""ஞான உலா''அரங்கேற்ற அய்யனார் திருக்கோயில்.

சேக்கிழார் பெருமான் பெரிய புராண பாடலை தில்லையம்பலத்தில் தொடங்கி திருப்பிடவூர் என்னும் திருப்பட்டூரில் முடித்ததாக வரலாறு.


பிரம்ம புரீஸ்வரர் ஆலயம் செல்லும் வழியில் வாயிலில் மிகப் பெரிய கல் யானை வாகனம் காணப்படுகிறது. 

அதை பெரியய்யா கோயில் என்றும் பெரிய சாமி கோயில், எழுத்தச்சன், அரங்கேற்றியான் கோயில், அரங்கேற்றிய ஐயன் கோயில் என்று வணங்கப்படுகிறது..

சங்க காலப் பாடல்களில் அரங்கேற்ற அய்யனார் திருக்கோயில் 
மிகவும் சிறப்பிக்கப்பட்டுள்ளது. 

மதுரை நக்கீரனார் தம்முடைய 395வது புறநானூறு 
பாடலில் இக்கோயிலில் உறையும் சாஸ்தாவைப் புகழ்கிறார்.

திருக்கயிலாயத்தில் சேரமான் பெருமாள் நாயனாரால் சிவபெருமானைப் போற்றி ""ஞான உலா'' எனும் பாடல் பாடப்பட்டது. 

அதை பூவுலகிற்கு தந்தருள்வதற்காக அய்யனார் திருவுளங்கொண்டு எழுந்தருளிய திருத்தலம் இது. 

எனவே அரங்கேற்ற அய்யனார் என்ற பெயர் பெற்றார். ""ஞான உலா'' பாடல் அரங்கேறிய 18 கால் கல் மண்டபம் இன்றும் உள்ளது.


கயிலையில் சேரமான் இறைவனை கண்டு மகிழ்ந்து பாட அவர் பாடிய பாடல்களை சாஸ்தாவிடம் கொடுத்து பூவுலகில் வெளியிடுமாறு சொல்லி, சேரமான் வந்த வெள்ளை நிறக் குதிரையில் பூமிக்கு இறைவன் அனுப்பி வைத்ததாக சேக்கிழார் பெரிய புராணத்தில், வெள்ளானைச் சருக்கத்தில் குறிப்பிடுகின்றார். 

இறைவனின் ஆணையை ஏற்று சேரமான் சென்ற வெள்ளைக் குதிரையில் வந்திறங்கிய சாத்தன், சேரமானின் பாடல் தொகுப்பை எழுதி வெளியிட்ட நூல்தான் திருக்கயிலாய ஞான உலா. 
இது பன்னிரு திருமுறைகளில் ஒன்றாக வைக்கப்பட்டுள்ளது.

வியாக்ரபாத முனிவர், பதஞ்சலி முனிவர் ஆகியோருக்கு ஏற்பட்ட சனிக்கிரஹ உபாதையை நீக்கிய திருத்தலம் இது. 
நவகோள்களில் குரு, சனி, புதன் ஆகியோரின் பரிகார தலமாகவும் விளங்குகிறது



பூர்ண புஷ்கலா தேவியரோடு அய்யனார், இடது கையில் ஓலை சுவடியும். வலது கையை முழங்கால் மீது வைத்தும் அமர்ந்த கோலத்தில் காட்சியளிக்கிறார். அய்யனார் சிரசிலும், மார்பிலும், மணிக்கட்டிலும் ருத்ராட்சம் அணிந்து சிவ ஸ்வரூபமாக உள்ளார்.


கோயிலின் அமைப்பு தமிழ்நாட்டில் உள்ள மற்ற அய்யனார் கோயில்களிலிருந்து மாறுபட்டு உள்ளது. 


ராஜகோபுர வாசலிலிருந்து கோயிலுக்குள் நுழைந்ததும் முதலில் தென்படுவது பலி பீடமும், கல் யானையும். 


கல் யானைக்கு இடது புறமும், வலது புறமும் அதாவது தெற்கிலும் வடக்கிலும் கோயிலின் உள்ளே செல்வதற்கு படிகள் அமைக்கப்பட்டுள்ளன. 


மகா மண்டபத்தில் விதானம் யந்த்ர வடிவில் அமைக்கப்பட்டுள்ளது. 


இங்கு அமர்ந்து தியானம் செய்பவர்களுக்கு உடலில் புதிய ஆற்றல் பிறக்கும் என்பது நம்பிக்கை.

மகா மண்டபத்திலிருந்து அர்த்த மண்டபத்திற்கு செல்லும் 
வழியில் பிரதட்சிண மண்டபம் அமைந்துள்ளது. 

 ஸ்ரீபூர்ண புஷ்கலா சமேத அய்யனாருக்கு திருக்கல்யான உற்ஸவமும், இரவு கேரள செண்டை வாத்ய கோஷங்களோடு யானை வாகனத்தில் அய்யனார் புறப்பாடும் தரிசித்து அரங்கேற்ற அய்யனாரை வழிபட்டு சந்தோஷமான புதிய வாழ்வின் அரங்கேற்றத்தைக் காண பக்தர்கள் வருகை தருகிறார்கள்..


திருச்சி-சென்னை நெடுஞ்சாலையில் சமயபுரத்திலிருந்து 15 கி.மீ. தொலைவிலும், சிறுகனூர் என்னும் சிற்றூருக்கு 5 கி.மீ. வட மேற்கிலும், அருள்மிகு பிரம்மபுரீஸ்வரர் திருக்கோயிலுக்கு அருகில் உள்ளது திருப்பட்டூர் அரங்கேற்ற அய்யனார் திருக்கோயில்.


கிராமத்தின் காவல் தெய்வமாகக் கருதப்படும் அய்யனாருக்கு மிகப் பெரிய கற்கோயில் திருப்பட்டூரில் உள்ளது. 

பூர்ண புஷ்கலாம்பிகா சமேத அரங்கேற்ற அய்யனார் 
இங்கு பக்தர்களைக் காத்தருள்கிறார்.