பூ மரங்கள் வீசும் சாமரங்கள்

கல்லூரி வயதில் ஊட்டி தாவரவியல் பூங்காவில் “பாட்டில் பிரஷ் ட்ரீ” என்ற பெயருடன் இருந்த மரமொன்று மிகவும் கவர்ந்தது.

அதன் தாயகம் ஆஸ்திரேலியா என்று இருந்தது. என் தோழிகளிடம் இந்த மரத்தை இதன் தாயகத்தில் போய் பார்க்கனும் சிங்கத்தை அதன் குகையில் போய் பார்ப்பது மாதிரி என்று விளையாட்டாகக் கூறினேன்.

எந்த அஸ்து தேவதை ததாஸ்து சொல்லியதோ ஆஸ்திரேலியா சென்று இந்த மரங்களைச் சந்திக்கும் வாய்ப்பு கிடைத்தது.

அழகான பச்சை இலைகளுடன், சிவப்பு, ஆரஞ்சு, மஞ்சள், வெள்ளை எனப் பல்வேறு வண்ணங்களில் வாசனையும், தேனும் நிரம்பி தேன் சிட்டுக்களும், தேனீகளும் பறவையினங்களும் எந்நேரமும் வட்டமிட எழில் கொஞ்ச எல்லா இடங்களிலும் வளர்ந்து களிப்பூட்டிக் கொண்டிருந்தது.

ரோடு டிவைடர்களுக்கு நடுவிலும், இயற்கை வேலியாக வீடுகள், தோட்டங்களைச் சுற்றியும் வளர்த்து அழகையும், பசுமையையும் நிலைநிறுத்துகிறார்கள். வண்ணமயமாய் சிங்காரமாய் சிரிக்கும் மரத்திற்கு ஈடுஇணை ஏதும் சொல்ல முடியாது.

அரளிச் செடிகளை சாலை நடுவில் நட்டு, அதன் பால் கண்களில் தெரிக்கும் அபாயம் இருப்பதைக் கூட உணரமுடியாத நம் ஊரை நினைத்துக் கொண்டேன்.

சாலை ஓரங்களில் மின் கம்பிகள் செல்ல நேர்ந்தால் மரத்தின் நடுவில் தேவையான் அளவு அழகுற வெட்டி அமைத்திருக்கும் பாங்கு சொல்லி மாளாது.

போகன் வில்லாச் செடிகளால் பந்தல் போல நடைபாதை அமைத்து

இருக்கிறார்கள். மனம் மயக்கும் எண்ணமுடியாத வண்ணங்களில் பூத்து குளுமையான நிழலுடன், ஆக்சிஜனும் வழங்கிய அந்த எழிலார்ந்த பாதையில் வாக்கிங் சென்றது மறக்கமுடியாத நிகழ்வு.

கல், மண், சிமெண்ட், கட்டடத் தொழிலாளர்கள் என்ற செலவு ஏதுமற்ற இயற்கைப் பாதை. தண்ணீரும் அவ்வளவாகத் தேவைப் படாத இந்த மாதிரி இயற்கைப் பாதை நம் ஊருக்கு மிகவும் ஏற்றது.

ம்.. ஊதுற சங்கை ஊதி வைப்போம்.

விடியறப்ப விடியட்டும்…!!