்கு பால் அபிஷேகம் நடைபெற்றது.

Golden Chairot at Sri Arunachaleswarar Temple, Tiruvannamalai.