எண்ணச்சிறகணிந்து வசீகரிக்கும் வண்ணத்துப்பூச்சி

மலர்கள் தோறும் நடந்து போகும் சிறிய ஜீவனே
 உந்தன் மனதைக் கொஞ்சம் இரவல் கேட்கும் எனது ஜீவனே

ஓ... பட்டர்பிளை பட்டர்பிளை ஏன் விரித்தாய் சிறகை 
வா வா அருகில் நீ வருவாயா 

பூப்பூவா பறந்து போகும் பட்டுப் பூச்சி
மலர்ந்து பூத்துச் சிரித்து மனதை மலரச்செய்யும் மலர்களுக்குப் போட்டியாக வான்வில்லின் வண்ணங்களை தன் சிறகில்  அழகாக தீற்றிக்கொண்டு நம் எண்ணப்பறவைகளுக்கு விருந்தாக  வண்ணச்சிறகணிந்த  எழில் மிகு வண்ணத்துப்பூச்சிகளுக்கான சீசன் காலங்களான  அக்டோபர் நவம்பர் மாதங்களில் வண்ணத்துப் பூச்சிகளுக்கான பூங்காக்களில் அதிகம்  கண்டு மகிழலாம்!

பெங்களூரில் வண்ணத்துப் பூச்சிகளுக்கென்றே பிரத்தியேகமாக பட்டர்ஃப்ளை பார்க் என்று பூங்காவினை அமைத்து விதம் விதமான வண்ணங்களில் ரோஜாக்களைக்கொண்ட பூங்காவில்  பச்சை, ஆரஞ்ச், மஞ்சள், நீலம், சிவப்பு என்று சிறகில் கொண்ட ஓவியத் தீற்றலுடன் வண்ணத்துப்பூச்சிகள் அங்கும் இங்கும் பறப்பதைக்காணக்கண்கோடி வேண்டும் ..!

.நம் கையில் நம் தலைமேல் அமர்ந்து ஹலோ சொல்லிப் போகின்றன.  ’எத்தனைகோடி இன்பம் வைத்தாய் இறைவா’ என்று பாரதி போல பாடத் தோன்றும் அளவிற்கு பரவசம் சிறகடிக்கும் ..!

ஏழரை ஏக்கர் நிலப்பரப்பில் 10000 சதுர அடி டோம் அதாவது வட்ட வடிவமான வளைவுப் பகுதி கொண்டு அமைக்கப்பட்டுள்ள  பார்க்கில் ஒரே நேரத்தில் இருபதிலிருந்து முப்பது வகை வண்ணத்துப்பூச்சிகளைப் பார்க்கலாம்...

வண்ணத்துப்பூச்சிகள் வந்து அமருவதற்காகவே வளர்க்கப்படும் 
ரோஜாத் தோட்டம், பழங்கள் கொண்ட மரங்கள், சிறு ஓடைகள் 
என்று உள்ளம் கொள்ளை போகும் விதத்தில் 
அமைந்துள்ளது பட்டர்ஃப்ளை பார்க்கில்.

சில இடங்களில் கூட்டம் கூட்டமாகத் தரையில் உட்கார்ந்து  தங்கள் உடலுக்குத் தேவையான உப்பினை உறிஞ்சி எடுத்துக் கொள்கின்றன..! 

கேரள மாநிலம், சாலக்குடியில், தும்பூர்முழி பட்டாம்பூச்சி பூங்கா உள்ளது. நவம்பர், டிசம்பர் மாதங்கள்,ஆயிரக்கணக்கான பட்டாம்பூச்சிகள் காணப்படுகின்றன

அழிவின் விளிம்பில் உள்ள, 'கருடா, கிருஷ்ணா' பட்டாம்பூச்சிகள், 
இந்த பூங்காவில் அதிகளவில் காணப்படுகின்றன. 

ஜப்பானில் உள்ள, பிரபல பட்டாம்பூச்சி ஆய்வாளர், இன்னோவ அக்காஷி, அவ்வப்போது, தும்பூர்முழி பூங்காவிற்கு ஆய்வு செய்வது வழக்கம். தும்பூர்முழி பூங்காவை மாதிரியாக வைத்து, சிங்கப்பூரிலும் பூங்காவை உருவாக்கியுள்ளார்..! 

பார்வையிட வருவோரின் வாகனங்களின் எண்ணிக்கை அதிகரித்ததை அடுத்து, அதிலிருந்து வெளிவரும், 'கார்பன் மோனாக்சைடு' வாயு, பட்டாம்பூச்சிகளின் இனத்தை பெருமளவில் பாதிப்பதால், இந்தப் பகுதியில் வாகன போக்குவரத்திற்கு தடை விதிக்குமாறு, இயற்கை ஆர்வலர்கள் வலியுறுத்தி வருகின்றனர்.

நெருங்கும் போது அகப்படாமல் பறந்து போகிறாய்
நிழலைப் போல தொடரும் என்னை மறந்து போகிறாய்

  ஆஹா உனக்கு யாரும் தடையும் இங்கு விதிப்பதில்லையே
  ஆஹா எனக்கும் கூட அடிமைக் கோலம் பிடிப்பதில்லையே