“எத்தனை கோடி இன்பம் !

எத்தனை கோடி இன்பம் வைத்தாய் - எங்கள்
இறைவா! இறைவா! இறைவா!


சித்தனை அசித்துடன் இணைத்தாய் - அங்கு
சேரும் ஐம்பூதத்து வியனுலகு அமைத்தாய்.
அத்தனை உலகமும் வர்ணக் களஞ்சியமாகப் 
பல பல நல்லழகுகள் சமைத்தாய்

பாரதி பாடிய அற்புதமான தீந்தமிழ்ப்படல்கள் கண்களிலும் மனதிலும் 
புத்துணர்வு பூக்கச் செய்யும்...

உலகம் பிறந்தது எனக்காக ஓடும் நதிகளும் எனக்காக

மலர்கள் மலர்வது எனக்காக அன்னை மடியை விரித்தாள் எனக்காக


காற்றில் மிதக்கும் ஒலிகளிலே கடலில் தவழும் அலைகளிலே
இறைவன் இருப்பதை நானறிவேன் என்னை அவனே தானறிவான்


தவழும் நிலவாம் தங்கரதம் தாரகை பதித்த மணி மகுடம்
குயில்கள் பாடும் கொண்டது எனது அரசாங்கம்


எல்லாம் எனக்குள் இருந்தாலும் என்னைத் தனக்குள் வைத்திருக்கும்
அன்னை மனமே என் கோயில் அவளே என்றும் என் தெய்வம்

நீண்டு நெடிய உயரமான மலைகள் அடர்ந்த காடுகள், கால் கொலுசுகளின் ஓசை போல சலசலவென்று ஒலி எழுப்பி வெள்ளி உருகிக் கொட்டுவதுபோன்ற நீர்வீழ்ச்சிகள், காதுகளுக்கு இனிமை தரும், தேமதுர இசைபோல் ஒலிக்கும் பறவைகளின் சப்தங்கள், கண்களுக்கு விருந்தளிக்கும் பச்சைப் பசேல் காட்சிகள், உடலை மென்மையாக தொட்டுத் தழுவும் இதமான குளிர் தென்றல் காற்று என ஒவ்வொரு நிகழ்வையும் கொஞ்சம் அமைதியாக நினைத்துப் பார்த்தாலே . உள்ளமும் உணர்வும் புத்துணர்வடையும்

கற்பனையான நினைவிற்கே இப்படி ஒரு அதிசயம் நிகழ்கிறது என்றால் நிஜமாகவே அந்தப் பகுதிக்குச் சென்றால் நிலை ஆனந்தமடையும்..

மலை வாசஸ்தலங்கள் போனதும் புதிய வானம் புதிய பூமி என்று துள்ளாத கால்கள் குறைவாகவே இருக்கும்.

மனிதன் ஒவ்வொரு முறையும் தன்னை புதுப்பித்துக்கொள்ளவும், எப்போதும் புத்துணர்வுடன் வாழவும் இயற்கை நமக்கும் எல்லா வற்றையும் படைத்துள்ளது.

மெய்மறக்கும் இசை மனக்காயங்களை ஆற்றுகின்ற மருந்தாகின்றது. 

என் பாட்டுத் திறத்தாலே இந்த வையத்தினைப் பாலித்திட வேண்டும் என்று பாரதி சொன்னது நிஜமே. 


பாடல் காதுகளை வைகுண்ட வாசலாக்குகின்றது. 

மாயக் கண்ணனுக்குத் தாலாட்டுப் பாடலில் தொடங்கி….. என்னோடு தங்கு தங்கென்று சொன்ன தங்கக் குணத்தானை! எங்குநான் காண்பேன் இனி? என்று கவிமணி தொடர்புள்ள எதுகைப் பாடலும் இனிமை சேர்க்கும் அதிசயம் அனுபவித்தவர்களால் உணரமுடியும்..

சமயக் கோவில்கள் கூட இயற்கை சூழ்ந்த பகுதியிலேயே அமைந்திருக்கிறது. பனி சூழ்ந்த இமயமலையில்தான் இந்து சமயக் கடவுளான சிவன் குடியிருப்பதாக புராணங்கள் கூறுகின்றன.

தவம் செய்யும் சித்தர்கள், முனிவர்கள், ஞானிகள், ரிஷிகள் தங்களின் தவம் எளிதில் ஈடேறவே மலைப் பகுதிகளைத் தேர்ந்தெடுத்தனர்.

அமைதியான சூழ்நிலையில்தான் ஆழ்மனம் விழித்துக் கொள்ளும். பிரபஞ்ச சக்தி நிறைந்திருக்கும் என்கின்றனர் சித்தர்கள்.

இந்தியாவில் இமயமலைப் பகுதிகளிலும் மேற்குத் தொடர்ச்சி மலை, கிழக்குத் தொடர்ச்சி மலை, விந்திய மலைத் தொடர்களிலும் அடர்ந்த காடுகள் உள்ளன. கடலால் நிலப்பரப்பு அரிப்பதை தடுக்க இயற்கையாகவே ஒரிசாவில் சுந்தரவனக் காடுகள், தமிழ்நாட்டில் வேதாரண்யம், பிச்சாவரம், பகுதிகளிலும் காடுகள் நிறைந்துள்ளன.

திரிபுரா மாநிலம் தாவரங்களின் சொர்க்க பூமி என்றே அழைக்கப்படுகின்றது.

இந்தியாவின் எல்லாப் பகுதியிலும் மலைகள் சூழ்ந்துள்ளன. இந்த மலைகள் ஒவ்வொன்றும் தனிச்சிறப்பு வாய்ந்தவை. இங்குள்ள அரிய வகையான மூலிகைகளைப் பற்றி அனைவரும் அறிந்துகொள்ள வேண்டும். ஏனென்றால் நாம் காடுகளையும், மலை வளங்களையும் வெகுவாக அழித்துக் கொண்டிருக்கிறோம். 

நம் முன்னோர்கள் கிராமங்களில் பயன்தரும் மரங்களை அதிகம் வளர்த்தனர். வீடுகளைச் சுற்றி தோட்டங்களை அமைத்தனர். இதனால் தூய்மையான காற்றை சுவாசித்தனர். ஆரோக்கியமாக வாழ்ந்தனர். ஆனால் நாமோ அதற்கு எதிர்மறையாக நடந்து கொண்டிருக்கிறோம்.

இதனால் நீர் வளம் குறைந்தும், தூய்மையான காற்றும் கிடைக்காமல் ஆயுள் முழுவதும் நோயோடும் மருந்தோடும் வாழ்ந்து கொண்டிருக்கிறோம்.

ஆனால் மலைப் பகுதிகளில் அடர்ந்த காடுகளில் வாழும் மக்களைப் பாருங்கள். நோயின்றி ஆரோக்கியமாக வாழ்ந்துகொண்டிருக்கின்றனர். 

இந்த மலைமக்களின் நோயற்ற வாழ்வுக்குக் காரணம் தூய்மையான காற்றும், இரசாயனம் கலக்காத இயற்கை உணவுகள்தான் என்கின்றனர் நம் ஆராய்ச்சியாளர்கள்.

தமிழக மலைப்பகுதியில்தான் அரிய வகையான சந்தனமரங்கள் கிடைக்கின்றன.
சந்தன மரங்கள் வனக் கொள்ளையர்களால் அதிக அளவு அழிக்கப்பட்டு விட்டன.